भांगरभूंय | प्रतिनिधी
थळाव्या लोकांची मागणी; नाजाल्यार करतले उपोशण
वास्को: वेळसांव आरोशी पंचायत वाठारांतल्या आरोशी दर्यादेगे वयल्यो नश्ट केल्ल्यो रेंवेच्यो दोंगुल्ल्यो आनी पुरयिल्लो नालो येता त्या कांय दिसां भितर पयलीं भशेन करात. जर केलो ना जाल्यार उपोशणाक बसपाची शिटकावणी आरोशीच्या नागरिकांनी दिल्या. तशेंच वेळ पडत जाल्यार कायदेशीर मार्ग आपणायतले अशेंय तांणी म्हणलां.
आरोशी दर्यादेगे वयल्यो रेंवेच्यो दोंगुल्ल्यो नश्ट करतना तशेंच पावसाच्या दिसांनी पावसाच्या उदकाचो निचरो जावपाची परंपरीक वाट बंद करपा खातीर कसलीच परवानगी घेवंक नाशिल्ली. संबंदितां कडेन कसलीच संबंदीत सरकारी विभागाची परवानगी ना. थंय रेंवेच्यो दोंगुल्ल्यो नश्ट केले उपरांत जमीन सपाट करपा खातीर जो जेसीबी हाडिल्लो, ते संबंदी थळाव्या नागरिकांनी वेर्णें पुलिसांक म्हायती दिले उपरांत पुलिसांनी तो जेसीबी ताब्यांत घेतलो.
रेंवेच्यो दोंगुल्ल्यो नश्ट केल्ले खातीर थळावे आमदार, पंचायत तशेंच संबंदीत सगल्या सरकारी यंत्रणां कडेन कागाळी करून कारवाय करपाची मागणी केल्या. हाचे पयलीं उदकाची वाट बंद केल्ल्यान थंय व्हड प्रमाणांत उदक सांचिल्लें अशें नागरिकांनी सांगलें.
हो गांव पुर्वजांनी सांबाळून दवरला. तो आमी सांबाळून दवरपाची गरज आसा. ते खातीर रेंवेच्यो दोंगुल्ल्यो आनी पावसाच्या उदकाची परंपरीक वाट आदींची राखण करप गरजेचें आसा. हे खातीर रेंवेच्यो दोंगुल्ल्यो पयलीं भशेन करून दिवच्यो अशी आमची मागणी आसा. गांवच्या लोकांक त्या दोंगुल्ल्याचें म्हत्व खबर आसा. पूण गोंया भायले जे लोक थंय जमीन विकती घेतात. तांकां रेंवेच्या दोंगुल्ल्याचें म्हत्व खबर नाशिल्ल्यान ते त्यो नश्ट करतात असो दावो रहिवाशांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
