भांगरभूंय | प्रतिनिधी
गर्दी नियंत्रणा खातीर सुमार ९०० पुलीस कर्मचारी तैनात
पणजी: शिरगांवचे देवी श्री लयराईची जात्रा दोन दिसांचेर पावल्या. २१ एप्रिलाक जावपी हे जात्रे खातीर धोंड शुक्रार सावन व्रतस्थ जाल्यात. पुराय गोंयभर भक्तीमय वातावरण निर्माण जालां.
जात्रेचे फाटभूंयेर शुक्रार रातीं देवळाच्या वाठारांत सुरक्षा वेवस्थेची ‘मॉक ड्रील’ जालें. मुख्यमंत्री डॉ. प्रमोद सावंत फाटल्या वर्सा जाल्ले खेटाखेटीचे घडणुके सुवातेर स्वता हाजीर रावन पळोवणी केली आनी पुलीस तशेंच आपत्कालीन यंत्रणांक गरजेच्यो सुचोवण्यो केल्यो. ताचे पयलीं आमदार प्रेमेंद्र शेट आनी जिल्लोधिकार्यांनीय ह्या वाठाराची, तयारेची पळोवणी केली. अंदूं सुरक्षे खातीरची वेवस्था चड खर केल्या.
हे जात्रेची परंपरा आनी इतिहास पळयल्यार, सुरवातेक हो उत्सव फकत देड दिसांचो आसतालो. मात आतां तो पांच दीस मनयतात. ह्या उत्सवाचें खाशेलपण म्हणल्यार, म्हापशेंचे मीराई सायबिणी कडल्यान हे जात्रेक तेल आनी फुलांची भेट येता. जाल्यार मिराई सायबिणीच्या फेस्ताक शिरगांवचे देवी कडल्यान तेल धाडटात. जात्रे दिसा आनी कौलांच्या वेळार देवीक पिटकुळणी आनी कुड्याच्या फुलांचो घोंस अर्पण करतात. भावीक श्रद्धेन मोगरेच्या कळ्यांची आटी वा आबोल्यांचे झेले घेवन देवीची ओटी भरतात. जात्रे दिसा सकाळीं कळश्यांतलें पवित्र तीर्थ घेवपा खातीर हजारांनी भावीक गर्दी करतात.
जात्रेंतल्या मुखेल विधींची सुरवात चव्हाठांतल्या धर्मीक कार्यावळींनी जाता. चव्हाट्यावेल्यान देवी श्री सांतेरी देवळांत येता आनी उपरांत कौलांक सुरवात जाता. मानसवाड्या वेल्यान सुरू जावपी हीं कौलां चार दीस चलतात. गांवांतल्या दरेका घरांच्या दारांत देवी वता आनी थंय तिची ओटी भरप जाता. जात्रे दिसा सकाळीं मंगल कलशाची पुजा करतात आनी तातुंतलें तिर्थ घराघरांनी दितात. दनपरां मुळगांव, मयां- वायंगणीचे कवळास वाजत-नाचत देवळांत येतात. विधी उपरांत देवीची उत्सवमुर्ती पाळणी ह्या सेवेकर्यांच्या माथ्यार दितात आनी उपरांत शिरंगार केल्ले तिचें रूप ’चिरा’ मोडाच्या माथ्यार दवरून आदिस्थाना कडेन मिरवणूक काडटात.
रातच्या वेळार श्री सांतेरी देवळांत आबा जेवणाच्यो विधी जातात आनी लयराई देवळांत थळवाटणीची कार्यावळ जाता. उपरांत ’आरत’ आनी ’हळदोणी’च्यो विधी पुराय जावन देवी स्वतःभोंवतणी भोंवताडो मारून होमखंडा दिकेन वता. सांकवाकडच्या देवचाराक कौल दिले उपरांत देवी होमखंडा लागसार येता. चलतां चलतांच देवी एक ल्हानशी चंद्रज्योत होमखंडांत घालता आनी खिणांत उजो पेट्टा. उपरांत देवी तळयेर न्हांवन विसव घेवपा खातीर ’मुड्डी’ ह्या आदिस्थानार वता.
सकाळीं जावपी ’अग्निदिव्य’ हें हे जात्रेचें सगल्यांत व्हड आकर्शण. मुड्डी हांगा दरेका धोंडाक देवीचें कौल मेळ्ळे उपरांत तांचे मदीं एक वेगळीच उर्जा दिसून येता आनी ते देवीचो नामघोश करीत होमखंडांतल्यान धांवतात. श्री होमखंडेश्वर धोंडांचे संरक्षण करता अशी भाविकांची श्रद्धा. सगले धोंड होमखंडांतल्यान गेले उपरांत चौघुले आनी निमाणे आदिशक्ती श्री लयराई देवी स्वता अग्नीप्रवेश करता.
हो सुवाळो जाले उपरांत देवी ‘चव्हाठा’ हांगा विसव घेवपाक रावता. ह्या सुवाळ्या उपरांत अग्नीची खरसाण इतली वाडटा, उपरांत तातुंतल्यान कोणाकू वचपाक मेळना. पांचव्या दिसा शिमेवेल्या देवांक कौल दिले उपरांत ढोल-ताशांच्या गजरांत देवी देवळांत परतता आनी जात्रा सोंपता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
