भांगरभूंय | प्रतिनिधी
न्यायालयान दिल्ले निवाडे मंत्र्यांचे वटेन
पणजी: पंचायत मंत्री मॉवीन गुदिन्हो, येणावळ खात्याचे मंत्री बाबूश मोंसेरात आनी भौशीक बांदकाम खात्याचे मंत्री दिगंबर कामत हांचे बाजून न्यायालयान निवाडे दिल्ल्यान सरकारांतल्या तीन मंत्र्यांक थाकाय मेळ्ळी. हाका लागून डॉ. प्रमोद सावंत हांच्या सरकाराची प्रतिमा उजळ जावपाक मजत जाल्या.
पंचायत मंत्री मॉवीन गुदिन्हो हांका वीज सवलत भानगड प्रकरणांत न्यायालयान हेर आरोपीं सयत निर्दोश सुटका केली. वीज सवलत भानगड प्रकरणांत मॉवीन गुदिन्हो हांचे आड 1998 वर्सा गुन्यांव नोंद जाल्लो. 27 वर्सां उपरांत ते निर्दोश सुटले. येणावळ मंत्री बाबूश मोंसेरात हांचे आड बलात्कार प्रकरणी 2015 वर्सा गुन्यांव नोंद जावन आरोपपत्र दाखल जाल्लें. तांची लेगीत न्यायालयान निर्दोश सुटका केल्या. हाचे उपरांत आतां भौशीक बांदकाम खात्याचे मंत्री दिगंबर कामत हांचे आडचो मनी लॉड्रिंग खटलो रद्द करपाचो आदेश उच्च न्यायालयान दिला. हे निकाल तरेकवार न्यायालयांनी तरेकवार गुन्यांवां संबंदी दिल्ले आसले तरी ते मंत्र्यांचे वटेन आसात. हाका लागून ते निश्चीतपणान संबंदीत मंत्र्यांक, सरकाराक आनी सत्ताधारी भारतीय जनता पक्षाक थाकाय दिवपी आसात.
पंचायत मंत्री मॉविन गुदिन्हो हे वीज सवलत भानगड प्रकरणांत निर्दोश थारावपी निकाल ऑगस्ट 2025 मदीं दिलो. हें प्रकरण भ्रश्टाचार प्रतिबंधक न्यायालया सयत उच्च न्यायालय आनी उपरांत सर्वोच्च न्यायालया मेरेन पावले. चवकशी आनी खटलो मेळून 17 वर्सां प्रकरण चल्ले उपरांत मंत्री मॉवीन गुदिन्हो हे निर्दोश सुटले.
हाचे उपरांत येणावळ मंत्री बाबूश मोंसेरात हांचे आड न्यायालयांत बलात्कार प्रकरणांत 2016 सावन खटलो सुरू आशिल्लो. तांकां निर्दोश थारावपी निकाल फेब्रुवारी 2026त न्यायालयान दिलो. धा वर्सां ते ह्या खटल्यांत अाडकून उरले.
मनी लॉंड्रिग प्रकरणांत दिगंबर कामत आनी चर्चील आलेमांव हांचे आड 2018 वर्सा आरोपपत्र दाखल केल्लें. हो खटलो रद्द करपी निवाडो सोमारा उच्च न्यायालयान दिलो. फाटोफाट सरकारांतल्या तीन मंत्र्यांक थाकाय दिवपी निवाडे न्यायालयांनी दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
