भांगरभूंय | प्रतिनिधी
पंचायत संचालकान नियंत्रण दवरचें: विरेश बोरकार
पणजी: कुडका बांबोळी पंचायतीचे ग्रामसभेंत सरपंच तशेंच तांच्या सोयऱ्यां कडल्यान मनमानी करतात. लोकांच्यो सुचोवण्यो आयकून घेनासतना ग्रामसभा स्थगीत करतात. फाटल्या आयतारा होच प्रकार ग्रामसभेंत घडलो. सांत आंद्रेंचे आमदार विरेश बोरकार हांणी पंचायत संचालक सिद्धी हळर्णकार हांची भेट घेवन ह्या पंचायतीचेर नियंत्रण दवरपा खातीर मागणी केली.
कुडका बांबोळी पंचायतीचे ग्रामसभेंत लोक प्रस्न विचारतात तेन्ना तांकां वेवस्थीत जापो दिनात. सरपंचाचे सोयरे दखल घेतात. आपल्याक जाय तशे निर्णय घेतात. पंचायत राज कायद्याचें आनी पंचायती कडल्यान हाका पाळो दिनात. तशेंच पंचायतीचे सचीव तशेंच गट विका अधिकारी सरपंचाक तेंको दितात. हे ग्रामसभेंत हांव स्वता हाजीर रावतां म्हणून पयलींच बावन्सर हाडून दवरतात अशें आमदार विरेश बोरकारान सांगलें.
हे पंचायतीन हाचे पयलीं अशेंच लोकांक विस्वासांत घेनासतना ग्रामसभा घेतल्यात आनी आपल्याक जाय तशे निर्णय घेतल्यात. बिल्डरांक हरकत ना दाखले दितात. पूण जेन्ना सावन हांव हे ग्रामसभेंत हाजीर रावंक लागलों तेन्ना सावन तांकां आपल्याक जाय तशी मनमानी करूंक मेळना जाली. ताका लागून खूबशे फावटी ग्रामसभा अर्द्यार सोडून बंद उडयल्यात. पंचायतीच्या सरपंचाक आपल्याक जाय तशे निर्णय आमी घेवंक दिवचे नात अशें विरेश बोरकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
