भांगरभूंय | प्रतिनिधी
म्हापशें: बार्देस म्हालांत दोन लिंगीक अत्याचाराच्यो घडणुको घडल्यो. पिडिते मदीं 17 वर्सांचें सान पिरायेचें चली आनी 50 वर्सां पिरायेच्या बायलेचो आस्पाव आसा. सान पिरायेच्या प्रकरणांतल्या दुबावीत आरोपीक अटक केल्या.
पुलिसांनी ह्या दोनूय प्रकरणांत गुन्यांव नोंद केला. सान पिरायेचे चलये वयलो लिंगीक अत्याचार फाटल्या 12 नोव्हेंबर ते 21 नोव्हेंबर मजगतीं घडलो. दुबावीत आरोपीन पिडिते कडेन इश्टागत केली आनी तिचें अपहरण केलें आनी तिचेर बळजबरी केली. तशेंच दुबावितान पिडितेचे फोटू तिच्या पालकां सयत इश्टांक आनी सोशल मिडियाचेर घालतलो अशी धमकी दिली.
पिडितेन हो प्रकार आपल्या पालकांक सांगलें बरोबर पालकांनी पुलिशेंत धांव घेतली आनी कागाळ दाखल केली. ते प्रमाण भादंसंच्या कलम 363, 376, बाल कायदो कलम 8(2) आनी पोक्सो कायदो कलम 4, 8, आनी 11 खाला गुन्यांव नोंद केला. ह्या गुन्यांवा खाला दुबावीत आरोपीक अटक केल्या आनी फुडलो तपास पुलीस करतात.
दुसरी लिंगीक अत्याचाराची घडणूक 12 आनी 14 सप्टेंबर मजगतीं घडली. जाल्यार पिडितेन 21 नोव्हेंबर दिसा पुलिशेंत कागाळ दाखल केली. ते प्रमाण पुलिसांनी दुबाविता आड भादंसंच्या 376 कलमा खाला गुन्यांव दाखल केला.
कागाळदार 50 वर्सां पिरायेचे पिडीत बायलेचें दुबावीत आरोपी कडेन इश्टागतीचें नातें आशिल्लें. हाचो फायदो घेवन दुबावितान वयल्या दिसांनी अस्नोड्यां एका हॉटेलांत वचून लिंगीक अत्याचार केलो. ह्या प्रकरणांत दोन म्हयन्यांनी पिडितेन पुलिशेंत कागाळ दाखल केल्या. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
