मिस वर्ल्डूय जिखूं

भांगरभूंय | प्रतिनिधी

थारावीक समाजीक, अर्थीक पांवड्या वयले लोक सोडल्यार सौंदर्य स्पर्धां विशीं भारतांत तशी जागृताय ना. हे सर्तींत बिकीनी घालून अंगप्रदर्शन करचें पडटा, हेंय एक कारण आसत. हालींच्या वर्सांनी तर असल्या सर्तींनीं वांटेकार जावपाक सोदपी चलयांक संस्कृतीमोगी कितें म्हणटले, हाचोय थर्त भंय दिसता. सौंदर्य स्पर्धा हो कांय भोवउद्देशीक कंपनींचो कट, ताका आमी बळी पडपाक जायना, अशेंय कांय जाणांक दिसता. भारतान संवसारीक सर्ती जिखल्यात. सगल्यांत पयलीं गोंयचें रिटा फारिया (1966) जिखलें. उपरांत 1994 त ऐश्वर्या रै (राय न्हय. तें मंगळुरूचें). डायना हेडन, युक्ता मुखी, प्रियांक चोप्रा, मानुशी छिल्लर (मिस वर्ल्ड) आनी सुश्मिता सेन, लारा दत्ता, हरनाझ संधू (मिस युनिवर्स) हांणी उपरांतच्या काळांत हे मुकूट जिखले. मिस इंडिया जातकच मिस वर्ल्ड सर्तींत वांटेकार जावंक मेळटा. पूण सगल्यांकूच तो किताब मेळटाच अशें ना. 

मिस इंडियाचो पयलो मान इस्टर व्हिक्टोरिया अब्राहम (प्रमिला) हे अभिनेत्रीक 1947 त मेळिल्लो. ती बगदादी ज्यू कुटुंबातली. मुंबयचे डाॅ. रिटा फारिया हिका मिस इंडिया आनी उपरांत मिस वर्ल्ड किताब मेळ्ळो. पूण ती मनोरंजनाच्या मळा कडेन वचनासतना वैजकी मळा कडेन वळ्ळी. ती मूळ गोंयकार…. आनी आतां माॅडेल, उद्देजक साध्वी सतिश सैल हे गोंयकार चलयेक मिस इंडियाचो भोवमान मेळ्ळा. सौंदर्य सर्तींनी फक्त दोनूय गोंयकारांक यश मेळ्ळां. आनीक कोण मूळ गोंयकार बी आसा जाल्यार म्हायती मेळना. हो मुकूट 60 वर्सां उपरांत आमच्या वांट्याक आयला. 1983 त भारत क्रिकेट वर्ल्ड कप जिखतकच देशांत क्रिकेटीचें वारें व्हांवपाक लागलें आनी पळयतां पळयतां आमी संवसारीक वस्ताद जाले. तशें हे सर्तीचें बाबतींतूय जावं. आतां साध्वी मुखार रिटा फारियाच्या जैताची मोख आसा. मिस वर्ल्डा खातीर ताणें खर यत्न करचो.   

फेमिना मिस इंडिया सुवाळो भुवनेश्वर- ओडिशांत जालो. 30 स्पर्धकांनी वांटो घेतिल्लो. साध्वी सैल मिस इंडिया जालें. तर महाराष्ट्राचें राजनंदिनी पवार पयलें उपजैतिवंत थारलें. जम्मू काश्मीराचें श्री अद्वैता जी दुसरें उपजैतिवंत. साध्वीचें उच्च शिक्षण कॅनडाक जालां. ताका सात भाशा उलोवपाक येतात. ताणें जायत्या फॅशन शोंनी वांटो घेतला. कॅलिफोर्निया बुरिटो सारक्या मोहिमांची तें मुखेल चेरो आशिल्लें. बांदकाम मळा वयले एके कंपनीचें तें सह संस्थापक. सर्तीची तयारी करपाक ताणें वजन उणें केल्लें. ताचो ताका फायदोच जालो. आंतरराष्ट्रीय पांवड्याचेर देशाचें प्रतिनिधीत्व करतना प्रामाणीकपण बाळगून मुखार वचपाचो हावेस ताणें उक्तायला. फुडले मिस वर्ल्ड सर्तींत तें जिखचें, हीच लाखांनी भारतियांची इत्सा आसतली. 

मिस इंडिया ही फक्त सर्त न्हय, तर बायलांक सशक्त करपी, तांचें व्यक्तीमत्व बदलपी, तांकां स्वताची वळख पटोवन दिवपी आनी करियर घडोवपी माची. कांय चलयांच्या जिवितांत हे सर्ती उपरांत व्हडलो बदल जाला, हें मानून घेवचेंच पडटलें. चडांत चड गोंयकारांनी असले सर्तीं खातीर तयारी करपाक जाय. हिंदी, इंग्लिशीचेर शेक मेळोवचो. जायरातीं खातीर माॅडेलिंग, फिल्म, टिव्ही मळाचेर हे सर्ती उपरांत प्रवेश मेळटा. आंतरराष्ट्रीय माचयेचेर वावुरपाक मेळटा. मोठ्या ब्रॅण्डां वांगडा संपर्क जाता. करियर म्हूण तरणाट्या चलयांनी मनोरंजनाच्या मळार वचूं येता. अर्थांत हे खातीर मुंबय, बंगळुरू, कोलकाता गेले बगर पर्याय ना. एका काळार गोंयकारांनी भारतीय सिनेमासृश्ट गाजयल्या. म्हणटकच यत्न केल्यार आमकां कांय कठीण न्हय! गोंयची लोकसंख्या उणी, स्पर्धकांचो आंकडोय कमी, तरी दर्जो आनी परिणामाचे नदरेन आमी बरी कामगिरी केल्या. पुराय संवसारांत भारताचें नांव गाजोवपाचो हांवेस साध्वी सैलान उक्तायला. तें मिस वर्ल्डूय जिखूं.