भांगरभूंय | प्रतिनिधी
पणजी : कला, वाणिज्य, विज्ञान ह्या शाखांच्या पदवी अभ्यासक्रमा सयत बीसीए, बीबीए या अभ्यासक्रमां खातीर मेळून राज्यभरांतल्या विद्यार्थ्यां कडल्यान १५ हजार अर्ज आयल्यात. अर्जांची छाननी करपाची प्रक्रिया सूरू आसा. ती पुराय जाले उपरांत पयली पात्रताय वळेरी जाहीर जातली. उपरांत गुणवत्ता वळेरी जाहीर जातली अशी म्हायती उच्च शिक्षण अधिकारी महादेव गांवस हांणी दिली.
कला, वाणिज्य, विज्ञान आनी हेर पदवी अभ्यासक्रम प्रवेशा खातीर फाटलीं तीन वर्सां मध्यवर्ती समान प्रवेश परीक्षेचो अवलंब जाता. उच्च शिक्षण संचालनालयाच्या समर्थ पोर्टला वरवीं इत्सुकांक ऑनलायन स्वरूपांत अर्ज करचो पडता. अंदू बारावीचो निकाल जाले उपरांत मार्च म्हयन्यांत अर्ज घेवपाक सुरवात जाली. अर्ज करपाची मुजत १३ एप्रिलाक सोंपली. जाग्या परस चड अर्ज आयले आसले तरी अर्ज केल्ले सगलेच विद्यार्थी प्रवेश घेतात अशें ना. विज्ञान शाखेचे विद्यार्थी वैजकी, अभियांत्रिकी, फार्मसी अशा वेवसायीक अभ्यासक्रमांत प्रवेस घेतात. त्या अभ्यासक्रमाक प्रवेश मेळटकीर ते पदंवी विज्ञान अभ्यासक्रमाक घेतिल्लो प्रवेस सोडटात. हाका लागून बरेच जागे खाली जातात. कला आनी वाणीज्य पद्वी अभ्यासक्रमा खातीर प्रवेश घेतिल्ले कांय विद्यार्थी कायदो वा बीएबीएड अभ्यासक्रमा खातीर प्रवेश घेतात. हाका लागून कला वा वाणिज्य पद्वी अभ्यासक्रमाक लेगीत जागे उपलब्ध जातात. दरेकी म्हाविद्यालयांत जागे वाडोवन सगळ्या विद्यार्थ्यांक प्रवेश मेळटलो अशी वेवस्था उच्च शिक्षण संचालनालय करतलें, अशें महादेव गांवस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
