भांगरभूंय | प्रतिनिधी
पणजीः गोंय राज्य सहकार युनियनाच्या दूद सहकार सोसायटीचे वेंचणुकेंत कोंफुसांव तयार जालां. ह्या सोसायटीच्या संचालक पदा खातीर अर्ज केल्ले विजयकांत गांवकार आनी शिवानंद पेडणेंकार हे पयली अपात्र थारयल्यात. देखून अपात्र थारिल्ल्यांक परतून वेचणुकेंक रावपाक मेळना असो युक्तीवाद विरोधी उमेदवार करतात. हे विशींचो आक्षेप निर्वाचन अधिकाऱ्यांक धाडला आनी आयज निर्वाचन अधिकारी कितें तो निर्णय घेतेल हाचेर सगल्यांचें लक्ष लागून आसा.
गोंय राज्य सहकार युनियन लिमिटेड हांणी विवीध सहकार क्षेत्रांतल्या 12 पदां खातीर वेंचणूक आपयल्या. हातूंत दूद सहकारी सोसायटी खातीर दोन संचालक पदांचेर वेंचणूक जातली. उपरांत हे सगले संचालक युनियनाचेर अध्यक्षाची नेमणूक करतले.
ह्या दोन संचालक पदां खातीर चार उमेदवार रिंगणात आसात. तातूंतले विजयकांत गांवकार आनी शिवानंद पेडणेंकार हे गोवा डेरीच्या संचालकपदार आसतना सहकार निबंधकान तांकां 21 एप्रील 2023 दिसा अपात्र थारयिल्ले. पूण तांणी निबंधकाच्या आदेशाक उच्च न्यायालयांत आव्हान दिल्लें. पूण उच्च न्यायालयान हो निबंधकाचो निवाडो राखून दवरलो. उपरांत तांणी सर्वोच्च न्यायालयांत धांव घेतली पूण थंयसर तांची याचिका भायरायली.
सहाकर क्षेत्राच्या नेमा प्रमाण एकदां अपात्र थारले उपरांत त्या मनशाक परतून संचालकपदाचेर वेंचणुके खातीर उबे रावपाक कायम स्वरुपी बंदी आसाता. पूण अपात्र थारिल्ले गांवकार आनी पेडणेंकार हांणी ह्या नेमाचें उल्लंघन करून युनियनाच्या दूद सहकारी सोसायटीच्या संचालकपदाचे वेंचणुके खातीर अर्ज केल्यात.
सद्या वेंचणूक प्रक्रिया सुरू आसा आनी गांवकार आनी पेडणेंकार हांचे विरोधांत तांचे परस्पर उमेदवारांनी निर्वाचन अधिकाऱ्यां कडेन आक्षेप दाखल केला. आयज पारखणीचो तिसरो आनी निमाणो दीस. गांवकार आनी पेडणेंकार हांचे आड आक्षेपा विशीं निर्वाचन अधिकारी कितें निर्णय घेता हाचेर सगल्यांचें लक्ष लागून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
