भांगरभूंय | प्रतिनिधी
पेडणें: पाळेवाडो, कोरगांवां उदक ना. हाका लागून थळावे रस्त्यार देंवले. भौशीक बांदकाम विभागाक शिटकावणी दीत म्हणलें, दोन दीस उदकाची वाट पळयतले ना जाल्यार पेडणेंच भौशीक बांदकाम खात्यार मोर्चा व्हरतले. हेर वाड्यांक उदक मेळटा. फकत आमच्याच वाड्यार उदक कित्याक ना? असो केलो प्रस्न.
कोरगांवच्या कांय वाठारांनी उदका खातीर आजूनय नागरिकांक वळवळचें पडटा. उदका खात्याच्या कर्मचार्यांक कळोवनूय उदक वेळार उपलब्ध जायना. हाका लागून नागरिकांक टँकराच्या उदकाचेर निंबून रावचें पडटा. टँकर केन्ना येतलो हेंय सांगू येना. मात हेर कडेन उदक आसता. पाळेवाडो, कोरगांवांच आमकां उदक कित्याक मेळना? असो प्रस्न ह्या वेळार उपसरपंच दिवाकर जाधव हांणी हाजीर करून, जर वेळार उदक आयलें ना जाल्यार ह्या वाठारांतले नागरीक उदका खात्याच्या कार्यालयाचेर मोर्चा व्हरतले अशें तांणी म्हणलें.
चांदेल उदका प्रकल्पांतल्यान पुराय पेडणें म्हालाक उदकाची पुरवण जाता. चांदेल प्रकल्पांतले उदक नेमान येनाशिल्ल्यान कांय जाण आजूनय बांयो, बोअरवेलचो वापरतात.जाल्यार कांय जाणांक अशे तरेची कसलीच वेवस्था नाशिल्ल्यान तांकां पुरायेन नळार निंबून रावचें पडटा. हाची दखल सरकारान घेवन ह्या वाठारांत नेमान उदकाची पुरवण करपाची मागणी थळाव्यांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
