भांगरभूंय | प्रतिनिधी
आमच्या देशांत कुटुंबां विभक्त जातात. तांतल्यान भुरग्यांचे उदरगतीचेर अनिश्ट परिणाम जातात ताचेर ह्या दिसा विचार जावंचो.
अायज 15 मे. संसारीक कुटुंब दीस. 2026 वर्साच्या या दिसाची संकल्पना जावन आसा, ‘कुटुंब, असमानताय आनी भुरग्यांचें कल्याण’. कुटुंबांत वाडत वचपी दरी कुटुंब जिणेक कशी अनिष्ट आकार दिता आनी भुरग्यांच्या फुडाराचेर कशी वायट परिणाम करता हाचेर ते वरवीं भर दिला. ही विसंगती उणी करपाक आनी भुरग्यांचे भलायकेन उदरगतीक आदार दिवपा खातीर एकत्रीत, कुटुंब- प्रधान धोरणांत चड घटमूट गुंतवणूक करपाचो उलो मारला.
समाजीक आनी अर्थीक प्रगतींत कुटुंबां केंद्रस्थानी आसात, तरी लेगीत जायत्यांक उत्पन्नाची असुरक्षीतताय, मर्यादीत काळजी घेवपाचो आदार आनी गरजेच्या सेवांचो असमान मेळ हांकां तोंड दिवचें पडटा. फावो तो आदार नासतना ल्हान भुरगीं आशिल्ल्या कुटुंबांक गरिबीचो चड धोको आसता, जाचो भुरग्यांचे भलायकी, शिक्षण आनी एकंदर कल्याणाचेर कायम परिणाम जाता. उत्पन्नाची अस्थिरताय, काळजी घेवपाचो मर्यादित आदार आनी सेवांची मर्यादीत उपलब्धता भुरग्यांच्या विकासाक आडमेळीं हाडूंक शकतात, खास करून जेन्ना लिंग, वंशीक, स्थलांतरीत वा अपंगत्व आदारीत असमानताय वाडटा.
समाजीक संरक्षणाची गरज
ह्या वाठारांत जागतीक विसंगती वाडत वता तशी ह्या वर्साच्या दीस मनवणे निमतान येणावळ, शिक्षण, भलायकी, डिजिटल प्रवेश आनी भुरग्यांच्या जिणेच्या संद आकार दिवपी गरजेच्या सेवांच्या उपलब्धतायेचेर भर दितले. कुटुंबाची लवचिकताय घटमूट करपाक, गरिबी उणी करपाक आनी समान संद वाडोवपाक एकत्रीत समाजीक संरक्षण प्रणालींची गरज आसा. भुरग्यांची जतनाय आनी सुरवातीच्या शिक्षणाची गरज हांचेर भर दितले.
तशेंच वांगडी देश, संयुक्त राष्ट्र संघटनेच्यो संस्था आनी नागरी समाज हांचे मदीं संवाद सादपाक, बऱ्या धोरणात्मक पद्दतींचेर भर दितले आनी 2030 वर्साच्या अजेंडाच्या संदर्भांत असमानताय प्रवृत्ती आनी धोरणात्मक उपायांची तपासणी करपी, नवो संशोधन वावर सुरू करतले.
फाटभूंय
1980 च्या दशकांत संयुक्त राश्ट्रांनी कुटुंबा संबंदीत प्रस्नांचेर लक्ष केंद्रीत करपाक सुरवात केली. 1983 वर्सा अर्थीक आनी समाजीक परिशदेच्या शिफारशींच्या आदाराचेर समाजीक उदरगत आयोगान उदरगत प्रक्रियेंत कुटुंबाची भुमिका (1983/ 23) ह्या थारावांत सरचिटणीसाक विनवणी केली की, निर्णय घेवप्यांक आनी भौसाक कुटुंबाच्या समस्यां विशीं आनी गरजे विशीं जागृताय वाडोवपाची, तशेंच गरजो भागोवपाचे प्रभावी मार्गां विशींची जाणविकाय वाडोवपाची विनवणी केली.
29 मे 1985 दिसा परिशदेन आपल्या एकेचाळीसाव्या अधिवेशनाचे तात्पुरते कार्यावळींत ‘उदरगत प्रक्रियेंतलीं कुटुंबां’ असो मुद्दो विचारांत घेतलो. उपरांत समाजीक उदरगत आयोगाचे 30 वे फेरयेच्या अधिवेशनांत तयार केल्ल्या शिफारशींच्या आदाराचेर आमसभेन सगळ्या देशांक कुटुंबाचें आंतरराश्ट्रीय वर्स जाहीर करपा विशीं आपले विचार जाहीर करपाक आनी आपलीं टिप्पणीं, प्रस्ताव मांडपाक आपयले.
9 डिसेंबर 1989 दिसा दिल्ल्या 44/ 82 थारावांत आमसभेन ‘द इंटरनॅशनल इयर ऑफ द फॅमिली’ अशें जाहीर केलें.
1993 वर्सा सार्वत्रिक सभेन थारावांत (ए/ आरईएस/ 47/ 237) दर वर्साच्या 15 मे दिसा ‘द इंटरनॅशनल डे ऑफ फॅमिलीज’ असो निर्णय घेतलो. कुटुंबां संबंदीत प्रस्नां विशीं जागृताय वाडोवपाची आनी कुटुंबांक परिणाम करपी समाजीक, अर्थीक आनी लोकसंख्याशास्त्रीय प्रक्रियांचें गिन्यान वाडोवपाची संद ह्या दीसा वरवीं मेळटा.
आमच्या देशांत कुटुंबां विभक्त जातात. तांतल्यान भुरग्यांचे उदरगतीचेर अनिश्ट परिणाम जातात ताचेर ह्या दिसा विचार जावंचो.
प्रकाश वा. कामत
9422443093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
