भांगरभूंय | प्रतिनिधी
131वी घटना दुरुस्ती न्हयकारिल्ल्यान आतां संख्या 40च उरतली
पणजी: पुर्तुगीज राजवटींतल्यान गोंय मुक्त जाले उपरांत पयली वेंचणूक जाली तेन्ना गोंय, दमण आनी दीव संघशासीत प्रदेशांत 30 मतदारसंघ आशिल्ले. गोंयांत 28 आनी दमण, दीव हांगा दरेकी 1 मतदारसंघ आसलो. 1987 वर्सा गोंयाक घटक राज्य दिवपी 56वे घटना दुरुस्ती विधेयक संसदेंत संमत जालें आनी गोंयांतले मतदारसंघ 40 जाले. आयज मेरेन ते 40 आसा. बायलां आरक्षण विधेयका खातीर लोकसभेच्यो सुवातो वाडोवपाची तजवीज आशिल्ली 131वे घटना दुरुस्ती विधेयक हारिल्ल्यान सध्या तरी गोंयचे मतदारसंघ वाडपाची शक्यता ना. लोकांमेजणेची प्रक्रिया सुरू आशिल्ल्यान फुडल्या वर्सा जावपी विधानसभा वेंचणुकेंत लेगीत गोंयचे मतदारसंघ 40सूच उरतले.
बायलां आरक्षणाच्या कार्यवाहे खातीर लोकसभेच्या वांगड्यांचो आंकडो 850 मेरेन वाडोवपाची तजवीज आशिल्ली. दरेका राज्यांत 50 टक्के सुवातो वाडोवपाची तजवीज आशिल्ली. हाका लागून गोंयच्या लोकसभा मतदारसंघांचो आंकडो 2 वेल्यान 3 जावपाचो आशिल्लो. घटना दुरुस्ती विधेयक न्हयकारिल्ल्यान आतां गोंयांतल्या लोकसभा मतदारसंघांचो आंकडो दोनूच उरतलो. तशेंच फुडल्या वर्सा विधानसभेची वेंचणूक जातली. विधानसभा वेंचणुकेंत लेगीत मतदारसंघांचो आंकडो 40 उरतलो. तशेंच बायलां आरक्षण कायद्याची कार्यवाही इतले बेगीन शक्य नाशिल्ल्यान मतदारसंघांचो आंकडो तशेंच तांचे रचणुकेची स्थिती आसा तशीच उरतली. बायलां आरक्षण विधेयकाच्या कार्यवाहे खातीर घटना दुरुस्ती जाले उपरांत गोंयांत 5 मतदारसंघ वाडपाची आस्त मुख्यमंत्री डॉ. प्रमोद सावंत हांणी उक्तायिल्ली. लोकसभेचो एक आनी विधानसभेच्यो कांय सुवातो वाडटल्यो, अशें जाणकारांनी लेगीत सांगिल्लें. घटना दुरुस्ती विधेयक संमत जावंक नाशिल्ल्या कारणान गोंयांत लोकसभा तशेंच विधानसभेचे मतदारसंघ वाडपाची शक्यताय पालवल्या.
सध्या लोकांमेजणचो वावर सुरू जाला. लोकांमेजणी पुराय जाले उपरांत मतदारसंघ फेररचणूक (डिलिमिटेशन) प्रक्रिया जातली. हाचे उपरांत मतदारसंघांच्या आंकड्यांत बदल जावप शक्य आसा. मात सध्या तरी गोंयांत लोकसभेच्याे दोन सुवातो जाल्यार विधानसभेच्यो 40 सुवातो उरतल्यो.
पुर्तुगीज राजवटीतल्यान 1961 वर्सा गोंय मुक्त जालें. गोंय मुक्त जालें उपरांत 1963 वर्सा पयली विधानसभा वेंचणूक जाली. गोंयांत 28 जाल्यार दमण आनी दीव वाठारांत दरेकी 1 मेळून 30 मतदारसंघ आशिल्ले. 1987 मेरेन म्हणल्यार घटकराज्य जाय मेरेन मतदारसंघांचो आंकडो 30 आशिल्लो. गोंय घटक राज्य जाले उपरांत दमण आनी दीव वेगळो संघशासीत वाठार जालो. गोंय वेगळें राज्य जावन 40 मतदारसंघ आसतले, अशी तजवीज 56व्या घटना दुरुस्ती विधेयकांत आशिल्ली. हाका लागून 1984 मेरेन 30 मतदारसंघां खातीर (गोंय, दमण आनी दीव) विधानसभा वेंचणूक जाली. घटक राज्य जाले उपरांत 1989 वर्सा पयली विधानसभा वेंचणूक 40 मतदारसंंघां खातीर जाली.
2001च्या लोकांमेजणे उपरांत मतदारसंघांची फेररचणूक जावन काय मतदारसंघांच्या वाठारांनी बदल जालो. मतदारसंघांच्या फेरचणुके उपरांत पेडणें म्हालांत 3 मतदारसंघां बदला (पेडणें, धारगळ, मांद्रें) 2 मतदारसंघ जाले. (पेडणें आनी मांद्रें). तशेंच मुरगांव म्हालांत दाबोळी हो नवो मतदारसंघ तयार जालो. पयलींच्या लोटली मतदारसंघाचें नांव नुवें जालें जाल्यार पाळी मतदारसंघाचें नांव सांखळी मतदारसंघ जालें. काणकोण आनी पैंगीण मतदारसंघाच्या बदला एकूच काणकोण मतदारसंघ जालो. तशेंच पर्वरी हो नवो मतदारसंघ तयार जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
