भांगरभूंय | प्रतिनिधी
म्हापशें पालिकेच्या उपनराध्यक्षा सयत नगरसेवकांची कारवाय
म्हापशें: नगरपालिकेचो कोयर व्हरपी ट्रक बेकोयदो रितीन कोलवाळे एका कावला अड्ड्यांतलो कोयर व्हरतना धरलो. उपनगराध्यक्षा सयत तीन नगरसेवकांनी पालिकेचो कर्मचारी आशिल्ल्या वाहन चालका सयत ह्या ट्रकाक धरलो.
मंगळारा रातीं 8.30 वरांच्या सुमाराक ही कारवाय केली. ह्या कावला अड्ड्यांतलो उबारिल्लो कोयर म्हापशें पालिकेच्या आसगांव सड्या वयल्या कोयरा प्रकल्पांत बेकायदो रितीन उडोवपाचो यत्न हो चालक करतालो. हे खातीर पालिकेचो ट्रक वापरत आशिल्ल्याची म्हायती मेळिल्ली.
ते प्रमाण उपनगराध्यक्ष चंद्रशेखर बेनकार, नगरसेवक विराज फडके आनी साईनाथ राऊळ हांणी फाटलाग करून हो ट्रक धरलो. हो गैरप्रकार फाटल्या कितल्याशाच म्हयन्यां सावन सुरू आशिल्लो, आनी हो कोयर उबारपाचे एके ट्रिपी फाटल्यान ह्या पालिकेच्या वाहन चालकाक 2500 रुपया मोबदलो मेळटालो. ही ट्रीप सप्तकांतल्यान एकदां थारिल्ली अशें चवकशेंतल्यान मुखार आयलां.
मंगळारा रातीं म्हापशें पालिकेचो जीए 03 के 2200 हो कोयर व्हरपी ट्रक पालिकेचो हंगामी कर्मचारी दुर्गाप्पा तलवार हो मुशीरवाडो कोलवाळे ए के इंटरप्रायज ह्या कावला अड्ड्यांतलो कोयर व्हरपा खातीर गेल्लो. त्या वेळार ह्या अड्ड्यातूच वयल्या नगरसेवकांनी कोयर व्हरपी ट्रका सयत चालकाक धरलो. रोखडीच हे घडणुकेची म्हायती पालिका मुख्याधिकारी अमितेश शिरवयकार हांकां दिली.
उपनगराध्यक्ष चंद्रशेखर बेनकारान म्हणलें, पालिकेचे कांय कर्मचारी भायले भायर पालिकेचो कोयर व्हरपी ट्रक बेकायदो कावला अड्ड्यांतलो कोयर एकठांय करपा खातीर वापरतात अशी म्हायती मेळिल्ली. ते प्रमाण आमी संबंदिताच्या मागार आशिल्ले. अशा गैरप्रकारांत हेर कांय कर्मचारी गुथिल्ले आसुये असो आमकां दुबाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
