भांगरभूंय | प्रतिनिधी
रिटा फारिया प्रमाण मिस वर्ल्ड जावपाची संद
पणजी ः गोंयचें साध्वी सतिश सैल फेमिना मिस इंडिया वर्ल्ड थारलें. हो ६१ वो फेमिना मिस इंडिया सुवाळो भुवनेश्वराक ’कलिंगा इन्स्टिट्यूट ऑफ इंडस्ट्रियल टेक्नॉलॉजी’त जालो. महाराष्ट्राचें राजनंदिनी पवार पयलें उपजैतिवंत, श्री अद्वैता दुसरें उपजैतिवंत थारलें. हे सर्तींत ३० सर्तकांनी वांटो घेतिल्लो. साध्वी आतां मिस वर्ल्ड सर्तींत भारताचें प्रतिनिधीत्व करतलें. डॉ. रिटा फारिया हिका १९६६ त मिस वर्ल्ड किताब फावो जाल्लो. तसो साध्वीक मेळटा काय ना, हाचे कडेन आतां पुराय गोंयकारांचें लक्ष लागिल्लें आसतलें.
मॉडेल आनी उद्देजक
गोंयचें एक मॉडेल आनी उद्देजक, साध्वी कॅनडा विद्यापीठांत अर्थशास्त्र शिकलां. ताका सात भाशा उलोवपाक येतात. ताणें जायत्या फॅशन शो-नी वांटो घेतला आनी ’कॅलिफोर्निया बुरिटो’ सारक्या मोहिमांची ती मुखेल चेरो जाल्या. तिणें बांदकाम आनी उदरगत मळाचेर एके कंपनीची सह-थापणूक केल्या. आपल्या जैताचेर खोशी उक्तावन साध्वीन हे संदी खातीर उपकार मानले.
तिणें सांगलें, म्हाका हें सगळें सध्या एका सपना सारकें दिसता. ही संद मेळ्ळी देखून हांव खूब, खूब उपकारी. तशेंच, सगळ्यो वांटेकार एकामेकांक लागीं आशिल्ल्यो आनी सर्तीच्या काळांत तांणी एक ’सोबीत वेळ’ घालयलो अशेंय तिणें सांगलें. आपल्या वांगड्यांक ’जैतवंत’ मानून, हो प्रवास एकाचवेळार मेळून वाडपाचो आनी इश्टागतीचो आशिल्लो, अशें तिणें म्हणलें.
साध्वीन हे सर्ती खातीर १० कील वजन उणें केल्लें. ताका म्होंवा मुसांचो भंय दिसतालो. तो घालोवपाक ताणें ते पोसपाचें प्रशिक्षण घेतलें. ताणें फाटल्या तीन वर्सांत १० देशांचो प्रवास केला. ताका प्राण्याच्यो प्रतिकृती करपाचो छंद आसा.
तिणें फुडें म्हणलें, आनी म्हजे खातीर म्हज्यो सगळ्यो इश्टीणी आज जैतिवंत आसात आनी आमकां फकत इतलेंच जाय की आमी पुराय संवसारांत भारताचें नांव गाजोवचें.
संवसारीक पांवड्यार भारताचें प्रतिनिधित्व करपाविशीं उलयतना, साध्वीन उमेद आनी जापसालदारकीची भावना उक्तायली. आंतरराष्ट्रीय पांवड्यार देशाचें प्रतिनिधित्व करतना प्रामाणिकपण, नितळपण बाळगून फुडें वचपाचो तिचो हावेस आसा. फुडें बरोच लांब प्रवास आसा. ही तर फकत सुरवात आसा, अशें सांगून तिणें देशभरच्या लोकांचो आशिर्वाद आनी आदार मागलो.
आदली जैतवंत निकिता पोरवाल हिणें साध्वीक मुकूट घालो. आतां साध्वी २०२७ च्या ’मिस वर्ल्ड’ सर्तींत भारताचें प्रतिनिधित्व करपाक पुराय तरेन सज्ज आसा.
दुसरे वटेन, राजनंदिनी पवार जिणें हें जैत थोड्या गुणांनी वगडायलें, तिची खेळ आनी कलेच्या मळाचेर बुन्याद खूब घट्ट आसा. ती राज्य पांवड्यार नर्तक आनी स्क्वॅश खेळगडी आसा, तशेंच विभाग पांवड्या वयली पेंवपी आसा. कलेच्या माध्यमांतल्यान व्यक्त जावपाची तिका ओड आसा आनी साहसी वृत्ती तशेंच खेळांमळार ती सदांच फुडें आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
