भांगरभूंय | प्रतिनिधी
मडगांवां जाली कार्यावळ; बिरसा मुंडा जयंती निमतान अभिवादन
पणजी: केंद्र आनी राज्य पांवड्यार आदिवासी भावां खातीर विवीध येवजण्यो राबयतात. प्रधानमंत्री नरेंद्र मोदी देशांतल्या दरेक आदिवासी लोकां मेरेन पावून तांचे खातीर काम केलां. खऱ्या अर्थान ‘अच्छे दिन’ची सुरवात जाल्या अशें मुख्यमंत्री डॉ. प्रमोद सावंत हांणी म्हणलें.
बिरसा मुंडा जयंती निमतान आदिवासी आयोगा वतीन आयोजीत कार्यावळींत ते मडगांवां उलयताले. ह्या वेळार तांणी बिरसा मुंडा हांकां अभिवादन केलें. आपले 25 वर्सांचे जिणेंत तांणी व्हड काम केलां. फक्त आदिवासी समाजाकूच न्हय जाल्यार पुराय देशाक तांणी मार्ग दाखयलाे अशें तांणी म्हणलें.
आदिवासी कल्याण विभागा सयत, म्हामंडळ आनी आयोग खूब बरें काम करतात. म्हणून 800 आदिवासींक आयज मेरेन सनदी दिवप शक्य जालां. म्हजो कार्यकाळ सोंप मेरेन चडांत चड सनदी दितलों अशें आस्वासन तांणी ह्या वेळार दिलें.
गोंयांतल्या आदिवासींक आयोग आनी म्हामंडळाच्या माध्यमांतल्यान शिक्षण, उद्देग, अर्थकारणा सयत विवीध मळार सहकार्य करतले अशेंय तांणी म्हणलें. कार्यावळीक सभापती रमेश तवडकार, खेळां मंत्री गोविंद गावडे तशेंच आदिवासी कल्याण खात्याची संचालक त्रिवेणी वेळीप ह्या वेळार हाजीर आशिल्ल्यो.
आदिवासी प्रमाणपत्र घेवप म्हत्वाचें
केंद्र आनी राज्य पांवड्यार आदिवासीं खातीर आशिल्ल्यो खूबशो येवजण्यो तांचे मेरेन पावनात. कांय जाणांक तांचे कडेन आदिवासी आशिल्ल्याचें प्रमाणपत्र नाशिल्ल्यान ह्या येवजण्यांचो लाव घेवंक मेळना. ताका लागून जांणी हें प्रमाणपत्र घेतलें ना तांणी तें रोखड्या रोखडें घेवन विवीध येवजण्यांचो लाव घेवचो अशें आवाहनूय डॉ. सावंत हांणी केलें.
जमनी सांबाळूंक जाय
रान कायद्या खाला राज्यांतल्या आदिवासी भावांनी तांच्या जमनीचे हक्क दितात. पूण तांणी मेळिल्ल्यो जमनी सांबाळून दवरूंक जाय, जाल्यारूच आमची संस्कृती तिगतली. त्यो हेर कोणाकूय विकत जाल्यार सगलें सोंपून वतलें अशें डॉ. सावंत हांणी म्हणलें.
राजकी मतभेद विसरून समाजा खातीर एकठांय येवचें
आदिवासी समाजांतल्या ज्या नागरिकांक गोंयांतल्या येवजण्यांची म्हायती आसा. तांणी फुडाकार घेवन सरकाराक दरेका मेरेन ह्यो येवजण्यो पावोवपा खातीर मजत करूंक जाय. राजकी मतभेद विसरून समाजा खातीर सगल्यांनी हें काम करूंक जाय अशें मुख्यमंत्री डॉ. प्रमोद सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
