भांगरभूंय | प्रतिनिधी
भांगरभूंय । खबरां मेज
पणजीः राज्यांतल्या पर्यटनाक चालना तशेंच उर्बां दिवपा खातीर पर्यटन खातें आनी एअरबीएनबी हांणी समजिकायेची कबलात केल्या. गोंयांतल्या दर्या देग वाठारा वांगडा हेर वाठारांत होमस्टे पर्यटनाक हे कबलाती वरवीं चालना तशेंच हॉस्पिटॅलिटी उद्देगाच्या तांकींत वाड करतले. पर्यटन मंत्री रोहन खवंटे आनी
एअरबीएनबीचे भारत, दक्षीण- पूर्व आशिया, हॉगकाँग आनी तैवानाचे म्हावेवस्थापक अमनप्रीत बजाज हांचे उपस्थितींत कबलातीचेर सयो केल्यो.
भारत तशेंच संवसारांतले लोकप्रीय पर्यटन थळ म्हणून गोंयांक चालना दिवपाचो यत्न हे कबलातींतल्यान जातलो. गोंयांतल्या चडशा कोणाक खबर नाशिल्ल्या थळांच्या पर्यटनाक उर्बां दिवपाचो यत्न एअरबीएनबी आनी पर्यटन खात्याचे भागिदारींतल्यान करतले. दर्या देगो आनी नायट लायफ हाचे शिवाय गोंयांक व्यापक आनी संपन्न अशें सांस्कृतीक दायज आसा. हो लोकां सामकार हाडपा खातीर रीडिस्कव्हर गोंय हो उपक्रम एअरबीएनबी आनी गोंय पर्यटन विभागांन एकठांय येवन सुरू केला. तातूंतल्यान देश- विदेशांतल्या पर्यटकांक गोंयांत होमस्टेचो बरो अणभव मेळोवन दितात.
गोंयांत शाश्वत पर्यटनाचे उदरगतीत पाठबळगेंदिवप तसेच गोंयची सध्या आसात ती आनी फुडलीं पर्यटन थळां उजवाडाक हाडपाचें काम करतले. होमस्टेची पर्यटकांक म्हायती दिवप, प्रशिक्षण कार्यावळी आयोजीत करून स्थानीक लोकांक तातूंत आसपावंन घेवन तांका रोजगाराची संध उपलब्द करून दिवपाचें काम हे कबलाती वरवीं करतले.
समजिकायेचे कबलाती विशीं पर्यटन मंत्री रोहन खवंटे हांणी सांगलें कीं, गोंयातले लोकांक चडशे खबर नाशिल्ले वाठार वेंचून काडून तांची पर्यटनाचे नदरेन उदरगत करपाचें काम कबलाती वरवीं हातांत घेतले. पर्यटन मळाक परत उबारी दिवपा खातीर वेगवेगळ्यो येवजण्यो आनी स्रोतांचें वांटर करपाक प्राधान्य दिवप हाचेर कबलातींत चड भर दिला. गोंयच्या गांवगिऱ्या वाठारांत पर्यटकांनी वच्चें हे खातीर थंय जायत्यो सुविधा तयार करप आनी सर्वसमावेशक अशी पर्यटन परिसंस्था गोंयांत उबी करप हें आमी एअरबीएनबी वांगडा केल्ले समजिकायेचे कबलातीचें मुखेल लक्ष्य आसा, अशें तांणी सांगलें.
गोंय आमचे खातीर एक प्राधान्याचें पर्यटन मार्केट आसा. गोंयांत दर्जेदार पर्यटनाची उबारणी करपा खातीर पर्यटन खात्या वांगडा केल्ले कबलातीक लागून बळगें मेळटलें अशें एअरबीएनबी भारत, दक्षीण-पूर्व आशिया, हाँगकाँग आनी तैवानाचे म्हावेवस्थापक अमनप्रीत बजाज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
