भांगरभूंय | प्रतिनिधी
म्हजें मत
–
दरेका दिसाळ्याचे लेख, अग्रलेख आनी संपादकाक बरयल्लीं पत्रां सरकारान लक्षांत घेवप सक्तीचें करचें. भौशीक कागाळ्यांच्या बातम्यांचेर लक्ष दवरपाक सरकारान यंत्रणा स्थापन केल्या अशें समजता. पूण हातूंतल्यान ठोस परिणाम मेळोवपा खातीर बेगोबेग कार्यवाही करपाची गरज आसा. भौशीक तक्रारी वेंचून काडून ताचेर कार्यवाही करपाची सुचोवणी वेगवेगळ्या मंत्रालयांक आनी राज्य सरकारांक दिल्या. हें खरें? भौसाक हो प्रत्यक्ष अणभव येवंचो. तातूंतल्यान लोकशाय बळिश्ट जातली.
जेन्ना आमी ‘नोडल कागाळ निवारण अधिकाऱ्यांक’ दिसाळ्यांनी वा सोशल मिडियाचेर उजवाडाक आयिल्ल्या कागाळींचेर हालचाल करपाची सुचोवणी दितात. तेन्ना ते पावलां उखलतात काय?
‘केंद्रीय भौशीक कागाळ निवारण आनी निरिक्षण प्रणाली’चेर दिसाळ्यांनी उजवाडाक येवपी कागाळींची आपोआप नोंद करपा खातीर सरकार तंत्रीक उपाय तयार करता, जी आपोआप तांची नोंदणी करतली, असो प्रचार सध्या चलता. खूब बरी गजाल! पूण, ह्या धोरणाची प्रत्यक्ष अंमलबजावणी करपाची गरज आसा.
एका सूत्रा प्रमाण, 2016 वर्सा ‘प्रशासकीय सुदारणा आनी भौशीक कागाळ निवारण खात्यान’ सगळ्या मंत्रालयांक दिसाळ्यांतल्या कागाळ निवारण स्तंभांचेर नेमान नदर दवरची आनी त्या कागाळींचेर कार्यवाही करपाचो आदेश दिल्लो. जायते लोक आपले प्रस्न मांडटात; खरेंच त्या समस्यांचो हें खातें विचार करता काय? कारण, म्हाका स्वता हे बाबतींत कसलोच अणभव मेळूंक ना. दिसाळ्यांतल्या लोकांच्या सगळ्या समस्यांक राज्य आनी देश सुदारपाचें साधन मानून, लोकशाय खऱ्या अर्थान अर्थपूर्ण करची.
केंद्र आनी राज्य सरकारां कडेन परत परत पत्रवेव्हार करून लेगीत म्हाका एके जाण्टे विधवे खातीर शौचालय मेळूंक शकलो ना. ही समस्या हांवें दिसाळ्यांनीय मुखार हाडिल्ली, पूण ताची कोणेच दखल घेतली ना. देखून दिसाळ्यांची जें कितें येता ताका सरकारान फावो तो मान दिवचो. लोकशायेचो चवथो खांबो गंभीर आसा, पूण सरकारान ताची गंभीरताय वळखुपाक जाय. लोकांच्या सगळ्या ल्हान ल्हान समस्यांची ताणें स्वेच्छेनूच दखल घेवची.
राजेश बाणवलीकार,
वेगसवाडो, हडफडे, बार्देश
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
