भांगरभूंय | प्रतिनिधी
मडगांव: मडगांवचो आवाज आनी युवा फुडारी प्रभव नायक हांणी दक्षीण गोंय जिल्लोधिकार्यां कडेन मडगांवां सुरू आशिल्ल्या बेकायदो ‘सोपो’ फी वसुली विशीं कागाळ दाखल केल्या. मडगांव शारांत वेपार्यांचो माल घेवन येवपी वाहनां कडल्यान सोपो वसूल केल्ल्यान वेपारी, येरादारी करपी आनी थळाव्या वेवसायिकांनी तिडक उक्तायल्या.
कागाळींत नमूद केल्ले प्रमाण, मडगांव बाजारांत प्रवेश करपी माल व्हरपी वाहनांकडल्यान शुल्क वसूल करतात. हाका लागून सदचो वेपार आनी येरादारी वेवसायाचेर अन्यायकारक अर्थीक भार पडटा. ही पद्धत खंयच्याच नियंत्रणा बगर सुरू आसा. हाका लागून गैर वेवस्था आनी अर्थीक ताण निर्माण जाता, अशें प्रभव नायक हांणी जिल्लोधिकार्यांक दाखोवन दिलें.
ह्यो कागाळीच्यो प्रती मुख्यमंत्री डॉ. प्रमोद सावंत, नगरवीकास मंत्री विश्वजीत राणे, साबाखा मंत्री दिगंबर कामत, फातोड्डेंचे आमदार विजय सरदेसाय आनी कुडतरचे आमदार आलेक्स रेजिनाल्ड लॉरेंस, तशेंच मडगांव नगरपालिका मुख्याधिकारी हांकां धाडल्यात. प्रशासनाच्या विवीध पांवड्यार हे विशीं बेगोबेग हस्तक्षेप करपाची मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
