भांगरभूंय | प्रतिनिधी
पणजी: शिरगांवचे देवी लयराईची होमखण जात्रा २१ एप्रील सावन उमेदीन मनयतले. हे जात्रेचे फाटभूंयेर कायदो आनी सुवेवस्था राखपाक तशेंच शांतताय राखपाक उत्तर गोंय जिल्होधिकारी अंकित यादव हांणी विशेश आदेश जारी केल्यात. ते प्रमाण शिरगांव आनी हेर वाठारांतल्या पांच मुखेल गांवांनी सोर्याचीं एकान एक दुकानां, तार्वेर्न, बार थारावीक काळा खातीर बंद दवरतले.
जिल्लोधिकार्यांनी भारतीय नागरी सुरक्षा संहितेच्या कलम १६३ खाला हो निर्णय घेतला. तो शिरगांव सयत मुळगांव, मयां, खोर्जूवें आनी अस्नोड्यां वाठारांक लागू आसतलो. हे निर्बंध २० एप्रिलाक सांजेवेळार ६ वरां पसून लागू जातले आनी २२ एप्रिलाक दनपरां १२ वरां मेरेन आसतले. ह्या काळांत सोर्याचीं दुकानां पुरायेन बंद उरतलीं. सोरो विकपाचो परवानो आशिल्ल्या अस्थापनांकूय हो आदेश सक्तीचो. अबकारी आयुक्तांचे शिफारसी प्रमाण, जात्रेच्या काळांत कसलेच तरेचो वायट प्रकार घडचो न्हय आनी भाविकांक सुरक्षीत वातावरणांत दर्शन घेवपाक मेळचें, हे खातीर हें पावल उबारलां.
प्रशासना कडल्यान मेळिल्ले म्हायती प्रमाण, कोणेंय जर हो आदेश मोडल्यार ताचेर भारतीय न्याय संहितेच्या कलम २२३ प्रमाण खर दंडात्मक आनी कायदेशीर कारवाय करतले. जात्रे खातीर येवपी हजारांनी भाविकांची सुरक्षा आनी भौशीक शांतता ही प्रशासनाची प्राथमिकताय आशिल्ल्याचें जिल्लोधिकार्यांनी आपल्या आदेशांत नमूद केलां. थळावे पुलीस आनी अबकारी विभागाक ह्या आदेशाची खर अंमलबजावणी करपाचे निर्देश दिल्यात, सगले कडेन नदर दवरतले. भाविकांनी आनी थळाव्या वेपार्यांनी प्रशासनाक सहकार्य करचें, असोय उलो मारलो.
#bhaangarbhuin #konkani #goa #shirgaon #LairaiDevi #sorobandi
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
