भांगरभूंय | प्रतिनिधी
परशुराम अवतरण महोत्सवाचें उक्तावण
पणजी: योग, ध्यानधारणा तशेच अध्यात्मीक उपक्रमाच्या आदारान राज्याचो हॅप्पीनेस इंडेक्स वाडोवपाचे सरकाराचे येत्न आसात. कुंडय तपोभूमी तशेंच पोरणे गोंय हांगाच्या नरेंद्र महाराज मठातल्यान गोंयांत अध्यात्मीक वातावरण तयार जावपाक लागलां. पर्तगाळ मठातली रामाची मुर्ती, सप्तकोटेश्वर देवूळ हे अध्यात्मीकताये सयत पर्यटकांचें लेगीत थळ जालां. तरणाटे तशेंच हेर लोकां मदीं अध्यात्मीककताय वाडली जाल्यार हॅप्पीनेस इंडेक्स वाडपाक मजत जातली, अशें मुख्यमंत्री डॉ. प्रमोद सावंत हांणी सांगलें.
गोंयची वळख परशुराम भूंय अशी आसा. अक्षय तृतीयेच्या म्हुर्तार परशुराम जयंती निमतान पणजेंत परशुराम अवतरण महोत्सवाचे उक्तावण जालें. ह्या वेळार मुख्यमंत्री डॉ. प्रमोद सावंत उलयताले. प्रदेश भाजप अध्यक्ष दामू नायक, आमदार डिलायला लोबो, आमदार जीत आरोलकार, राष्ट्रीय परशुराम परिशदेचे संस्थापक सुनील भराला, श्रीहरी आठल्ये, अमीत नागर आनी हेर मानेस्त हाजीर आशिल्ले.
गोंयची वळख परशुराम भूंय अशी आसा. ह्या परशुराम भुंयेंत परशुरामाचो पुतळो उबारपाचें कार्य म्हज्याच सरकारान केलें. कुंडय तपोभूमीचेर ब्रह्मेशानंद स्वामी महाराजाच्या मार्गदर्शना खाला व्हड प्रमाणांत अध्यात्मीक कार्य सुरू आसा. आतां पोरणे गोंय हांगा लेगीत नरेंद्र महाराजांचो मठ सुरू जाला. हरवळ्यां तीर्थ कॉरिडॉरचो वावर सुरू जातलो. फर्मागुडयेर छत्रपती शिवाजी महाराजांच्या कार्याचेर आदारीत म्युझीयम जातलें. कांय म्हयन्यां पयलीं पर्तगाळ मठांत रामाच्या मुर्तीचें अनावरण जालें. अध्यात्मीक वातावरणाक लागून जिवितांत तशेंच समाजांत शांतिकाय निर्माण जाता. उदरगत तशेंच समाजीक स्वास्था खातीर शांतिकाय म्हत्वाची आसता. तीर्थ कॉरिडॉर, छत्रपती शिवाजी महाराज म्युझियमाक लागून पर्यटक लेगीत व्हड प्रमाणांत राज्याक भेट दितले, अशें मुख्यमंत्री डॉ. प्रमोद सावंत हांणी सांगलें.
पणजे मांडवी न्हंये लागीं उबारिल्लो परशुरामाचो पुतळो हे फुडाराक दायज केंद्र थारतलो. गोंयची वळख परशुराम भूंय अशी आसा. हाका लागून गोंयांत परशुरामाचो पुतळो जावपाची गरज आशिल्ली, अशें प्रदेश भाजप अध्यक्ष दामू नायक हांणी सांगलें.
ह्या वेळार सांस्कृतीक कार्यावळी जाल्यो. गणेश वंदना, भगवान परशुराम गाथा, परशुराम आनंद उत्सव ह्यो कार्यावळी जाल्यो. निमाणी म्हाआरती आनी लायट अॅण्ड सावंड शोन कार्यावळ सोंपली. 26 एप्रील मेरेन दर दिसा तरेकवार कार्यावळी जातल्यो. लायट अॅण्ड सावंड शो, पुजा, म्हाआरती आनी दिलीप कृष्ण भारव्दाज हांचे परशुराम कथा वाचन जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
