भांगरभूंय | प्रतिनिधी
रस्त्यार उबे रावन पळोवची पडटा वाट; दुकानांनी घेवचो पडटा आलाशिरो
फोंडें: तिस्क-उसगांव बाजारांत खरेदी करपा खातीर येवपी लोकांक बस स्टॅण्ड नाशिल्ल्यान रस्त्यार उबे रावन बशीची वाट पळोवची पडटा. प्रवाशांची गैरसोय पयस करपा खातीर अजून मेरेन बस स्टॅण्ड नाशिल्ल्यान प्रवाशांक रस्त्याचे कुशीक आशिल्ल्या दुकानांनी आलाशिरो घेवचो पडटा. कर्नाटक राज्यांत यो-वच करपी प्रवाशांची हांगा गर्दी दिसून येता. बस स्टॅण्ड नाशिल्लो गोंयांतलो तिस्क-उसगांव हो एकसुरो बाजार आसून सरकारान सुसज्ज बस स्टॅण्ड उबारून प्रवाशांक थाकाय दिवपाची मागणी प्रवाशां कडल्यान जायत आसा.
तिस्क-उसगांवां खूबशो खाजगी, कदंब तशेंच कर्नाटक राज्यांतल्यो बशी दीसपट्ट्यो यो-वच करतात. मोलें, सांवड्डें, सांखळी, वाळपय, सांकोड्डें, दाभाळ, फोंडें, पणजी, मडगांव ह्या सुवातींनी यो-वच करपी खाजगी तशेंच कदंब बशी रस्त्यार थांबून प्रवाशांक घेतात. ताका लागून सकाळीं, दनपारां आनी सांजवेळा वाठारांत येरादारीची कोंयडी जावपाचे प्रकार घडत आसतात. ताचो परिणाम खरेदी खातीर येवपी लोक वेळार पावनात. पावसांत तशेंच गिमांत प्रवाशांक रस्त्याचे कुशीक आशिल्ल्या दुकानां मुखार उबे रावन बशीची वाट पळोवची पडटा. तशेंच वाहनां घेवन येवपी लोकांक येरादारी कोंयडेचो त्रास सोंसचो पडटा. बस स्टॅण्ड उबारपा खातीर अजून मेरेन प्रक्रिया सुरू जावंक नाशिल्ल्याचें स्पश्ट दिसून येता.
तिस्क-उसगांव बाजारांत पाळी, गुळेली, उसगांव, सांकोड्डें, धारबांदोडें, मोलें आनी हेर वाठारांतले लोक खरेदी खातीर येतात. खरेदी केले उपरांत साहित्य घेवन लोकांक दुकानां मुखार उबे रावन बशीची वाट पळोवची पडटा. गोंयांतल्या सगल्या बाजारांनी लोकां खातीर सुसज्ज बस स्टॅण्ड उबारल्यात. खूबशे कडेन कोट्यांनी रुपया खर्च करून बांदिल्ले बस स्टॅण्ड वापर नासतना पडून आसात. पूण सामकी गरज आशिल्ल्या तिस्क-उसगांव वाठारांत बस स्टॅण्ड बांदपाचो यत्न सरकारान करूंक नाशिल्ल्यान प्रवाशांनी निरशेणी उक्तायल्या.
हांगा बस स्टॅण्ड उबारल्यार सरकाराचो महसूल वाडोवपा खातीर मजत जावंक शकता. बस स्टॅण्ड नाशिल्ल्या बाजारांत पावसाच्या दिसांनी दुकानां मुखार उबे रावन बशीची वाट पळयत आसतना कांय दुकानदारां कडल्यान प्रवाशांक वायट वागणूक मेळत आसता. ताका लागून कांय वेळा बाचाबाची जावपाचे प्रकार पावसाच्या दिसांनी पळोवंक मेळटात.
ह्या वाठारांतल्यान व्हड संख्येन प्रवाशी कर्नाटक आनी हेर राज्यांनी यो-वच करीत आसतात. ताका लागून हेर राज्यांतल्यान येवपी प्रवाशांक बरी सुविध मेळनाशिल्ल्याच्या कागाळींनी वाड जाल्या. जंक्शना कुशीक शौचालय तशेंच बसपाची सुविधा नाशिल्ल्यान हेर राज्यांतल्या प्रवाशांची गैरसोय जाता.
तिस्क-उसगांवां बस स्टॅण्ड नाशिल्ल्यान सगल्यो बशी रस्त्यार पार्क करून प्रवाशी घेतात. तातूंत कांय खाजगी बशी कितलेशेच फावटी प्रवाशी घेवपा खातीर रस्त्यार रावतात. हे खातीर खाजगी बस धनयांची झगडीं कितलेशेच फावटी पळोवपाचो योग प्रवाशांचेर आनी थळाव्या दुकानदारांचेर येता. फक्त मिनाची येरादारी करतना जंक्शनाचेर गृहरक्षक तशेंच पुलीस तैनात दवरतात. पूण फाटल्या कांय वर्सां सावन वाठारांत पुलीस आनी गृहरक्षक तैनात नाशिल्ल्यान खाजगी बस धनयांची मनमानी वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
