भांगरभूंय | प्रतिनिधी
म्हापशें: पिकेन-पेडें-हणजूण्यां जाल्ल्या उज्याचे दुर्घटणेंत कॅफे रॅस्टोरंण्टाचे जखमी जाल्ले धनयेक वाटावन भायर उबो राविल्लो समाजसेवक डेन्सन डिसौझा (38, हणजूण) हाका अपघाती मरण आयिल्लें. सरकारान मयत डेन्सन हाका मरणा उपरांत शौर्य पुरस्कार दिवन भोवमानीत करचें अशी मागणी थळाव्या लोकांनी केल्या.
ही घडणूक फाटल्या 24 ऑक्टोबराक घडिल्ली. उज्याचे दुर्घटणेंत सांपडिल्ली रॅस्टोरंण्टाची धनी रेश्मा उसकयकार ही लक्ष्मीपुजन उत्सवाची तयारी करताली. ह्या वेळार रॅस्टोरंण्टाक उजो लागलो आनी तो उजो पालयतना उसकयकार जखमी जाल्यो.
उजो लागिल्ल्या रॅस्टोरंण्टांत घुसून मयत डेन्सन डिसौझान ताका सुखरूप भायर काडिल्ली. पूण रॅस्टोरंण्टांतलो गॅस सिलिंडराचो स्फोट जालो आनी हो फुटिल्लो सिलिंडर आदळिल्ल्यान डेन्सन हाका जाग्यारूच मरण आयिल्लें.
मयत डेन्सन हाच्या ह्या धाडशी शौर्याक लागून ताका राज्य सरकारान शौर्य पुरस्कार भेटोवचो आनी ताचो मरणा उपरांत भोवमान करचो अशी मागणी रहिवाश्यांनी केल्या. हे खातीर हणजूण्यां मंगळारा सकाळीं थळाव्या लोकांची बसका जाली. आरटीआय कार्यकर्ते तशेंच समाजसेवक राजन घाटे हांणी हे बसकेचें आयोजन केल्लें. ह्या वेळार मयताचो बापूय ज्योकीं डिसौझा आनी आवय मारिया डिसोझा हांचे सयत हणजूण आनी शिवोली हांगासरले नागरीक हाजीर आशिल्ले.
डेन्सन डिसौझा हो सादेपणान रावतालो. समाजसेवेची ताका तळमळ आशिल्ली. समस्याग्रस्तांक तो मजतीचो हात दितालो. तुमचे कडेन आशिल्ल्यो सगल्यो बर्यो गजाली घेवन सर्गांत वचचे परस बर्यो गजाली दिवन रित्या हाता वच्चें ह्या तत्वज्ञानाचेर ताचो विस्वास आशिल्लो आनी त्याच मार्गान ताका मरण आयलें.
दरेक व्यक्तीक एक बरो मनीस करपा खातीर तो सदांच वावुरतालो. सिगार आनी सोर्याच्या वेसना पसून खूबशा जाणांक ताणें सुदारिल्ले. बोल्सांत उणें पयशे आसून लेगीत दुयेंत मनशाक त्या पयशांतल्यान ताणें खावपाक लेगीत दिलें. खंयचेय परिस्थितींत लोकांक मजत करपा खातीर तो तयार आसतालो. स्वताची आवय दुयेंत आसतना गोमॅकाँत हेर दुयेंतीक लेगीत ताणें मजत केल्या अशें मयत डेन्सना विशींचे गौरव करपी उलोवप हें बसकेंत उलोवप्यांनी केलें.
समाजीक कार्यकर्ते राजन घाटे हांणी फाटल्या 21 नोव्हेंबराक मुख्यमंत्र्याक निवेदन सादर करून डेन्सनाक शौर्य पुरस्कारान भोवमानीत करचें अशी मागणी केल्ली. मंगळारचे बसकेंत ह्या निवेदनाचो फाटपुरावो सरकारान करचो आनी येता त्या 19 डिसेंबराक गोंय मुक्ती दिसा डेन्सन डिसोझाक मरणा उपरांतचो शौर्य पुरस्कारान भोवमानीत करचें अशी मागणी ह्या वेळार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
