भांगरभूंय | प्रतिनिधी
पणजी : फुडल्या वर्सा सावन आयटीआयंत उजो पालोवपी सेवा हो एका वर्साचो अभ्यासक्रम सुरू करतले. उजो पालोवपी दळांत जवान म्हणून भरती जावपा खातीर हो अभ्यासक्रम पुराय करप गरजेचो करतले, अशें मुख्यमंत्री डॉ. प्रमोद सावंत हांणी सांगलें. सोमारा पणजे करियर जागोर हे कार्यावळींत ते उलयताले. ह्या वेळार शिक्षण सचिव प्रसाद लोलयेंकार, संचालक शैलेश झिंगडे, एससीईआरटी संचालक मेघना शेटगांवकार, भूषण सावयकार, गोविंद पर्वतकार आनी हेर अधिकारी हाजीर आशिल्ले.
मुख्यमंत्र्यांनी सांगलें, आयज विद्यार्थ्यांक एआय, रोबोटिक्स, डिजिटल मीडिया, सायबर सुरक्षा अश्यो खुबश्यो नव्यो करिअर संदी उपलब्ध जाल्यात.
एखाद्या पदा खातीर तीस वर्सां आदीं थारयिल्ली पात्रताय आतां लागू जायना जाल्यार ती बदलपाक जाय.
ते प्रमाण राज्य सरकार भरती नेमांत (आरआर) बदल करतात. ह्यान पयलीं उजो पालोवपी दळांत जवान म्हणून काम करपा खातीर धावी वा बारावी ही पात्रताय आशिल्ली. आतां हातूंत बदल करपाचो निर्णय घेतला. फुडाराक हेर आधुनीक अभ्यासक्रमा प्रमाण आरआर बदलतले.
तांणी म्हणलें, करियर जागोरा खाला राज्यांतल्या दरेका शाळेंतल्या एका शिक्षकाक करियर मार्गदर्शन प्रशिक्षण दितले. प्रशिक्षित शिक्षक आपल्या शाळेंतल्या विद्यार्थ्यांचें मार्गदर्शन करतले. हे शिक्षक विद्यार्थ्यांचे करियर राजदूत म्हणून काम करतले.
शिक्षकांनी विद्यार्थी आनी ताच्या करिअरांतलो दुवो म्हणून काम करचें. विद्यार्थ्यांची आवड जाणून घेवन तांकां योग्य करिअर खंयचें हें सांगचें. गोंयचो फुडार हो आयच्या तरणाट्यांच्या हातांत आसा. हे खातीर तांकां योग्य करिअर मेळप गरजेचें.
इन्सेंटिव्ह दिवपाचो विचार
मुख्यमंत्र्यांनी सांगलें, प्रशिक्षण घेतिल्ल्या शिक्षकांक एससीईआरटी कडल्यान करियर मार्गदर्शक म्हणून नियुक्तीपत्र दितले. अशा शिक्षकांक इन्सेंटिव्ह दिवपा विशीं आमी विचार करतले. तशेंच करिअर मार्गदर्शन करिनाशिल्ल्या शाळांचेर दंडात्मक कारवाय करपाचो विचारूय सुरू आसा.
#Goa #Panjim #FireAndEmergency #Depertment #GoaGovt
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
