भांगरभूंय | प्रतिनिधी
(लग्नाक पांचाल राज्यांतल्यान द्रुपद, ताचे चले आनी पांडवांचे पांचूय पूत आयिल्ले. ह्या सगल्यां लोकांचे साक्षीन अभिमन्यू आनी उतरा हांचें लग्न व्हडा दबाज्यान जालें. आतां मुखार….)
अभिमन्यू आनी उत्तरा हांचे लग्न जाले उपरांत कांय दिसांनी कृष्णान लग्नाच्या निमतान आयिल्ल्या सगल्या राजांची बसका घेतली. बसकेक द्रुपद, विराट, बलराम, सात्यकी, पांचूय पांडव, द्रुपदाचे पूत हे सगळे हाजीर आशिल्ले. सगल्यांत पयलीं कृष्ण उबो रावलो आनी ताणें म्हणलें, “दुर्योधनान कशे तरेन पांडवांक वनवासाक धाडले हे तुमकां सगल्यांक खबर आसाच. तांणी उबारिल्ले इंद्रप्रस्थ राज्य आतां दुर्योधनाच्या हातांत आसा. पांडवांनी बारा वर्सांचो वनवास आनी एका वर्साचो अज्ञातवास भोगून फांश्यांच्या खेळांत ताणीं मान्य केल्ली अट पाळ्ळ्या. पूण दुर्योधन पांडवांक तांचें हक्काचें राज्य परत दिवपाक तयार जायतसो दिसना. आतां हें परिस्थितींत पांडवांनी फुडें कितें करचें हें थारावपा खातीर हांवें तुमकां सगल्यांक एकठांय आपयल्यात. तेन्ना तुमी ह्या विशयाचेर आपले विचार मांडचे अशे हांव तुमचे कडेन मागता.” अशें म्हणून कृष्ण आपल्या आसनार बसलो.
कृष्ण उलयले उपरांत बलराम उलयलो. ताणें म्हणलें, “हें सगळें जावपाक युधिश्टीराचो मुर्खपणा कारण आसा. हाका फांश्यांचो खेळ धड खेळूंक येना जाल्यार हो खेळपाक कित्याक बसलो? हो आपुणूच आपलें राज्य व्हागडावन बसला. मागीर आमी दुर्योधनाक कशें दुशण दिवंक शकतात? फाटलीं तेरा वर्सां ताणें सांबाळिल्ले इंद्रप्रस्थ राज्य तो सोंपेपणी पांडवांक परत दिवपाक तयार जायत अशें म्हाका दिसना.’ बलराम दुर्योधनाक बोल लावपाक सोदिना हें सात्यकीच्या लक्षांत आयलें. ताणें म्हणलें, “तशें जाल्यार पांडवांनी झूज करून तांचे राज्य परत घेवपाक जाय आनी आमी सगल्यांनी तांकां ह्या कामांत तेंको दिवपाक जाय.” सात्यकीन अशें म्हणटकच थंय जमिल्ल्या सगल्यांनी झूज जाले जाल्यार तें पांडवां वटेन रावतले अशें सांगलें.
कृष्णान मागीर तांकां सगल्यांक म्हणलें, “कसल्याय प्रस्नाचेर झूज हो म्हज्या मतान निमाणो उपाय. तो अंमलांत हाडचे पयलीं आमी आमचो एक मनीस पांडवांचो दूत म्हणून हस्तिनापूरांत धाडुया. पांडवांचे मागणें त्या दुतांक धृतराष्ट्रा मुखार दवरूं दी. धृतराष्ट्र पांडवांक इंद्रप्रस्थ राज्य परत दिवपाक तयार जालो जाल्यार बरेंच जालें. ना जाल्यार मागीर झूज आसाच.” कृष्णाचें म्हणणें बलरामा सयत सगल्यांक मान्य जालें. कृष्णान मागीर पांडवांचो दूत म्हणून द्रुपदाच्या पुरयताक धाडचो अशें सुचयलें. तेरा वर्सां पुराय जावचे पयलीं पांडवांक आपणें वळखल्यात तेन्ना पांडवांनी परत बारा वर्सां वनवासाक वच्चे अशें दुर्योधनान म्हणलें जाल्यार, तेरा वर्सां कशी पुराय जाल्यात हें द्रुपदाचो पुरयत पंचांग पळोवन ताका वेवस्थीत सांगतलो अशें कृष्णान सगल्यांक सांगलें. कृष्णाची सुचोवणी जमिल्या सगल्यांक आवडली आनी तांणी द्रुपदाच्या पुरयताक हस्तिनापूरांत धाडचो अशें थारायलें.
थारिल्ले प्रमाण, द्रुपदाचो पुरयत पांडवांचो दूत म्हणून हस्तिनापूरांत गेलो आनी ताणें पांडवाचे मागणें धृतराष्ट्रा मुखार दवरलें. कांय दिसांनी धृतराष्ट्राचो निरोप घेवन द्रुपदाचो पुरयत उपप्लाव्य नगरांत परत आयलो. आपणांक कितें सांगपाचें आसा तें पांडवां कडेन दूत धाडून आपूण कळयता असो निरोप धृतराष्ट्रान धाडिल्लो. धृतराश्ट्राचो निरोप आयकून, पांडवांचो प्रस्न सोंपेपणी सुटचो ना हो अदमास बलरामाक आयलो. तो मागीर सगल्यांचो निरोप घेवन द्वारकेक परत गेलो. पूण कृष्ण गेलो ना.
कांय दिसांनी धृतराष्ट्राचो निरोप घेवन संजय पांडवां कडेन आयलो. ताणें पांडवांक सांगलें, ‘हें पळयात, झुजांत आख्ख्या कुळाचो नाश जाता. तेन्ना शाण्या मनशांनी झुजाचो विचार करचो न्ही. दुसरी गजाल म्हणल्यार पांडव जेन्ना वनवासांत आशिल्ले त्या काळांत दुर्योधनाचें बळ खूब वाडला. ताणें राजसूय यज्ञ केला आनी खुबशे नवीन राजा इश्ट म्हणून जोडल्यात. तेन्ना पांडवांनी दुर्योधना आड झूज करपाचें धाडस करचें न्ही’.
संजयान हाडिल्या निरोपांत इंद्रप्रस्थ राज्य पांडवांक परत दिवपा विशीं कांयच नाशिल्लें. निरोप दिवन संजय हस्तिनापूराक परत गेल्या उपरांत पांडव आनी कृष्ण फुडली येवजण करपाक बसले. कृष्णान आपूण हस्तिनापूराच्या दरबारांत वचून पांडवांची बाजू धृतराष्ट्रा मुखार मांडटा आनी ताचें म्हणणें आयकून येता अशें सांगलें. कृष्ण परत येतकच झूज करचें कांय ना. हाचे विशीं निर्णय घेवचो अशें सगल्यांनी थारायलें. दुसरे दिसा, कृष्ण आनी सात्यकी तांचे नारायणी सेनेचे पंगड वांगडा घेवन हस्तिनापूराक गेले.
मुखार चलता
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
