भांगरभूंय | प्रतिनिधी
म्हजी एक इश्टीण आसा. पयर उलयतां उलयतां एक विशय आयलो— पावसाचोच. कारण पावस ताच्या आवडीचो. “आतां पावस येतलोच दिसता,” अशें हांवें सट्ट करून म्हणलें. पूण त्याच उतरांक धरून तिणें वेगळेंच विधान केलें आनी म्हणपाक लागली, “छे… पावस पडटा आनी मागीर रोखडीच लायट वता.” हांव अजापीत जालों. पावसाचो मोग करपी मनीस अचानक अशें कशें म्हणपाक शकता?
आतां तिणें जें विधान केलें, तें पावसाक बेजारून काय लायटीक, तें कळपाक मात मार्ग नासलो. पूण कित्या खातीर म्हणलां हें समजपाक मेळटालें. सायबा! सुस्कार सोडून आतां म्हाकाय तशेंच म्हणचें पडटलें काय दिसपाक लागलां आनी ताका कारणूय आसा.
पयलें कारण म्हणल्यार कोलडें- नावेलीं घडिल्ली घडणूक. सेगीत दोन वर्सां फावट्यो मारून मारून बेजारिल्ल्या कोलडेंच्या नागरिकांनी मोर्च्या काडलो— वीज खात्याचेर. कारण आसलें, फाटलीं दोन वर्सां सावन ते लोक गाराणें घालतात आनी तें विजेच्या देवाक पावच ना. कसलें गाराणें? तर फाटलीं दोन वर्सां सावन हे लोक विजेच्या आपा-लिपाचो खेळ पळयतात. वाडिल्ल्या विजेच्या दरा प्रमाण ते बिल भरतातूच, पूण तरी लेगीत सारखी वीज मेळना. तांची मागणी आशिल्ली, नवो ट्रान्सफॉर्मर बसोवपाची. आतां मज्जा पळयात, वीज खातें म्हणटा ‘फंड ना’. आदीं आशिल्लो फंड वेळा खातीर फाटीं पडलो आनी ट्रान्सफॉर्मर बसोवपाक पयलीं निश्चित केल्ली सुवात वादाची थारली.
कितेंय आसूं, दोन वर्सां पासून नवी सुवात सोदपाक आनी नवो ट्रान्सफॉर्मर बसोवपाक फंड मेळोवपाक वीज खात्याक इतलो कारभार करचो पडटा जाल्यार मागीर कोणाक कितें म्हणपाचें? तशें पळोवपाक गेल्यार, सामके रस्त्या कुशीक ट्रान्सफॉर्मर बसोवन येरादारीक आडखळी निर्माण करपाक वीज खात्याक व्हडलेंशें कायंच दिसना. उदाहरण जाय जाल्यार आमच्या राय गांवांत येयात. चुकून दुचाकी वेलें नियंत्रण गेलें, जाल्यार रोकडेंच वचून ट्रान्सफॉर्मराक धपको दिवपाचो आनी मागीर…! आनी हांगा कोलड्याचो नागरीक म्हयन्याच्या म्हयन्याक बिलां भरता, पूण ताका वीज मेळना.
दुसरें कारण—दिवचलेची घडणूक. तशें पळोवपाक गेल्यार सद्याक ही गजाल प्रेरणादायक म्हणून सोशल मिडियाचेर व्हायरल जाता. पूण ताचे फाटली गंभीरताय मात जाय तितली व्हायरल जावंक ना. गजाल अशी की, कृष्णा नांवाच्या एका ज्येष्ठ नागरिकान स्वता जावन फुडाकार घेतलो आनी फाटलीं साबार वर्सां सावन नितळ करूंक नाशिल्लें गटार नितळ केलें. ताका भिरांत आशिल्ली पावसाळ्यांत हुंवार येवपाची, पयलीं येतालो तसो.
आतां ह्यो दोनूय गजाली सांगून हांव कितें सांगपाक सोदता, अशेंय कोणाकूय दिसतलें. कारण दोनूय गजाली सद्याच्योच दिसतात. दिसतल्याोच, कारण आमकां खंयचीय गजाल साद्या नदरेन पळोवपाची संवय जाल्या, जशें आमी पावसाळ्याक पळयतात तशें. हय तर, पावस झडपाक लागता—मागीर तो घशघश्यांनी आसूं ना जाल्यार पिरपिऱ्यांनी—रोखडीच घरांतली लायट वता. पूण तशें घडटा म्हणून आमी ते गजाली कडे सादेपणानूच पळोवपाचें काय कितें? ना. दोनूय गजालींतल्यान एकूच गजाल स्पश्ट जाता आनी ती म्हणल्यार प्रशासनाचें अपेस. आनी इतलें आसुनूय आमी म्हणटात ‘प्रशासन तुमच्या दारी’!
तशें पळोवपाक गेल्यार विजेचें आपालिपा आनी नितळकाय हे दोनूय मुद्दे दिसतात तितले सादे नात. पूण आमकां ते गंभीर दिसनात, कारण आमी बेजारल्यात आनी ते मुद्दे आमचे दीसपट्टे जिणेचे भाग अशें समजपाक लागल्यात. बेजारिल्ले नावेलींतले नागरीक सरळ वीज खात्याचेर मोर्च्या घेवन गेले आनी बेजारिल्लो कृष्णा आपले पिरायेचें पळयनासतना गटार साफ करपाक लागलो.
हांगा ‘एली विसेल’ ह्या फामाद लेखकाच्या विधानाचा उल्लेख करचोसो दिसता. तो म्हणटा—”केन्ना केन्नाय आमी अन्याय थांबोवपाक असकत पडूंक शकतात, पूण अन्याया आड आवाज काडपाक आमी केन्नाच असकत पडपाक जायनात.”
सद्या आमी असकत पडपाक लागल्यात आनी आमीच कित्याक, प्रशासनूय! प्रशासनाक विजेचे मीटर बदलपाची धांवपळ करप व्हडलेंशें त्रासदायक दिसना, पूण दोन वर्सां पासून विजे खातीर तळमळपी नागरिकांचे त्रास मेकळे करपाक गंभीरताय दाखोवप तांकां पट्ट ना. व्हडलीं व्हडलीं पुलां बांदून आमकां मिरोवपाक आवडटा, पूण एका ज्येष्ठ नागरिकाचेर हातांत खोरें घेवन तुंबलिल्लें गटार उस्तिपाची पाळी येता, तेन्ना आमचें प्रशासन संवेदनशीलता दाखयना.
हाचो अर्थ ‘पावस पडटा आनी मागीर रोखडीच लायट वता’ असोच जालो ना? डिजिटल मीटर बसोवपाच्या विकासा कडेन पाविल्ल्या आमच्या राज्यांतल्या नागरिकांक विजे खातीर वर्सांच्या वर्सां मेरेन त्रास सोंसचे पडतात, हाचे परस व्हडलें दुख्ख आनी कसलें आसपाक शकता? पंचायती पासून पालिके खातीर लाखांनी रुपया राखून दवरिल्ले आसतनाय, बेजारिल्ल्या आनी स्वता फोंडांत वचपाचे दीस मेजपी एका ज्येष्ठ नागरिकाचेर जर गटार नितळ करपाची पाळी येवं येता, जाल्यार मागीर बेजारून ‘छे…’ म्हणपा बगर आनीक दुसरें उतर खंयचें आसत?
केन्नाय अशे तरेचे मुद्दे आनी घडणुको नियाळून मनांत तिडकूय येता. ती येवपाकूच जाय. पूण ही तिडक सगळ्यांकूच आयिल्ली जाल्यार आयज वेगळें चित्र आसपाचें. आयज तशें चित्र पळोवपाक मेळना. केन्नाय आमी बेजारतात आनी तिडकतातूय बी, पूण मागीर ताचे पलतडी वचपाचें आमकां धाडस जायना. पूण नावेलीच्या नागरिकांनी आनी दिवचलच्या कृष्णाक तशें केलें ना. त्यांनी धाडस केलें म्हणूनच तर तें गटार नितळ जालें. वीज खात्याच्या कार्यालया भायर निदर्शनां केलीं म्हणूनच दोन वर्सां पासून न्हिदून आशिल्लें वीज खातें एका ट्रान्सफॉर्मरा खातीर आतां तरी जागें जालें. बेजारले म्हणून विशय मेकळो जायना, त्या खातीर ‘कृती’ जाय पडटा. ती कृती करपाचें धाडस हालीं सराक कमी जावपाक लागलां. ताका घडये साबार कारणांय आसूं येतात. पूण एक मात खरें, आमच्या समाजाचें चित्र दिसता तितलें सोबीत ना.
हय, ते खातीर फकत नागरीकूच जापसालदार अशेंय ना, प्रशासनूय तितलेंच गुन्यांवकारी आसा. म्हणूनच पाळी आयल्या ती ‘छे’ म्हणपाची. कितेंय केलें म्हणून कायंच जावपाचें ना, अशी आमची आनी आमच्या समाजाची स्थिती जाल्या. कितें चल्लां ताची वीट आयल्या. सारकेंच.
पूण पावस पडना म्हणून लायट आसतली अशेंय ना. आमच्या प्रशासनाची काणी ही—डिजिटल प्रशासनाची काणी. छे…!
मार्कोस गोन्साल्वीस
7083776106
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
