म्हारगायेचो उजो

भांगरभूंय | प्रतिनिधी

– इंंधन दरवाडीक लागून जिणेगरजेच्या वस्तूंच्या दरांत वाड

– तिकेट दरय वाडोवपाची खाजगी बस धनयांची मागणी

– इंंधन दरवाडीक लागून सामान्यांच्या बोल्साक खार

पणजी : पेेत्रोल आनी डिझलाचे दर दोन सप्तकांत चार खेपे वाडिल्ल्यान सामान्यांंक फटको बसला. इंंधन दरवाडीक लागून भाजयांं सयत हेर जिणेगरजेच्या वस्तूंंचे दर वाडटलें. डिझेल दरवाडीक लागून तिकेट दर वाडोवपाची मागणी खासगी बस धनयांंनी केल्या. दुदाचे दर वाडपा सयत हॉटेलांतली रायस प्लेट लेगीत म्हारग जाल्या. दरवाडी उपरांत राज्यांत पेत्रोल 103.91 रूपया जाल्यार डिझल 95.80 रूपया लिटर जालां. स्पीड पॅत्रोलाचो दर 113.52 रूपया आसा.

अस्तंंत बंंगाल, केरळ, तमीळनाडू ह्या राज्यांंतल्या विधानसभा वेंचणुके उपरांत केंंद्र सरकारान पेत्रोल आनी डिझेलाचे दर वाडोवपाक सुरवात केली. सगल्यांत पयली दरवाड 15 मेक दिसा जाल्ली. पेत्रोल आनी डिझेलाचे दर 3 रूपयांंनी वाडयिल्ले. हे दरवाडी उपरान गोंयांत पेत्रोलाचो दर 99.50 जाल्यार डिझेलाचो दर 91.25 रूपया जालो. हाचे उपरांत 19 मेक पेत्रोल आनी डिझेलाचे दर 90 पयशांनी वाडयले. उपरांत 23 मेक पेत्रोलाचो दर 87 पयशें जाल्यार डिझेलाचो दर 91 पयशांनी वाडयलो. पेत्रोल, डिझेलाचे दर वाडत आसतना आयज सोमारा पेत्रोलाचे दर 2.61 रुपया जाल्यार डिझेलाचो दर 2.71 रूपया वाडयला. सगळ्या दरवाडीची बेरीज केली जाल्यार पेत्रोल, डिझेल 7.5 रूपयांनी म्हारग जालां. आतां चडशे लोक दुचाकी वा चारचाकी घेवन भोंवतात. इंंधन दरवाडीक लागून सगळ्यांंच्या बोल्साक कातर बसतली.

हेर राज्यां परस सवाय

दरवाड जावन लेगीत हेर राज्यां परस गोंयांत पेत्रोल आनी डिझेल सवाय आसा. मुंबयंत पेत्रोल 111.20 रुपया जाल्यार डिझेल 97.80 रुपया लिटर जाला. बंगळूरूंत पेत्रोल 110.60 रूपया जाल्यार डिझल 98.50 रूपया जालां. तरी लेगीत हे दरवाडीक लागून म्हारगायेचो उजो तयार जाला.

आयतारा गोवा डेरीन दुदाचें दर वाडयले. एक लिटर दुदाचो दर 2 रूपया जाल्यार अर्द लिटर दुदाच्या पिशवेचो दर 1 रूपया वाडयलो. हाचे पयली अमुलान दुदाचो दर वाडयिल्लो. सगळ्या गोंयकारांंक सकाळीं उठल्या बरोबर चाय जाय पडटा. दुदाचो दर वाडिल्ल्यान आतां चाय लेगीत म्हारग जातली. हॉटेलांतली चाय 15 रुपया आसली तरी टपरी वा गाड्यांंचेर अजून चाय 10 रुपया मेळटा. दूद म्हारग जाल्यान टपरीवेल्या चाय खातीर चड पयशें दिवपाची तयारी आतां दवरपाक जाय.

बरेच गोंयकार सकाळीं चाय वांंगडा भाजीपाव खातात. जेवणांत कोबी, वालपापडी अशी भाजी लागताच. वालपापडीचो दर सध्या 160 रूपया कील जाला. टमाट 60, बटाट 50 अशा हेर भाजयांंचे दर लेगीत वाडल्या. डिझेल दरवाडीक लागून हेर भाजयांंचे दर वाडटले. बाजारा परस फलोत्पादन म्हामंंडळा वयल्या भाजयांंचे दर 15 ते 20 टक्के उणें आसता. डिझेलाचो दर वाडिल्ल्यान म्हाल येरादारीचो दर वाडटलो. डिझेलाचो दर आनीक वाडलो जाल्यार दरवाड करपा परस हेर पर्याय म्हामंंडळा मुखार आसचो ना, अशेंं फलोत्पादन म्हामंंडळाचे वेवस्थापकी संंचालक चंंद्रहास देसाय हांंणी सांंगलेंं.

बाजारात सध्या साखर 42 रुपया, तुरडाळ 120, फोव 60, रवो 44, बेसन 100, भिकणा तेल 146, मसुर डाळ 95, चणे 68 रुपया कील आसा. हे दर सामान्यांंक परवडपा सारके नासतानाच डिझेलाक लागून ते आनीक वाडपाची शक्यताय आसा.

दूद, भाजी, कड्डणाचें दर वाडिल्ल्यान हॉटेलांतली रायस प्लेट म्हारग जाल्या. 100 रूपयांंक मेळपी रायस प्लेट 110 ते 120 रूपयांंचेर पावल्या. कुरमा भाजी तशेंच हेर पदार्थांचे दर लेगीत वाडपाची चिन्नां आसात.

प्रवास लेगीत जातलो म्हारग

सगल्यो खाजगी बशी डिझेलाचेर चलतात. फाटल्या दोन सप्तकात डिझेलाचो दर 7.5 रुपया वाडिल्ल्यान तिकेट दरवाडीची मागणी खाजगी बस धनयानी केल्या. सध्याच्या तिकेट दरांत बशी चलोवप परवडपाचे ना, अशें बसधनी संंघटणेचे सरचिटणीस सुदीप ताम्हणकार हांंणी सांंगलें. बस वेवसाय परवडना म्हूण बरेच जाणानी हो वेवसाय सोडून दिला. तिकेट दरवाडीची मागणी आमी सरकारा कडेन करतलें, अशें तांणी सांंगलें. हाका लागून बशीचो प्रवास लेगीत म्हारग जावपाच्या वाटेर आसा.