भांगरभूंय | प्रतिनिधी
पेडणें : कातोडवाडो- तुयेंची ती बायल. घोव भायर पडून दोन वर्सां जालीं. पदरांत दोन भुरगीं ८ वर्सांची धूव आनी ११ वर्सांचो पूत. घर दुरुस्त करपाक आनी कुटुंबाचे सुरक्षे खातीर ती सरकारी मजत सोदता. मात तिका दयानंद समाजीक सुरक्षा वा गृह आधार येवजणेचो लाव मेळना. घर दुरुस्त करपाक तिणें यत्न केलो. पूण कागदपत्रांची अडचण, किचकट सरकारी प्रक्रिया आनी कुटुंबांतल्याच कांय वांगड्यांचो विरोध हाका लागून ती सध्या मानसीक तणावांत आसा. तिचें नांव गौरी गोविंद वेताळकार.
घराचे वण्टीक वेरो गेल्यात, वण्टीक, दारांक वाळटी लागल्या. बाथरुमाक पांखे ना. घुशींनी भायर, भितर खणून दवरलां. टेबल, फ्रीज सोडात व न्हिदतलो जाल्यार खांट ना. ती आपल्या भावाचो गॅस वापरून रांदता. जायते फावटी बिस्किटी खावन रावतात. तातूंत आतां घराचेर माकड येवन बसतात आनी नळेय फोडटात.
शिक्षण नाशिल्ल्यान गौरी वर्सांतले स म्हयने एके कंपनी पांच हजार रुपया पगाराचेर काम करता. उदकाचें बिल भरपाक पयशे नाशिल्ल्यान उदका पुरवण खात्यान नळाचो मिटर काडून व्हेला. थळावे आमदार जीत आरोलकार हांणी घरदुरुस्ती, डीएसएस येवज, उदका बिलांत सूट आनी भुरग्यांच्या कल्याणा खातीर सरकारी येवजण मेळोवन दिवची, अशें तिणें मागलां. एकादी नोकरी मेळत जाल्यार जगपाक आदार जातलो अशेंय तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
