भांगरभूंय | प्रतिनिधी
केपें: बोब्रीमड्डी केप्यां साळावली मुखेल कानालांत आयतारा सांजवेळा न्हावपा खातीर गेल्ल्या दोगां तरणाट्यांक बुडून मरण आयलें. केपें पुलिसांनी कुडचडें उजो पालोवपी दळाचे मजतीन दोगांच्यो कुडी उदका भायर काडून मडगांवां मड्या कुडींत दवरल्यात. मजगतीं, ह्या प्रकरणांत केपें पुलिसांनी असैमीक मरण म्हूण नोंद करून फुडलो तपास सुरू केला.
मेळिल्ले म्हायती प्रमाण बोब्रीमड्डी केप्यां साळावलेच्या मुखेल कानालांत दोन अनवळखी तरणाट्याच्यो कुडी उफेत आशिल्ल्याची म्हायती पुलीस नियंत्रण कक्षा कडल्यान केपें पुलिसांक मेळिल्ली. तशेंच ही म्हायती कुडचडें उजो पालोवपी दळाकूय दिली.
मजगतीं, केपें पुलीस निरिक्षक प्रशल नायक देसाय हांच्या मार्गदर्शना खाला उपनिरिक्षक दिगंबर बोंद्रे आनी हेर पुलिसांनी घडणूक थळार धांव घेतली. ह्याच वेळार उजो पालोवपी दळ पावलें.
उपरांत दळाच्या जवानांनी आनी पुलिसांनी मेळून दोनूय कुडी भायर काडल्यो. ह्या वळार ते सुवातेर पार्क केल्ल्या दुचाकीचेर दोगांचे कपडे पुलिसांक सांपडलें. तशेंच दुचाकीच्या क्रमांका वेल्यान म्हायती घेवन संबंदितांक दिली. ते प्रमाण फातोड्डेंचो इग्नेशियस फर्नांडीस (24, रा. फातोड्डें) आनी ताचो इश्ट हरजीत सिंग दानू (रा. उतोड्डें, मूळ उत्तराखंड) ह्या दोगांच्यो कुडी आशिल्ल्याच्यो कुटुंबान वळखल्यो. दोगूय तरणाटे माजोड्ड्यां एका पांच नखेत्री हॉटेलांत कामाक आशिल्ले अशी म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
