भांगरभूंय | प्रतिनिधी
सैमाक वांगडा घेवन बरी उदरगत, स्वताचेर नियंत्रण… सगलें कितें आसा. मात…
राष्ट्रीय स्वयंसेवक संघाचे मुखेली मोहन भागवत हांणी त्रिपुरांतल्या मोहनपुरांत काल म्हणलें, ‘दोन हजार वर्सां सावन शासन, धर्म आनी विज्ञानाचे प्रयोग करून संवसार काचाबूल जाला. आबूज जावन तो भारताच्या ज्ञाना कडेन पळयता. पयलीं राजांक सत्ता दिली, ते शोशण करपाक लागले. मागीर देवाक सर्वोच्च मानून लोकांनी धर्म तयार केले, पूण रक्तपात चालूच उरले. विज्ञान म्हणटा, देव दिसना तो मेरेन ताका हांव मानचें ना. विज्ञानान सुविधा दिल्यात, पूण समाधान? संवसारांत दुख्ख आसा. गुन्यांव वाडटात, झुजां सुरू जालीं काय थांबच नात. उदरगत वाडटा तितलें पर्यावरण सोंपता. आतां भारतीय ज्ञाना कडेन आशेन पळोवपी संवसाराक तें वांटप आमचें कर्तव्य, जिविताचें उद्दिश्ट.’ भागवत हांणी म्हणलें ताका जगाच्या प्रवासाचें विश्लेशण म्हणूं येता. मात जें कितें वायट जालां, ताका मनीसजातूच जापसालदार. दुख्ख, गरिबी, घाय, कोणें दिले? ताचेर सत्ता गाजोवपी सगलें टाळपाक शकताले, पूण दरेकलो सुवार्थ पळयत गेलो आनी सुखां, सुविधा मेळूनय मनीस दुख्खीच उरलो. हें शाश्वत दुख्ख आनी दूक! जगात आनी जगपाक दियात, हें सगल्या तत्वांचें समान सुत्र. सध्याच्या काळांत तें गरजेचें.
मनीसजातीचे तीन माॅडेल. राजसत्ता. राजांक सत्ता दिली. पूण हुकूमशांनी शोशण केलें. सरकारांनीय हेंच केले. करतात. सत्तेचेर आदारीत वेवस्था तिगना, म्हूण लोकांनी देव, धर्माक तेंगशेर बसयलो. थंयूय जाती, वर्ण वेवस्था, झुजां, कत्तली… धर्माची शिकवण पवित्र आसली तरी अहंकार, तिरस्कार, कारस्थानां उणीं जावंक नात. विज्ञान, तंत्रज्ञानान तशें जिवीत ल्हव केलां. सुविधांनी त्रास, मनस्ताप सोंपयल्या, पूण मानसीक ताण, पर्यावरण, कुटुंब वेवस्था…. देंवतेर गडगडूंक लागल्या. भौतीक उदरगत जाली, पूण आत्मीक समाधान? पयलीं थोडें तरी आशिल्लें. भारतीय ज्ञान, तत्वज्ञान खूब गिरेस्त. मात काळ उलगलो तश्यो बऱ्योच गजाली ना जायत गेल्यो. घडये परंपरेन त्यो मुखार गेल्यो नासतल्यो!
संवसार भारतीय ज्ञाना कडेन पळयता, म्हणल्यार संतुलीत जिणेंशैली कडेन. तातूंत भौतीक, मानसीक, अध्यात्मीक संतुळा आयली. वसुधैव कुटुंबकम, हे विश्वची माझे घर अशे सर्वसमावेशक विचार आमचे कडेन आसात. सैमाक वांगडा घेवन बरी उदरगत, स्वताचेर नियंत्रण… सगलें कितें आसा, मात तें आमी चालीक लायतात व्हय? ताका पाळो दितात व्हय? बऱ्या, वायट मार्गान जोडिल्लो पयसो, राटावळी, डावपेच, भ्रश्टाचार, गुन्यांव करून मेळयिल्ली सत्ता… हाचे परस संतुळीत जिणे दृश्टी म्हत्वाची न्हय?
मानसीक समस्या सतायतात, सैम संकश्टांत सांपडला. भारतीय अध्यात्मीक संकल्पनेन विदेशींक आकर्शीत केल्या. आमचे कडेन उपाय आसात, मात ताका परिपूर्ण माॅडेल म्हणपाक मेळटलें? समाजीक विशमताय, अंधश्रद्धा, धर्मीक- जातीय दुस्वास, पर्यावरण समस्या वाडल्यात. रंग, खाणां, जनावरांची पसून आमी धर्मां- धर्मां मदीं वाटणी केल्या. संवसारान सत्ता, धर्म आनी विज्ञान शिरंतरांनी रिगोवन जालें, तांकां आतां संतुळीत मार्ग जाय. भारतीय तत्वज्ञान तो दाखोवंक शकता, अशें भागवत हांकां दिसता.
तशीं सगलींच तत्वज्ञानां त्या- त्या काळांत उपेगी थारुं येतात. सगल्यांत बरें तत्वज्ञान, वयर सांगलां तें, जगात आनी जगपाक दियात. बुद्ध, महावीर हांचें तत्वज्ञान अहिंसा, करुणा. वसुधैव कुटुंबकम, सगलें जग एक कुटुंब. हें भेदभाव उणावपाक बरें. सैमाचो आदर करात. सध्या हें गोंयांक गरजेचें. मानवतावाद म्हत्वाचो. भेदभाव नाका, समानताय जाय. मनीसपण पाळटात आमी? एकूच तत्वज्ञान सगले प्रस्न सोडोवंक शकना, तरीय अहिंसा, सर्वसमावेशकताय, सैमा कडेन इश्टागत आशिल्लें तत्वज्ञान बरें. सगलीं तत्वज्ञानां घुसळून येता तें लोणी संवसाराक वांटुया. ‘आधुनीक तत्वज्ञानां’तले उणाव कुशीक सारून बरे जगुया, हेरांकूय हात दिवन वयर काडुंया… जगोवया!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
