कोळसो, बॉक्सायड येरादारीचेर उपाय काडूं

भांगरभूंय | प्रतिनिधी

संकल्प आमोणकार, कृष्णा साळकार हांचें आंदोलनकर्त्यांक आस्वासन

वास्को: प्रदुशण जावचे न्हय आनी शार वाठारांतल्यान कोळसो, बॉक्सायड येरादारी जावची न्हय हे खातीर आमी उपाय काडूं अशें आस्वासन मुरगांवचे आमदार संकल्प आमोणकार आनी वास्कोचे आमदार कृष्णा साळकार हांणी आंदोलनकर्त्यांक मंगळारा दिलें. आमकां लेखी स्वरुपांत ठोस आस्वासन मेळ्ळे बगर आमी हांगासरल्यान हालचे नात अशी भुमिका आंदोलनकर्त्यांनी घेतल्या.

मुख्यमंत्री डॉ. प्रमोद सावंत हांचे कडेन तुमच्यो समस्या मांडून उपाय काडपाचो यत्न करूं अशें दोगूय आमदारांनी सांगलें. पूण सव्या दिसाय मुरगांव बंदरांतल्यान ट्रकांतल्यान जावपी बॉक्सायड, कोळसो येरादादरी बंदूच उरली. योग्य आस्वासन मेळ्ळ्यार घडये बुधवारा ती परतून सुरू जावपाची शक्यताय आसा.

मजगतीं, ह्या आंदोलनाक लागून ट्रक चालकांचें जेवण, न्हावप बी गजाली संबंदी जे हाल जायत आसात त्यो सुविधा ट्रक कंत्राटदारांनी पुरोवच्यो हे खातीर आमदारांनी लक्ष घालचे अशी मागणी समाजीक कार्यकर्ते शंकर पोळजी हांणी केली.

शार वाठारांत प्रदुशण जावचे न्हय हे खातीर मुरगांव बंदरांतल्यान ट्रकांतल्यान जावपी कोळसो, बॉक्सायड येरादारी बंद करची अशी मागणी करून सडा वाठारांतल्या कांय जाणांनी 15 डिसेंबरा सावन येरादारी आडायिल्ली. ताका लागून बंदरा भितर सुमार 200 ट्रक जाल्यार भायर 50 ट्रक उबे आसात. ह्या प्रकरणांत फाटल्या स दिसा सावन कसलोच उपाय येवंक ना. आमदारांनी आमकां ठोस आस्वासन दिवचें अशी मागणी आंदोलनकर्त्यांनी केल्ली. ताका लागून आमदार आमोणकार आनी आमदार साळकार हांणी मंगळारा दनपारा घडणूक थळार वचून आंदोलनकर्त्यां कडेन चर्चा केली. त्या वेळार आंदोलनकर्त्यां वतीन शंकर पोळजी, बालन चोडणकार हांणी बाजू स्पश्ट केली. जो मेरेन उपाय येना तो मेरेन आंदोलन चालूच उरतलें अशें स्पश्ट केलें.

शार वाठारांत प्रदुशण जायत आशिल्ल्यान कोळसो, बॉक्सायड येरादारी शार वाठारांतल्यान करिनासतना बायणा उड्डाणपूला वयल्यान करची अशी मागणी आंदोलनकर्त्यांची आसा. हे विशीं तांणी कांय समस्या मांडल्यांत. त्यो आमी आयकून घेतल्यात त्यो समस्या आनी तांची मागणी आमी मुख्यमंत्र्या मुखार मांडटले. तेच प्रमाण हेर संबंदीत सरकारी यंत्रणे कडेन चर्चा करतले. ते खातीर आमी तांकां आंदोलन फाटीं घेवपाची विनंती केल्ली. पूण तांणी न्हयकार दिला. आमी मुख्यमंत्र्या कडेन चर्चा करून उपाय काडपाचो यत्न करतले अशें आमोणकार हांणी सांगलें.

कोळसो हाताळणी संबंदी म्हजे भुमिकेंत कसलोच बदल जाल्लो ना. कोळशाचें प्रदुशण जावचें न्हय अशी म्हजी भुमिका आशिल्ली ती अजून तशीच आशिल्ल्याचें तांणी स्पश्ट केलें. पूल तयार जाले उपरांत कोळसो, बॉक्सायड येरादारी करपी ट्रक पुला वयल्यान वताले. पूण मुरगांव बंदर प्राधिकरणान कांय दिसां पयलीं काडिल्ल्या आदेशा प्रमाण ही येरादारी मुरगांव बंदरांतल्या धक्को क्रमांक णवांतल्यान शार वाठारां वटेन वळयिल्ल्याचो दावो आमोणकारान केलो.

कृष्णा साळकार हांणी प्रदुशण बंद जावचें हे गजालीक प्राधान्य आसा. शार वाठारांतले रस्ते अरुंद आशिल्ल्यान, वाहनांची संख्या वाडिल्ल्यान तशेंच प्रदुशण जायत आशिल्ल्यान शार वाठारांतल्यान कोळसो, बॉक्सायड येरादारी नाकाच, ताचे बदला ती येरादारी बायणा उड्डाण पुला वयल्यान करची. प्रदुशण जावचें न्हय हे खातीर आमचो तेंकाे आसा अशें तांणी स्पश्ट केलें. आंदोलनकर्त्यांची बाजू आमी आयकल्या. ते संबंदी मुख्यमंत्र्या कडेन चर्चा करून उपाय काडटले. बायणा सावन मुरगांव बंदरांतलो धक्को क्रमांक णव मेरेन पुलाच्या फांट्याचें काम पुराय जाले उपरांत ह्या येरादारीचो प्रस्न पुरायपणान सुट्टलो अशें साळकारान म्हणलें.