भांगरभूंय | प्रतिनिधी
3.92 कोटी खासा सरकाराचे घेतले अनुदान; पालिका मंडळाचे बसकेंत थाराव
म्हापशें: कोर्ट जंक्शन ते जिल्हो हॉस्पिटल मेरेन म्हापशें पालिकेन रस्त्याच्या दोनूय वटांनी फुटपाथ उबारपाचो निर्णय घेतला. अदमाशेक 3.92 कोटी रुपयांचें हें काम सरकाराच्या खासा अनुदानांतल्यान करपाचो थाराव सगल्यांचे संमतीन घेतलो.
काल (शुक्रारा) सकाळीं नगराध्यक्षा शुभांगी वायंगणकार हांचे अध्यक्षताये खाला पालिका मंडळाची खाशेली बसका जाली. ह्या वेळार उपनगराध्यक्ष चंद्रशेखर बेनकार, मुख्याधिकारी अमितेश शिरवयकार आनी नगरसेवक, नगरसेविका हाजीर आशिल्ल्यो. जाल्यार नारसेवक सुशांत हरमलकार, आनंद भाईडकार आनी नगरसेविका किशोरी आमोणकार गैरहाजीर आशिल्ल्यो.
कोर्ट जंक्शन ते जिल्हो हॉस्पिटल ह्या रस्त्यार सदांच गर्दी आशिल्ल्यान चलून वचपी लोकांक फावोशी वाट मेळना. ताका लागून येरादारीची कोंयडी जायत आसता. हे विशीं समाजीक कार्यकर्ते अॅड. क्लॉड अल्वारीस हांणी उच्च न्यायालयांत याचिका दाखल केल्ली. ते प्रमाण न्यायालयान म्हापशें पालिकेक सर्वोच्च प्राधान्याचेर ह्या रस्त्यार फुटपाथ उबारपाचे निर्देश दिल्ले. ते प्रमाण पालिका मंडळान खाशेली बसका घेवन वयलो थाराव एकमतान घेतलो.
खंडपिठाच्या निर्देशा उपरांत ह्या पुराय रस्त्याचें नगराध्यक्षा, मुख्याधिकारी, पालिका अभियंतो, पालिकेचे कायदो सल्लागार हांणी जोड पळोवणी करून फुटपाथ उबारपा विशीं सर्वेक्षण केल्लें. ते प्रमाण पालिका अभियंतो विभागान ह्या कामाचें अदमासपत्रक तयार केल्लें. हाचेर 3 कोटी 92 लाख 26 हजार 993 रुपया खर्च अपेक्षीत आशिल्ल्याची म्हायती प्रस्तावा वरवीं नगराध्यक्षा वायंगणकार हांणी बसकेंत दिली.
बसकेंत हो एकूच विशय पत्रिकेचेर चर्चा करतना नगरसेवक प्रकाश भिवशेट हांणी नगराध्यक्षांक ह्या कामाची अचूक म्हायती आनी रेखाचित्र दिवपी फायल मंडळा मुखार सादर करची अशी मागणी केली. ते प्रमाण नगराध्यक्षांनी अभियंत्या कडल्यान फायल मागोवन ती भिवशेट हांकां पळोवपा खातीर दिली.
हाचे पयलीं पालिका मंडळान कांय थाराव घेतना खूबशो चुको केल्यात. हाचो उपरांत नश्टो खर्च पालिकेक सोंसचो पडिल्ल्याचो दावो करून अशो चुकी परतून घडच्यो न्हय म्हूण दक्षता पाळची पडटा अशें भिवशेट हांणी स्पश्ट केलें.
ह्या वेळार नगरसेवक अॅड. शशांक नार्वेंकार हांणी ह्या अदमासपत्रकाचेर टिप्पणी केली. हो पट्टो 1.7 किमी इतलो आसून 3.92 कोटी खर्च कसो असो प्रस्न विचारलो.
सद्या जीएसआर आनी जीएसटीचे दर वाडल्यात. ताका लागून अदमाशी मोल वाडलां. तशेंच फुटपाथ उबारतना गटारांचें बांदकाम आनी अतिक्रमण हे विशय हाताळटले. हो अदमाशी खर्च सरकाराच्या तांत्रीक विभागा कडेन धाडून दितले अशी म्हायती तांणी दिली.
ह्या फुटपाथाचें काम प्रभाग 7 आनी प्रभाग 11 हातूंत जातलें. ह्या कामाचो मुखेलपणान ह्या दोन प्रभागांक फायदो जातलो. विशेश अनुदानांतल्यान फुटपाथाचें काम हातांत घेतले अशें नगराध्यक्षा वायंगणकार हांणी सांगलें.
म्हज्या प्रभाग पांचात अशे तरेचीं दोन कामां जावपाचीं आसात. हातूंतलें 700 मिटर अंतराचेर येवपी गटार आनी फुटपाथाच्या कामाचेर 27 लाख खर्च येतलो. पूण फुटपाथाच्या कामा खातीर 3.92 कोटी खर्च हें गणीत म्हजे तरी कल्पने भायलें आसा. हातूंत पारदर्शकताय नासून ह्या प्रस्नाचेर हांव कागाळ दाखल करतलों अशें नगरसेवक अॅड. शशांक नार्वेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
