शिक्षकांनी विद्यार्थ्यांक आत्मनिर्भर करचें

भांगरभूंय | प्रतिनिधी

गुरुर्ब्रह्मा गुरुर्विष्णुः गुरुर्देवो महेश्वरः ।
गुरुः साक्षात् परब्रह्म तस्मै श्रीगुरवे नमः ।।
गुरु हो ब्रह्मा, विष्णू आनी महेश ह्या तिनय देवांचें रूप जावन आसा. अशा गुरूंक नमस्कार.
शिक्षक हो समाजाचो खरो शिल्पकार. शिक्षकी वेवसाय ही नोकरी नासून समाजाची सेवा आसा हें जण एका शिक्षकान जाणां जावंक जाय, आनी उपरांतूच या क्षेत्रांत भितर सरपाक जाय. चड पगाराचे आशेन आनी एका आदेसाची नोकरी आनी भरपूर सुटयो वा काय ना बेकार रावचे परस, जावया शिक्षक हें चिंतून कोणें शिक्षक जावचो न्हय. मना पसून आवडीन शिक्षक जावचो अशें म्हजें प्रामाणीक मत.
शिक्षक हो विद्यार्थ्यांचो फुडार घडोवपी आसूंक जाय. विद्यार्थ्यांच्या फुडारा कडेन शिक्षकान खेळ मांडपाक जायना. एक बरो शिक्षक समाज घडोवंक शकता, पूण एक चुकीचो शिक्षक पिळग्यांच्यो पिळग्यो बरबाद करूंक शकता. म्हणून शिक्षकान सदांच प्रामाणीक, कर्तव्यदक्ष, आनी आदर्श व्यक्तीमत्त्व जपपाक जाय. शिक्षक हो विद्यार्थ्यांचे जिणेक दिशा दिवपी आनी विद्यार्थ्यांच्या फुडाराक आकार दिवपी महत्वाचो घटक. शिक्षक कसो आसचो ताचे परस कसो आसचो न्हय हें सांगप चड गरजेचें. शिक्षक हो निश्काळजी, बेजबाबदार आसूंक जायना. टायमपास करपी, चारित्र्यहीन आसूंक जायना. अभ्यास सारको शिकोवप ना. बेशिस्त, कामचुकारपणा करपी, फटींग, बेरड कसो
शिक्षकान भेदभाव करूंक जायन. श्रीमंत-गरीब, हुशार-कमकुवत, रागीट आनी अपमान करपी शिक्षक विद्यार्थ्यांच्या मनांत भंय निर्माण करपी आसूंक जायना.
जण एका शिक्षकान “तकलेंत शाळां आनी शाळेंत तकली” घातल्यारूच परिवर्तन घडून येतलें. नाजाल्यार समाज, आनी शासन सगल्याच मळाचेर शिकक्षकांकूच जबाबदार धरतले. गजाल खरी आसा. मुखेलमंत्र्यांनी वक्तव्य केला तें 100% बरोबर आसा. कांय शिक्षक दोशी आसातूय जे फक्त पगारा खातीर नोकरी करतात. कांय शिक्षक प्रमाणीकपणान, निश्ठेन आनी जबाबदारीन काम करतात हातूंत इल्लोय दुबाव ना. पूण…. कोणाच्या तरी कामचुकारपणाक लागून सरसकट शिक्षकांक आयकुचें पडटा तेन्ना वायट दिसता.
पूण…. शिक्षकांक कोणें समजून घेतला व्हय? शिक्षक फक्त अभ्यासक्रमूच पुराय करिना तर शिक्षकांक शिकोवपा बराबरूच शासनाच्या वेगळ्या वेगळ्या प्रकारचीं कामां करचीं पडटात. ह्या कामां खातीर शिक्षण प्रक्रियेचेर बरोच परिणाम जाता. देखीक वेंचणुकेचीं कामां, मतदान अधिकारी, मतदान केंद्र वेवस्थापन, मतदार वळेरी तपासणीं, मतमोजणी काम, जनगणना काम, लोकसंख्या नोंद, घर-घर सर्वे, म्हायती संकलन, आधार कार्ड / वळखपत्र संबंदीत काम, विद्यार्थ्यांची म्हायती पडटाळणी, नोंदणी सहाय्य, शासकी सर्वे, समाजीक सर्वे, अर्थीक सर्वे, शिक्षणीक सर्वे, भलायकी भोंवडी, लसीकरण भोंवडी, भलायकी तपासणी शिबीर, पोशण अभियान, मध्यान्ह भोजन येवजण काम,अन्नधान्य नोंद, गुणवत्ता तपासणी, उपस्थिती व अहवाल, शाळा शिश्यवृत्ती काम, विद्यार्थ्यांची म्हायती अपलोड, अर्ज तपासप,ऑनलायन म्हायती भरप, UDISE डेटा, परिक्षा म्हायती, विद्यार्थ्यांचे पोर्टल अपडेट, आपत्ती वेवस्थापन काम, पावसाच्या हुंवाराची परिस्थिती सर्वेक्षण, मजत केंद्र वेवस्थापन, समाजीक जागृती अभियान, स्वच्छता अभियान, मतदान जागृती, पर्यावरण भोंवडी, शालेय पोशण आनी भलायकी अहवाल, हिमोग्लोबीन तपासणी म्हायती, विद्यार्थ्यांची भलायकी रेकॉर्ड, विवीध शासकी येवजण्यांची अंमलबजावणी, विमाे येवजण म्हायती, बँक खातें तपासणी परिक्षा संबंदीत अतिरिक्त काम, पेपर तपासणी, केंद्र वेवस्थापन, ऑनलायन गूण नोंदणी, सांस्कृतीक आनी सरकारी कार्यावळ, प्रजासत्ताक दीस, स्वातंत्र्य दीस आयोजन, सरकारी सुवाळ्याची तयारी, स्नेहसंमेलन, खेळ, वनभोजन, पिकनीक, विगंड विगंड सर्ती, प्रकल्प, जल पकवडा, स्वच्छता पकवडा, पोशणमाह, तिथी भोजन, वेगळे वेगळे उपक्रम हीं सगलीं कामां करतना नकळटां शिक्षकांचेर अतिरिक्त ताण येता.
आनी हाकाच लागून शिक्षक कमी आनी सरकारी मानाय चड जावन पडला.
निमाणें शिक्षकूय हो मनिसूच. कोवीड काळांत बालवाडीचेंं कड्डण लेगीत जोखपाक शिक्षकांक लायलें. कारण शिक्षक ही नोकरी नासून सेवा आसा. हें मानून शिक्षक काम करीत आसात. सगलेच गजालीक शिक्षकांकूच जबाबदार धरप समा न्हय. इतलो सामकोच शिक्षक सवाय जाला व्हय?
बेकारी वाडटा हाका एकलोच पुरायपणान शिक्षकूच जबाबदार नासून पालक, समाज, तरणाटे आनी शासनूय तितलेंच जबाबदार आसा, हेंवूय आमी मान्य करपाक जाय.
इतलीं सगलीं कामां करूनय फाटलीं पांच वर्सा बोर्डाचो 10 वी 12 वीचो निकाल हो दोळे दिपकावपी आसा.
12 वे चो निकालः 2022 वर्सा 92.66%, 2023 वर्सा 95.40, 2024 वर्सा 85%, 2025 वर्सा 90.64, 2026 वर्सा 92.96.
तर फाटल्या पांच वर्साचो धावे चो निकाल हो असो आसाः 2022 वर्सा 92.75%, 2023 वर्सा 96.64, 2024 वर्सा 92.38, 2025 वर्सा 95.35, 2026 वर्सा 94.51.
हो निकाल पळयतकूच शिक्षणीक मळार व्हडली उदरगत जाल्या अशें म्हणपाक कांयच हरकत ना. पूण वास्तव वेगळेंच आसा. स्वताचें नांव आनी पत्तो धड बरोवंक कळनाशिल्लो विद्यार्थी आमचे परिक्षा पद्दतीक लागून सहज 10 वी 12 वी पास जाता. उपरांत कितें?
फक्त पुस्तकी गिन्यान दिवन जावचे ना ताका आत्मनिर्भर करपी शिक्षण दिवपाक जाय. ताका लागून शिक्षकान अपग्रेड जावपाक जाय. विद्यार्थ्यांक योग्य मार्गदर्शन दिवपाक जाय. समाजाचे उदरगती खातीर फक्त सरकाराचेर आंदण दवरिनसतना सर्वसामान्य लोकांनीय आपली जबाबदारी वळखून योगदान दिवप गरजेचें जावन आसा. शिक्षण क्षेत्राचें बाजारीकरण जाल्लें आसा.
आयज सरकारी शाळांची पटसंख्या राखपा खातीर शिक्षकांक पालकांच्या घरा कणकणीं भिकारी कशे भोंवचें पडटा. शिक्षण क्षेत्रांत जनभागिदारीक विशेश म्हत्व आसा. शाळा ही फक्त शिक्षक आनी विद्यार्थ्यांची मर्यादीत सुवात नासून तर ती समाजाचो केंद्रबिंदू आसा. पालक, ग्रामस्थ, आदले विद्यार्थी, समाजीक संस्था, स्वयंसेवी संघटणा आनी थळावे नेतृत्व हांणी शाळेच्या विकासांत सहभाग घेतल्यार शिक्षण वेवस्थेक बळ मेळटा.
8 वी मेरेन नापास करप ना ह्या कायद्याक लागून कोणूच भार घेना. विद्यार्थी बिनधास्त, पालक बिनधास्त, शिक्षक बिनधास्त, कोणाकूच कांयच पडिल्लें ना. मुळांत हो कायदोच रद्द जावपाक जाय. कांय शिक्षक अशें आसात जांकां समाजाचें कांयच पडिल्लें आसना. थोड्याचें अशें वर्तन आसता की ते शिक्षकी पेशाक लाशें कशे. नकारात्मक सोच. फक्त दुसऱ्यांचीं पाडेपणांच चिंतप, आपल्या सुवार्था खातीर सामक्या सकयल्या पांवड्यार लेगीत देंवता. खाल्ल्या पानार हळशीक करपी वृत्तीचे, स्टाफा भितर गट करून हेडमास्तरा आड, एखाद्या प्रामाणीक शिक्षकां आड कटकारस्थनां रचपाक माहीर आसतात. म्हायती मेळटा ते प्रमणा हेडमास्तराक कायमचो धडो शिकोवपाची भास करतात हें शिक्षकाक निखालस सोबना. ताचो परिणाम शाळेचेर पडटा. हें कित्याक जाता तर एकाच जाग्यार 25 वर्सां, 15 वर्सां 10 वर्सां उरिल्ल्या कारणान. शाळा, स्कूल तांचे बेंस जाल्ले वरी तें/तीं वागतात. सरकारांचें जांवय कशे.
आतां शिक्षणीक मळार 36 वर्सा उपरांत NEP आयल्या, पूण जो मेरेन माजिल्ल्या आनी मदांद शिक्षकांक, तालुक्याच्या तालुक्या भितर एकाच जाग्यार थपकल मारून बशिल्ल्या शिक्षकांचे रिशेफल जायना तो मेरेन परिवर्तन जावप मुश्कील आसा. खरें म्हणल्यार 5-5 वर्सांनी बदली जावपाक जाय. पूण जायना. ह्या शिक्षकांचे दर वर्सा प्रगती पुस्तक तयार करपाक जाय. ह्या माजिल्ल्या शिक्षकांचेर खर
कारवाय जावपाक जाय. जे केन्ना पेपर, पुस्तकां, वाचिनात, विचार मांडिनात, बरयनात, फक्त सिलेबस कंप्लीट करतात. समाजीक मळार खंयच दिश्टी पडनात हांकां कशे तरी शिक्षक म्हणप?
मुखेलमंत्र्यांच्या स्टेटमेंन्टाक रजांव आसा. आठवी मेरेन नापास करप ना, ह्या कायद्याक लागून सगलें घडटा. कांय राज्यांनी हो कायदो रद्द जाला आमचे कडेन केन्ना रद्द जातलो?

काशिनाथ नायक
9158345844