भांगरभूंय | प्रतिनिधी
वास्को: शांतीनगरांत काल (शुक्रारा) दनपारां एके विद्यार्थिनीक धपको दिवन मोटार चालकान धांव मारली. ह्या विद्यार्थिनीच्या पांयाचें हाड मोडिल्ल्यान तिका उपचारा खातीर चिखली उपजिल्हो हॉस्पिटलांत दाखल केली. थंय मुळाव्या उपचारा उपरांत ताका गोंय वैजकी हॉस्पिटलांत व्हेली.
शांतीनगरांत रावपी जॉयसी जॉर्ज स्वामी (15) मांगोरहील हांगासरल्या एका विद्यालयांत शिकता. तें आनी ताची इश्टीण दनपारच्या वेळार शाळेंत वता आसतना गतीन मोटारिचो ताका नेटाचो धपको बसलो. हाका लागून तें रस्त्यार पडलें. ह्या अपघाता उपरांत मोटार चालकान थंय रावनासतना धांव मारली.
ह्या वेळार थंय पाविल्ल्या पुलिसांनी ते विद्यार्थिनीक उपचारा खातीर हॉस्पिटालांत दाखल केली. तो मोटार चालक धांव मारता आसतना त्या मोटारीचो कोणेतरी नंबर नोंद केल्ल्यान मोटारीच्या धनयाक पुलिसांनी आपयलो.
उपरांत वास्को पुलिसांनी मोटार आनी मोटार चालकाक ताब्यांत घेतलो. ह्या प्रकरणांत वास्को पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
