भांगरभूंय | प्रतिनिधी
रस्त्याच्या दोनूय वटांनी रसरशीत फुलांनी फुलिल्लो गुलमोहर पळोवन प्रवास सुखमय जाता.
उप्परवाला देता है तो छप्पर फाडके देता है हें पद तुमी आयकलांच आसतलें. आमचो सोबीत सैम आमकां सगळें भरभरून दिता. व्हड- व्हड रूख, विंगड- विंगड झाडां- झुडपां आनी वेलीं वरवीं तो आमकां रुचीक फळां आनी परमळीक फुलां दिता. आमच्या आंगणांतल्या तरेकवार फुलांक पळोवन मन धादोसपणान नाचूंक लागता. पयल्या पावसांतलीं फुलां देवाक ओंपतात आनी मागीर तीं बायलां आपल्या माथ्यार माळटात. आमच्या दाराच्या आसपास व्हडलीं झाडां आसप बरें. तांची थंडगार सांवळी आनी झुळझुळ वाऱ्याचीं ल्हारां काळजाक थंडाय दितात आनी मन प्रसन्न करता.
मार्च ते मे म्हयन्या मेरेन उश्णतायेचो सामको तडाखो बसता. ह्या दिसांनी दाट पानांचीं झाडां घरा लागीं आसप म्हणल्यार एक तरेचें वरदानच. ती सैमाची मोलादीक देणगीच. झाडां लायलीं आनी आमचें काम जालें, अशें समजप सामकें चुकीचें. तांकां वेळच्या वेळार उदक, सारें आनी माती घालून तांची राखण करप ही आमची व्हडली जापसालदारकी. मागीरच तीं गरगरीत बहरतात आनी आमकां फळां-फुलां दितात.
सैमान दिल्ल्या वरदानांतलें एक ओडलायणें झाड म्हणल्यार ‘गुलमोहर’. पळोवपाक हें झाड सामकें सोबीत दिसता. मूळचें विदेशी आसलें तरी ताचीं फुलां सुंदर आनी रंगीबेरंगी आसतात. गरमेच्या दिसांनी तीं फुलतात आनी तांची सोबीतकाय दिसांदिस वाडत वता. तांबड्या, गुलाबी आनी हळडुव्या फुलांनी भरिल्लो गुलमोहर येवपी- वचप्यांचें मन भुलयता. ताच्या पाकळ्यांचो आकार हेर फुलां परस वेगळो. गुलमोहराक पळोवन कितल्याशाच साहित्यिकांनी, कवींनी पदां रचल्यांत. हें झाड पळयतकच प्रेमी युगुलांक एकमेकांची याद येता. ‘देवता’ सिनेमांतलें तें फामाद पद— ‘गुलमोहर गर तुम्हाला नाम होता, मौसम-ए-गुल को हसाना भी हमारा काम होता’, सहज ओठांचेर येता. मोग करपी चड करून ह्याच झाडा मुळांत बसून आपलो मोग व्यक्त करतात.
रखरखीत वतांत लेगीत हें झाड झेतांत उबें आसता. रस्त्याच्या दोनूय वटांनी रसरशीत फुलांनी फुलिल्लो गुलमोहर पळोवन प्रवास सुखमय जाता. ताच्यो नाजूक पाकळ्यो आनी तांबड्या फुलांचे लांबच लांब घोस पळयल्यार सगळो वाठार तांबडो-रगत कसो दिसता.
एप्रिल म्हयन्यांत गुलमोहराक फुलां येवपाक सुरवात जाता. पावसाचे पयले दडकेन ताच्यो कळयो ल्हवूच तोंड उकतें करतात. रखरखीत उजवाडांत तांबड्या, धव्या आनी केशरी रंगाचीं फुलां झाडाचेर अशी गर्दी करतात, जणू कांय सैमान सोबीत सत्री फुलयल्या! जरी ह्या फुलांक वास नासलो, तरी तांची ओड सगळ्यांक आसा.
ह्या झाडाच्या पाकळ्यांचो शिंताडो जेन्ना जमनीर पडटा, तेन्ना तें दृश्य खूब ओडलायणें दिसता. जणू कांय जमनीर इंद्रधनुष्यच देंवलां, असो भास जाता. मोग करपी ह्या पाकळ्यांच्या सड्यार बसून एकमेकांचेर फुलां उडयतात आनी संवसाराक विसरून मोगांत बेधुंद जातात.
गुलमोहर आनी पावसाचें एक खाशेलें नातें आसा. मे म्हयन्यांत जेन्ना गुलमोहर फुलता, तेन्ना पावस येवपाची ती एक खूण मानतात. गुलमोहराचीं तांबडी- केशरी फुलां पळोवन मनाचो ताण पयस जाता. मनाक खोस मेळटा आनी मोगाचो रंग ह्या झाडाक लागून आनीकच सुंदर दिसता.
खरेंच, गुलमोहराचें झाड अतिसुंदर! ताचीं आकर्षक फुलां आनी नाजूक पाकळ्यो बायलांच्या केसांत माळपाक तर एकदम फावोशो. एप्रील- मे म्हयन्यांतली गुलमोहराची ही सोबीतकाय खरोखरच वेगळी आनी अविस्मरणीय अशी.
– सिद्धी तिळवे
7972535321
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
