भांगरभूंय | प्रतिनिधी
पणजी : कळंगुट – बागा वाठारांत अतिक्रमण केल्ली शॅकां तशेंच हेर बांदकामांचेर कारवाय करपाक पर्यटन खात्यान सुरवात केल्या. मंगळारा पुलीस बंदोबस्तात जे शॅकांनी अतिक्रमण केल्ले, तो मोडूनउडोवपा सुरवात केली. उच्च न्यायालयाच्या आदेशा प्रमाण कारवाय सुरू आसा, अशी म्हायती पर्यटन खात्याच्या अधिकार्यांनी दिली.
मिनीनो फर्नांडीस हांचे जनहीत याचिकेचेर मुंबय उच्च न्यायालयान कळंगूट, बागा वाठारांतल्या अतिक्रमणांचेर कारवाय करपाचे आदेश दिल्ले.
कळंगुट – कांदोळी दर्यादेग वाठाराचेर ७० जाणांनी अतिक्रमण केलां, अशी म्हायती हाचे पयलीं पर्यटन संचालकांनी उच्च न्यायालयाक दिल्ली. कारवाय करपा विशीं तांकां नोटीसो लेगीत जारी केल्यो. उपगिरो तंत्रज्ञानाच्या मजतीन कांदोळी – कळंगुट वाठाराच्या १२ भागा मदीं ३ भागांचे सर्वेक्षण पुराय जालां. हेर भागांचें सर्वेक्षण पुराय जाले उपरांत फुडलीकारवाय जातली.
सर्वेक्षण संचालनालयान ५ सप्टेंबर २०२२ हे दिसा कांदोळी आनी कळंगुट दर्यादेगेचे सर्वेक्षण केल्लें. सर्वेक्षण केल्या उपरांत लेगीत दर्यादेग तशेंच सरकारी जाग्याचेर अतिक्रमण सुरू आसा. ह्या अतिक्रमणांचेर कसलीच कारवाय जायना, असो दावो करीत मिनीनो फर्नांडीस हांणी जनहीत याचिका दाखल केल्या. हे जनहीत याचिकेचेर सुनावणी जावन कारवायेचो आदेश जारी जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
