भांगरभूंय | प्रतिनिधी
कार्यावळीक हाजीर आशिल्ल्या पुलिसां आड कारवाय करपाची मागणी
पणजी : वास्को एके कार्यावळींत गौतम खट्टर हांणी सेंट फ्रांसिस झेवीयर हांचो उल्लेख ‘आतंकवादी’ असो करप हो भाजपाचो राज्यांत जातीय धृविकरण करपाचो डाव आसा, असो आरोप कॉंग्रेसीन केला. वास्को कार्यावळीक हाजीर आशिल्ल्या पुलिसांचेर गुन्यांव नोंद करून कारवाय करपाची मागणी कॉंग्रेसीन केल्या.
कॉंग्रेस पक्षान आयज पणजेंत पत्रकार परिशद घेतली. प्रदेश कॉंग्रेस अध्यक्ष अमित पाटकार, आमदार कार्लूस फेरेरा, दक्षीण गोंयचे खासदार विरियाटो फर्नांडीस, महिला कॉंग्रेस अध्यक्ष प्रतीक्षा खलप पत्रकार परिशदेक हाजीर आशिल्ली.
वास्कोचे ते कार्यावळींत मंत्री मावीन गुदिन्हो, आमदार संकल्प आमोणकार, आमदार दाजी साळकार हाजीर आशिल्ले. गौतम खट्टर हाच्या तोंडांतल्यान जेन्ना सेंट फ्रांसिस झेवियर ‘टेररिस्ट’ अशें उतर आयलें तेन्ना भाजप मंत्री तशेंच आमदारान रोकडेंच ताका आडोवन भाशण बंद करपाक कित्याक लायलें ना. राज्यांत जातीय धृविकरण तयार करून जातीय तेढ निर्माण करपाचो भाजपाचो हो पद्दतशीर डाव आसा, असो आरोप प्रदेश कॉंग्रेस अध्यक्ष पाटकर हांणी केलो.
गौतम खट्टराचे सयत कार्यावळीक हाजीर आशिल्ल्या पुलिसांआड गुन्याव नोंद करून कारवाय करपाची मागणी आमदार फेरेरा हांणी केली.
भाजपा सरकार बायलां विरोधी
भाजप सरकार बायलांच न्हय जाल्यार एसटी भाव विरोधी आशिल्ल्याचो आरोप खासदार विरियातो फर्नांडीस हांणी केलो.
बायलां आरक्षण विधेयक २०२३ वर्सा संमत जाल्लें. कॉंग्रेस पक्षान ताका तेंको दिल्लो. २०२४ चे वेचणुकेंत बायला आरक्षणाची कार्यवाय कित्याक केली ना? कॉंग्रेस न्हय जाल्यार भाजप बायलां विरोधी आसा, असो आरोप फर्नांडीस हांणी केलो. गोंयचें एसटी आरक्षण विधेयक सम्मत जावन लेगीत एसटी आरक्षणाची कार्यवाय करपाचे येत्न सरकार कित्याक करिना. १३१ वें घटना दुरुस्ती विधेयक हें बायलां आरक्षणा खातीर नाशिल्लें, तर तें लोकसभेचे मतदारसंघ वाडोवपा खातीर आशिल्ले. हाकाच कॉंग्रेसीन विरोध केलो, अशें खासदार फर्नांडीस हांणी सांगलें.
#goa #khattar #vasco #xavier #bjpg #congress
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
