भांगरभूंय | प्रतिनिधी
माक वचपी मनीस नाश्तो आनी रातचें जेवण घरा करता. पूण ताचें दनपारचे जेवण मात चड करून खानावळींत जाता. सकाळीं एक म्हळ्यार भायर सरपाची गडबड आनी दुसरें म्हणल्यार थंड जाल्लें जेवण जेवपाक गोंयकारांक आवडच ना. गरम गरम शीत-कडी आनी भाजलेल्या नुस्त्याची याद लेगीत येयल्यार तोंडाक उदक सुटपाक लागता. केन्ना काय लंच ब्रेक जावचो आनी जेवणाचेर ताव मारचो अशें जाता.
हालींसराक झुजाक लागून गॅस मेळप कमी जालां, तशेंच दर लेगीत वाडल्यात. ताका लागून खानावळींनी जेवणाचेर लेगीत वीस तीस रुपया वाडलेले पळोवपाक मेळटा. बिल दिवपाक गेल्ले कडेन वाडलेले पयशे लक्षांत येतात. शेवटाक पयशे ते पयशे, वीस रुपया चड वचप म्हणल्यार लेगीत हुस्क्याचो विशय. तसो विचार केलो जाल्यार खानावळीच्या जेवणाचे दर हे वाडपाक खूब कारणां आसतात. पंदरा वर्सां पयलीं 70- 80 रुपयांक मेळपी जेवण आयज 150 रुपया जालां. पूण घरचें जेवण मात तशेंच आसा, तें कशें काय ? जेवणाची चव आनी प्रमाण तितलेंच आसून लेगीत आमकां तें तेच दरान मेळटा म्हळ्यार कोणतरी आमचे पयशे फारीक करता. ते मागीर कॅश रुपान जावं वा आनी कसल्याय.
आमी घरच्या जेवणाचेर केन्नाच चड विचार करनात. ताट वाडून फुड्यान पावता, आमी सुशेगात जेवता आनी उपरांत न्हिदपाक वयतात, पयशे दिवचे पडनात. तें जेवण तयार करपाक लागपी कश्ट आईन वा बायलेन घेतलेले आसता. आमी ताचें गणीत केन्ना करपाकच वचना. ते भायर खानावळीचें जेवण आनी घरच्या जेवणांत खूब फरक आसता. घरचें जेवण खूब मोगान केल्लें आसता. कसली कडी आपल्या चल्याक आवडटली, कसली भाजी घोवाक बरी लागतली वा कसलें नुस्तें आपल्या भावाक जाय आसतलें हाची जतनाय घेवन जेवण तयार केल्लें आसता. मागीर हें जेवण सवाय कशें आसूंक शकता? घरचें जेवण खूब म्हारग आसा. फक्त तें आमकां दिसना वा आमी पळोवपाक कमी पडटात.
सर्वेश मळकर्णेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
