भांगरभूंय | प्रतिनिधी
दिवचल: दिवचल शाराक बगल दिवपी बायपास रस्त्याचें काम झुजा पांवड्यार सुरू आसून मजगतीं येवपी दोन पूल आसात तांचें काम ताकतिकेन पुराय करप, राखणे वणत उबारप, उदकाचे पायपलायनीची जतनाय घेवप तशेंच अवजड वाहनां खातीर तात्पुरती पर्यायी वेवस्था करप बी हे विशीं आमदार डॉ. चंद्रकांत शेट्ये हांणी सुचोवण्यो केल्यो.
ह्या वेळार नगराध्यक्ष कुंदन फळारी, नगरसेवक रियाज बेग, अनिकेत चणेकार, कमला तेली, दीपा शिरगांवकार, दीपा पळ, सुदन गोवेकार, रंजना वायंगणकार, निलेश टोपले रस्तो विभागाचे अभियंते, उदका स्रोत खात्याचे केपी नायक तशेंच हेर विविध अधिकारी हाजीर आशिल्ले.
बायपास रस्तो व्हाळशी ते झांट्ये कॉलेस असो वचत आशिल्ल्यान शारांतले येरादारीचो ताण आनी कोंयडी उणी जातली. पूण रस्त्याचें काम ताकतिकेन पुराय करपा खातीर गरजेच्यो सुचोवण्यो आनी वेवस्थे विशीं काल (शुक्रारा) आमदार शेट्ये हांणी दिवचल पालिकेचे नगरसेवक आनी अधिकाऱ्यांक घेवन पळोवणी करून सविस्तर नियाळ घेतलो.
आमकां हें काम ताकतिकेन पुराय जाल्लें जाय. पूण दोन पूल आशिल्ल्यान तें काम सारकें जावप गरजेचें आसा, आनी ते खातीर अधिकारी वर्गा कडेन चर्चा केल्या. पुलाचें काम सुरू आसतना अवजड वाहनां भायले पेठींतल्यान येवची न्हय, जाल्यार ते खातीर तांकां पर्यायी रस्तो कांय दिसा खातीर तयार करचो. तशेंच दोनूय वटाणी राखणे वणत उबारची. उदकाची पायपलायनीची दखल घेवची हे विशींचे आदेश तेच बरोबर सुचोवणी केल्ल्याची म्हायती आमदार डॉ. शेट्ये हांणी दिली.
ह्या वेळार नगराध्यक्ष कुंदन फळारी, तशेंच नगरसेवकांनीय सुचोवण्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
