भांगरभूंय | प्रतिनिधी
पणजी: दुबावीत आनी पिडीत चलयेचे पिरायेंत व्हड अंतर आसा. तशेंच दुबावीत लग्न जाल्लो आसून ताका तीन भुरगीं आसात. मजगतीं प्रकरण सद्या मुळाव्या पांवड्यार आसा आनी न्यायालयान पिडीत चलयेचो जबाब अजून नोंद केल्लो ना, अशें निरिक्षण नोंद करून मेरशी हांगासरल्या पॉक्सो न्यायालयान बार्देस म्हालांतल्या 17 वर्सां पिरायेचे चलयेचेर लैंगीक अत्याचार केल्ल्या प्रकरणांत 34 वर्सां पिरायेच्या दुबाविताचो जामीन अर्ज भायरायलो. हे विशींचो आदेश न्या. पुजा कवळेंकार हांणी दिलो.
ह्या प्रकरणांत पर्वरी पुलिसांनी 3 फेब्रुवारी 2026 दिसा गुन्यांव दाखल केला. तेप्रमाण 17 वर्सां पिरायेच्या पिडीत चलयेच्या सोयऱ्यांनी फेब्रुवारी 2026त कागाळ दाखल केल्या. तातूंत दुबावितान 1 जुलय 2025 ते 3 फेब्रुवारी 2026 ह्या काळांत तरणाटे कडेन इश्टागत करून संबंद प्रस्तापीत केले. उपरांत तिचो गैरफायदो घेवन विवीध सुवातांनी व्हरून तिचेर लैंगीक अत्याचार केले. तशेंच दुबावितान पिडीत चलयेचे फोटे आपल्या मोबायलार दवरले आनी उपरांत तिका लैंगीक सुखा खातीर ब्लॅकमेल केल्ल्याचें कागाळींत म्हणलां.
हाची दखल घेवन पर्वरी पुलिसांनी दुबाविता आड भारतीय न्याय संहितेच्या कलम 64,74,351(2) आनी बाल लैंगीक शोशण विरोधी कायदो (पॉक्सो) कलम 4 आनी 12 खाला गुन्यांव दाखल करून अटक केली. उपरांत न्यायालयान दुबाविताक पयलीं पुलीस कोठी दिली. ती सोंपले उपरांत ताची रवानगी न्यायालयीन कोठयेंत केली.
ह्याच वेळार पुलिसांनी तपास पुराय करून पॉक्सो न्यायालयांत दुबाविता आड आरोपपत्र दाखल केले. उपरांत दुबावितान न्यायालयांत जामीन अर्ज दाखल केलो. ह्या प्रकरणांत न्यायालयांत सुनावणी जाली तेन्ना, न्यायालयान वयलें निरिक्षण नोंद करून दुबाविताचो जामीन अर्ज भायरायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
