भांगरभूंय | प्रतिनिधी
मुख्यमंत्रीपद सोडची ना
कोलकाता: अस्तंत्यो मुख्यमंत्री ममता बॅनर्जी हांणी अस्तंत बंगाल विधानसभा वेंचणुकेंतल्या निकाला उपरांतूय राजिनामो दिवपाक स्पश्टपणान न्हयकार दिला. आमची हार जाल्ली ना. आमी नैतीक नदरेन जिखल्यात, असो दावो करून तांणी निकालाचेर गंभीर प्रस्न उपस्थीत केले.
मंगळारा पत्रकार परिशदेंत उलयतना ममता बॅनर्जी हांणी म्हणलें, जर हांव हारिल्लें जाल्यार हांव स्वता वचून राजिनामो दिवपाचें. पूण खंयच्याच चेपणा खाला हांव पद सोडचें ना. हो निकाल जबरदस्तीन घडोवन हाडला आनी नैतीक जैत आमचेंच आसा.
खाशेली पत्रकार परिशद घेवन ममता बॅनर्जी हांणी वयली म्हायती दिली.
भाजपाचें दोन- तृतियांश भोवमत
मजगतीं, भारतीय जनता पक्षान 206 सुवातो जिखून दोन- तृतियांश भोवमत मेळयलां. अस्तंत बंगालांतली 15 वर्सांची तृणमूल काँग्रेसीची सत्ता सोंपयल्या. हो निकाल राज्याच्या राजकारणांतलो व्हड बदल मानतात.
ममता बॅनजी हांणी वेंचणूक प्रक्रियेचेरूय आरोप करून भारतीय वेंचणूक आयोगाचेर पक्षपातीपणाचो ठपको दवरला. आमची लडत भाजपा आड नाशिल्ली, जाल्यार वेंचणूक आयोगा आड आशिल्ली. सुमार 100 सुवातां वेलो जनादेश ‘लुटला’ असो आरोप तांणी केलो.
तशेंच मतमेजणी प्रक्रियेंत अनियमितताय जाल्ल्याचो दावो करून, मतमेजणी हेतुपुरस्सर सुसेगाद केली. जाका लागून आमच्या कार्यकर्त्यांचे मनोबल खच्चीकरण जातलें अशेंय तांणी नमूद केलें. सोमारचो दीस इतिहासांत काळो अध्याय म्हूण नोंद जातलो अशेंय तांणी म्हणलें.
ज्ञानेश कुमार हांचेरूय तांणी लोकशाय हक्कांचेर हावळ हाडिल्ल्याचो आरोप केलो. हे संबंदी फुडले कारवाये विशीं विचार सुरू आशिल्ल्याचें तांणी स्पश्ट केलें.
मजगतीं, वेंचणुके उपरांत जाल्ल्या हिंसाचाराचो नियाळ घेवपा खातीर टीएमसीन 10 वांगड्यांची समिती स्थापन करपाची घोशणा केली. ही समिती प्रभावीत वाठारांनी भेटी दिवन प्रत्यक्ष परिस्थितीचो अभ्यास करतली.
लोकांचेर अन्याय आनी छळ जालो जाल्यार ताका फुडारांत तितलेच खरसाणेन जाप दितले अशीय शिटकावणी ममता बॅनर्जी हांणी दिली.
इंडिया आघाडी म्हजे बराबर आसा. सोनिया गांधी हांणी म्हाका फोन केल्लो. राहुल गांधी, अरविंद केजरीवाल, उद्धव ठाकरे, हेमंत सोरेन आनी तेजस्वी यादव हांणी लेगीत म्हाका फोन केले. इंडिया आघाडी तुमचे बराबर आशिल्ल्याचो विस्वास तांणी दिला. अखिलेश यादव बुधवारा अस्तंत बंगालांत येतात अशी म्हायती तांणी दिली.
–
राहुल गांधीचो ममताक तेंको
अस्तंत बंगालच्यो मुख्यमंत्री ममता बॅनर्जी हांच्या मता कडेन आपूण सहमत आसा. तृणमूल कॉंग्रेसीची भाजपा आड हार जाले उपरांत मतांची चोरी जाल्ल्याचो बॅनर्जी हांच्या दाव्या कडेन आपूण सहमत आसा आनी म्हजो तांकां तेंको आसा अशें राहुल गांधी हांणी म्हणलें. राज्यांत 100 परस चड सुवातांची चोरी जाल्या असोय दावो तांणी केलो.
—
9 मेक सोपूतविधी
अस्तंत बंगाल विधानसभा वेंचणुकेच्या निकाला उपरांत सत्ता स्थापन करपा खातीरच्या हालचालींक नेट आयला. नव्या सरकाराचो सोपूतविधी 9 मे दिसा जातलो अशी घोशणा केल्या. ह्या दिसा गुरुदेव रवींद्रनाथ टागोर हांची जयंती आशिल्ल्यान हे तारखेक विशेश म्हत्व फावो जालां. राज्यांत पयलेच फावटी भाजप सत्तेंत येत आशिल्ल्यान हो राजकी नदरेन इतिहासीक खीण मानतात. मुख्यमंत्रीपदार कोणाची निवड जातली हाची उत्सुकताय वाडल्या. राज्यांतले मुखेल फुडारी दिल्लींतल्या वरिश्ठ फुडाऱ्यां कडेन चर्चा करपा खातीर गेल्यात. रोखडोच निमाणो निर्णय जाहीर जावपाची शक्यताय उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
