भांगरभूंय | प्रतिनिधी
40 दीस जातली प्रेक्षकांची मनरिजवण
म्हापशें: बोडगेश्वर मैदानार संवसारभर फामाद आशिल्ली सुपर स्टार सर्कसीचे चार वर्सां उपरांत म्हपश्यां आयज (मंगळारा) सावन खेळ सुरू जातले. हे खेळ 40 दीस चलतले आनी सर्कसीचें उक्तावण नगराध्यक्षा शुभांगी वायंगणकार हांचे हस्तुकीं सांजवेळा जातलें अशी म्हायती सर्कसीचे धनी प्रकाश माने हांणी दिली.
काल (सोमारा) सकाळीं सर्कस थळाचेर आयोजीत केल्ले पत्रकार परिशदेंत माने हांचे सयत वेवस्थापक ज्वाला सिंग आनी आयोजक गुरुनाथ नायक हाजीर आशिल्ले.
श्री देव बोडगेश्वर जात्रे निमतान ही सर्कस हाडल्या. दोन वर्सांच्या कोरोना म्हामारीक लागून आमी सर्कसकार 20 वर्सां फाटीं गेल्यात. आमच्या देशांतल्याे 250 मदल्याे सद्या फक्त 10 ते 12 सर्कस कंपनीं सुरू आसात. जनावरां तशेंच बाल कलाकारांचे बंदी उपरांत आनी आतां कोरोनाक लागून ही स्थिती निर्माण जाल्या. कोरोना काळांत जाल्यार 30 परस चड कंपनीं बंद पडल्यो. मायबाप प्रेक्षकांनी सर्कसीचे खेळ पळोवंक येवचें आनी आमकां सहकार्य करचें अशें आवाहन माने हांणी ह्या वेळार केलें.
जनावरांचेर बंदी आसली तरी जिम्नेस्टीक खेळाच्या आदारान आमी प्रेक्षकांची मनरिजवन करपाक बांदील आसात. तीन फुटाच्या विदुशका सयत जिम्नेस्टिकाचे 25 खेळ हे सर्कसींत पळोवंक मेळटले. हे सगलेच खेळ आकर्शक आसतले. 100 ते 400 रुपया म्हणल्यार सर्वसामान्यांक परवडपी तिकेट रक्कम आसा. दनपारां 1 वरांचेर, सांजवेळा 4 आनी 7 वरांचेर अशे सद्दां सर्कसीचे तीन खेळ जातले. 20 दिसा उपरांत शाळेंतल्या भुरग्यां खातीर खासा सूट दितले अशें माने हांणी सांगलें.
कोरोना काळा उपरांत देशभर आमचो हो सर्कसीचो 10वो खेळ आसून देशभरांत विवीध सुवातींनी 9 खेळ आयोजीत केल्ले. आमची ही सर्कस वेवसायांतली तिसरी पिळगी आसून दुकळाक लागून आज्यान सर्कस सुरू केल्ली. जाल्यार आतां आमी कोरोना म्हामारीक लागून आयिल्लो दुकळ पळयला. आमकां ह्या काळांत खूबशा जाणांनी मजतीचो हात दिलो. आमच्या देशांत 1873-74 वर्सा विष्णुपंत शास्त्री हांणी शास्त्रे अॅण्ड्स सर्कस सुरू केल्ली अशी म्हायती माने हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
