भांगरभूंय | प्रतिनिधी
पणजी: प्रुडंट मिडियाच्या प्रुडंट मराठी वाहिनीचें लोकार्पण आयतारा रत्नागिरींत स्वामी स्वरुपानंद हांचे पावस मठांत जालें. ह्या वेळार कोल्हापूरचे प. पू. आनंदनाथ सांगवडेकर महाराज हांचे आशिर्वचन जालें. स्वामी स्वरुपानंद सेवा मंडळ तशेंच प्रुडंट मिडियाचे वरिश्ठ कार्यावळीक हाजीर आशिल्ले. पावस गांवांतल्या श्रीस्वामी स्वरुपानंद समाधी मंदीर वाठारांत ही कार्यावळ जाली.
अक्षय्य तृतियेच्या म्हुर्ताचेर प्रुडंट मिडियान आतां मराठी वाहिनीच्या माध्यमांतल्यान महाराष्ट्रांत पावल घालां. स्वामी स्वरुपानंद हांचे मदीं गुरू माऊलीचो अंश आशिल्लो. स्वामी स्वरुपानंद हे माऊलीचेच अवतार आशिल्ले. तांची शिकवण दर एकल्याक कळची आनी सगल्यांचो उद्धार जावचो, अशें आशिर्वचन प. पू. आनंदनाथ सांगवडेकर महाराज हांणी कार्यावळींत केलें.
प्रुडंट मिडियाचे संपादकीय संचालक प्रमोद आचार्य हांणी येवकाराचें उलोवप केलें. प्रडुंट मिडियाच्या मराठी वाहिनी विशीं तांणी म्हायती दिली. केशवसूत तशेंच लोकमान्य टिळकांचे भुंयेंत प्रुडंट मिडिया पावल घालता, अशें तांणी ह्या वेळार सांगलें. स्वामी स्वरुपानंद सेवा मंडळ, पावसचे कार्याध्यक्ष जयंत रावजी देसाय हांचें भाशण जालें. स्वामी स्वरुपानंद सेवा मंडळाच्या कार्याची तांणी म्हायती दिली. स्वामी स्वरुपानंद सेवा मंडळाची अध्यक्ष शिल्पाताई पटवर्धन, सचीव ऋषिकेश पटवर्धन, सदगुरू आनंदनाथ सांगवडेकर महाराज हांचो भोवमान जालो.
स्वामी स्वरुपानंद महाराजांच्या जिविताचेर प्रुडंट मिडियान तयार केल्ल्या म्हायतीपटाचें उपरांत लोकार्पण आनी सादरीकरण जालें. प्रुडंट मिडियाचे संचालक ज्यो लुईस, संपादकीय संचालक प्रमोद आचार्य, रवी पाटील, रोहित वाडकार, राजेश नायक, तुळशीदास च्यारी हांचो ह्या वेळार भोवमान जालो.
रोहित वाडकार हांणी सुत्रनिवेदन केलें. ऋशिकेश पटवर्धन हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
