भांगरभूंय | प्रतिनिधी
मायकल लोबो, जोजफ सिक्वेरा हांचें थळाव्यांक आस्वासन
म्हापशें: कळंगूटे डान्सबार आनी डिस्को क्लबा सयत टावट्स गायड दलालगिरी बंद करपाची प्रक्रिया सुरू आसा. थळाव्या तरणाट्यांनी तिडकी भितर कायदो हातांत घेवचो न्हय. सात दिसां भितर हाचेर योग्य कारवाय जातली अशी हमी आमदार मायकल लोबो आनी कळंगूटचे सरपंच जोजफ सिक्वेरा हांणी दिली.
सोमारा मध्यान रातीं डेव्हिल्स नांवाच्या रॅस्टोरंण्टाच्या कामगाराक मारपेट तशेंच रॅस्टोरंण्टाच्या दाराची मोडतोड केल्ल्या प्रकरणांत कळंगूट पुलिसांनी एका पंच वांगड्यां सयत हेरां आड गुन्यांव दाखल केल्लो. हे फाटभुंयेर मंगळारा दनपारां आमदार, पंचायत मंडळ आनी थळाव्यांची बसका जाली.
हो गुन्यांव दाखल करून पंचायत आनी थळाव्यांचे मनोधैर्याचे खच्चीकरण ह्या अवैद्य धंदो करप्यांनी चलयलां. पूण आमी ओगी बसचे नात, आमची ह्या बेकायदो गजालीं आड मोहीम सुरूच उरतली. ह्या लोकां कडल्यान आमच्या जिवाक धोको आसा. ताका लागून आमकां मेकळेपणान गांवांत भोंवपाक मेळचें हे खातीर ह्या 20 डान्सबार्रांचेर दरेकी दोन पुलीस तैनात करचे अशी मागणी बसकेंत तरणाट्यांनी केली.
दलाली करपी हे लोक गांवच्या चलयां कडेन बोट दाखोवन पर्यटकांची फटवणूक करतात. हो प्रकार खंय तरी थांबूंक जाय. ते खातीर आमी भायर सरल्यात, आनी ह्या गुन्यांवकारी प्रवृत्तीच्या लोकां पसून आमकां सुरक्षा दिवपाची जापसालदारकी सरकार आनी थळावे लोकप्रतिनिधी हांची आसा अशें सनी कांदोळकारान म्हणलें.
खोब्रावाड्यार थ्री किंग्स नांवाच्या क्लबा कडल्यान थळाव्यांची सतावणूक जायत आसा. ह्या डान्सबार्रांत थळाव्यांचोय वांटो आसा. आमच्या आंगणांत घुसखोरी करून सेगीतपणान सोरो पियेतात. आमकां रातच्या वेळार घरा भायर सरूंक मेळना. आमी आमदार, पंचायत आनी हेरां कडेन हो प्रकार थांबोवपाची मागणी केली. पूण हाचेर कारवाय जाल्ली ना. अशी कागाळ एका तरणाट्यान केली.
हे बेकायदो प्रकार बंद करपा खातीर पंचायत कायदेशीर प्रक्रिया करता. आमी सगल्यांनी हातूंत फुडाकार घेतला. सरकार आनी पुलीस अधिकाऱ्यांचोय आमकां तेंको आसा. पूण कोणेच कायदो हातांत घेवचो न्हय. ही प्रक्रिया पुराय जाले उपरांत योग्य अशी कारवाय जातलीच. तशेंच पयर डावपेच खेळून त्या डिस्कोकारान तुमकां सांपळ्यांत धरलो आनी गुन्यांव दाखल करून घेतला. अशा डावपेचांत परतून कोणूच सांपडचो ना हाची जतनाय घेयात. हे बेकायदो प्रकार बंद जातलेच अशें आस्वासन आमदार मायकल लोबो हांणी बसकेंत दिले.
कळंगूटचे सरपंच जोजफ सिक्वेरान म्हणलें, आमी डान्सबार विरोधांत कायदेशी प्रक्रिया सुरू करून कारणां दाखय नोटीस दिल्या. आतां ह्या लोकांची प्रत्यक्षरितीन सुनावणी जातली आनी उपरांत ते कायदेशीर रितीन बंद करपाचे आदेश जारी जातले.
आमकां गिरायक समजून चलयो दितां अशें सांगून त्या डान्सबाराच्या कामगारान हाडिल्ले. थंय तांणी आमकां गाळी संवल्यो, उपरांत आमचे कडल्यान हो प्रकार घडलो. आमकां ह्या डान्सबार्राचो धनी लक्ष्य करीत आसा. कळंगूटे आमकां रावपाक लेगीत आतां भिरांत दिसूंक लागल्या. हे सगले अवैद्य प्रकार बंद करपा खातीर आमकां आमदार, सरपंच आनी पंच वांगड्यांचो तेंको जाय. सद्या कळंगूटे बायलांच न्हय जाल्यार दादले लेगीत सुरक्षीत नात. हाचेर केन्ना कारवाय जातली हाचेर मुख्यमंत्री आनी पर्यटन मंत्री हांणी स्पश्टीकरण दिवचें अशी मागणी थळाव्या तरणाट्यांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
