भांगरभूंय | प्रतिनिधी
सोबितीकरणा विशीं केली चर्चा
काणकोण: रान उदरगत म्हामंडळाची अध्यक्ष आमदार दिव्या राणे हांणी काणकोणां चापोलीक धरणाक भेट दिली. रान उदरगत म्हामंडळाच्या चापोली धरण आनी ताच्या सोबितीकरणा विशीं पळोवणी आनी आराखडो तयार करून ते विशीं विस्तारान चर्चा केली.
ह्या वेळार सभापती आनी काणकोणचे आमदार रमेश तवडकार, नगराध्यक्ष रमाकांत नायक गांवकार, सरपंच आनंदू देसाय, पंच गणेश गांवकार, महेश नायक, काणकोण भाजप मंडळाचे अध्यक्ष विशाल देसाय तशेंच रान उदरगत म्हामंडळाचे अधिकारी हाजीर आशिल्ले.
ह्या वेळार दिव्या राणे हांणी सांगलें, म्हामंडळा खाला जे प्रकल्प करूं येतले ते करतले आनी तेच बरोबर नवो आराखडो तयार करून ह्या प्रकल्पांचें कशें सोबितीकरण करून ते वरवीं थळाव्या लोकांक रोजगार निर्माण जातलो हें पळयतले.
रमेश तवडकार हांणी सांगलें, फुडारांत चापोली धरण हें पर्यटकांचें मुखेल आकर्शण आसतलें. थंय सभाघर रोपवे, सांस्कृतीक कार्यावळींचें आयोजन आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
