भांगरभूंय | प्रतिनिधी
भांगरभूंय । प्रतिनिधी
पणजीः आनीक सोंसू नेजो (इनाफ इज इनाफ) हे चळवळी खाला गोंय घटक राज्य दिसा निमतान पणजे आझाद मैदानाचेर महासभा घडोवन हाडटले. गोंयभर सावन लोकांनी एकठांय जावन हे सभेत गोंयां खातीर झगडपाची आपली तांक दाखोवची. हे बसकेत आमी आमचे सगळे राजकी पक्षाच्या अध्यक्षांक आपोवन आमच्या 10 मागण्यांच्या चार्टराक तेंको दिवपाचो उलो मारतले, अशी म्हायती न्या. फेर्दीन रिबेलो हांणी दिली.
आमी 30वेर गोंय घटक राज्य दिसा निमतान आजाद मैदानार एकठांय जातले आनी हें सभेत दोन विशय मांडटले.
आमी एक विधेयक सगळ्या राजकी पक्षाक दिल्ले. उपरांत हे विधेयक सगळ्या विरोधी पक्षांनी सभाघरांत मांडिल्ले. पूण फोंडें वेंचणुकेक लागून विधानसभा सोंपयली. देखून हे अधिवेशन बेगिनूच आपोवचे आनी विधेयकाचेर चर्चा करपाची मागणी हे सभेत जातली, अशें रिबेलो हांणी सांगलें.
दुसरो विशय 2022-23 वर्सा गोंय सरकारान हाडिल्ल्या तीन कायद्यांचो आसतलो. हातूंत कलम 39 अ रद्द करप, कलम 17 (2) आनी 17 (अ) भितर सुदारणा करप तशेंच गोंय जमीन महसूल कायद्यांत बदल करून शेत जमीनींची राखण करपाचो कायदो चालीक लावपांचेर मागणी जातली, अशें रिबेलो हांणी म्हणलें.
आमी कोलावाचे बसकेत सांगिल्लें, हो प्रांत कोंकणी लोकांचो. आमी खंयची भास उलोव मराठी, कोंकणी वा इंग्रजी, पूण निमणे आमी कोंकणी लोक. गांव हो कोंकणी लोकांचोच उरपाक जाय आनी आमचेच गांवात आमी भायले जावपाक जायनात, अशें मत रिबेलो हांणी मांडलें.
देशाचे दरेक प्रांतात भारताचे लोक प्रादेशीक वळख सांबाळटात तेच भशेन गोंयकारांनी आपली प्रादेशीक वळक सांबाळपाक जाय. गोंयकारांनी पयली खूब त्याग केल्यांत. त्रिस्तांव कुन्हा हांणी मुक्तीचो लढो सुरू करून गोंयाक भारताचो भाग केलो. जॅक सिक्वेरा हांणी ओपीनीयन पोल वरवीं गोंयाक अस्मिता दिली आनी कोंकणी चळवळी वेळार भास आनी प्रांत सांबळलो. आता आमी फुडाराक गोंय बदलपाक दिवचे नात, अशी शिटकावणी रिबेलो हांणी दिली.
भाजपा कार्यकर्त्यांनी भ्रश्टाचाराचेर आवाज काडचोः रिबेलो
स्वप्नेश शेर्लेकार हांचेर भाजप आनी अभावीपान कागाळी दाखल केल्यात. आमकां मेळिल्ले म्हायती प्रमाण हे कार्यकर्ते मुख्यमंत्र्याच्या घरातल्यांन भायर सरून दिवचले पुलीस स्टेशनार गेल्यात. जर तुमकां गोंया खातीर मोग आसा जाल्यार भ्रश्टाचार आड झगडात अशें कार्यकर्त्यांक सांगपाक सोदतां. कॅसीनो हे न्हंयेतल्यांन भायर वचपाक जाय म्हूण कायदो आसा. ते अजून मांडवीत कित्याक अशी जाप कार्यकर्त्यांनी मंत्र्याक विचारपाक जाय, असो सल्लो रिबेलो हांणी दिलो.
रिबेलो हांचे विश्वजीत राणेक आव्हान
परवानगी बगर बांदकाम करपी स्वताच्या कार्यकर्त्यांचेर नगर नियोजन मंत्री विश्वजीत राणे कसलीच कारवाय न करता आमच्या वांगड्यांक लक्ष करता. जे त्रास राणे हांणी कारापूर आनी केरीच्या लोकांक दिल्यांत ताचे आड घटनात्मक पध्दतीन कायदेशीर प्रक्रीये वरवीं आमी राणे हांचे आड लडो दिवन तांकां उक्ताडार हाडटले, अशी शिटकावणी न्या. फेर्दीन रिबेलो हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
