भांगरभूंय | प्रतिनिधी
अमेरिकेन संवसाराक भेश्टावन दवरिल्ले, तांच्या चलनाचेर जर परिणाम जालो जाल्यार झुजाक निश्चीत वेगळें वळण मेळटलें.
सध्याक मध्य पुर्वेंत इराण आनी इझ्रायल हांचे मदीं झूज चालू आसा आनी सामान्य लोकांचे हाल जाल्यात. कोणाक कोणाचें चुरचुरे दिसना, कितलो दुडवांचो इबाड जाता हाचेर लक्ष ना. ताचो परिणाम आयज पुराय संवसाराचेर जावंक लागला. झुजतलीं राश्ट्रां एकामेकांची पदवी तपासूंक झुजतात काय दिसता. अशींच झुजां राजकी मळार आनी समाजीक मळार चलतात. मनशाचो वालोर कमी जायत वता आनी हुशारकाय आपली पदवी दाखयता. मदीं तोंड वयर काडटा तो हिशेब नाशिल्लो दुडू. आमचीं भुरगीं आयज बरेंबरें शिकप घेतात, पूण तांकां घरांतलें शिकप मेळना, म्हणजे नातीं, चाली, परंपरा, तत्वां, मुल्यां सारके संस्कार मेळनात. लग्न जातकच रोखडेंच वेगळें रावपाचें कित्याक सुचता तेंच कळना. आदले भशेन जोड- कुटुंबां चुकून पळेवंक मेळटात. अनाथाश्रम, जाणट्या घरांचो आंकडो वाडत आसा. तांच्या मरणाचेर मात खूब खर्च जाता ही दुखाची गजाल.
एक घडणूक
एका जाण्ट्यां- घराक भेट दिली तेन्ना एक उतार पिरायेची अस्तुरी म्हणूंक लागली, “आमचें घराणें खूब व्हडलें पूण तांतूंत म्हाका सुवात ना. पूत आनी सून फ्लॅटांत रावतात आनी म्हाका हांगा दवरल्या. खर्चाक सगळें मेळटा पूण म्हाका भुरग्यांचो मोग मेळना. कसलोच उत्सव ना, समारंभणी ना, इश्टागत ना आनी घरगुती वातावरण ना. हांगाच म्हजो संवसार. कित्याक उपकारता भुरग्यां खातीर कास्तीग काडून? हेच खातीर आमी आमच्या जिविताचो त्याग केल्लो?” पवित्र पुस्तक म्हणटा, तुज्या आवय- बापायक मान दी. हेंच आमकां ल्हानपणांतल्यान शिकयतात, पूण जशी आमची बुद्धी वाडटा, तशी आमी शिकवण विसरत वतात. लग्न जातकच हे शिकवणेची आमकां याद लेगीत आसना. कितलीं भुरगीं तांचेर हात उखलतात, तांकां सारकें जेवण दिनात. अशीच गजाल समाजांतूय घडटा. समाजांत नातीं आसनात, पूण इश्टागत आसता, तिचो मान राखप लेगीत मनशाचें कर्तव्य म्हूण ही घडणी सांगता.
मध्य पूर्व झूज
अमेरिका सदांच आपूण म्हासत्ता म्हूण दाखोवंक सोदता. भारताचेर ताणें कितले फावटीं निर्बंद घालून सामान्य भारतीयांक खूब त्रास केल्यात. हेंच संवसारांतल्या जायत्या गरीब राश्ट्रांक भोगता. पूण संवसारांत अशींय कांय राश्ट्रां आसात जीं अमेरिकेक फुडो करूंक शकतात म्हूण इराणान दाखोवन दिलां. अमेरिकेन खूब वर्सां सावन माण्णी काडून इराणाक अणू कार्यक्रमांतल्यान पयस दवरूंक येवजिल्लें, पूण तो आयकना हें निमित्त सादून तांचो फुडारी अली खामेनेय, ताच्या कुटुंबाक आनी वरिश्ट अधिकाऱ्यांक मारून उडयले. हांगाच्यान हें झूज सुरू जालें. फेब्रुवारी 28 तारखे सावन आतां मेरेन कितलेच दीस जाले हें झूज चलता आनी प्रत्यक्ष आनी प्रत्यक्ष कितलींच राश्ट्रां हांतूंत घुस्पल्लीं आसात. परिणामा विशीं कोणाचेंच चिंतप दिसना पूण सामान्य मनशांचेर काळ येवपाचो आसा हें खरें. आमच्या कुटुंबीक झगड्यांतूय अशेंच घडटा. कोण तरी सुरवात करता आनी भलत्यांकूच भोगचें पडटा. भोगणार जातकच कसलो मान? आदींच बरेपण दाखयल्यार बरें न्हय?
पवित्र पुस्तक गवाय
पवित्र पुस्तकांत सांत पावलू एफेजकारांक बरयल्ले चिटींत अशें म्हणटा, “सोमया सवें, ताचे पदवेच्या बळान, तुमी घट रावात. देवचाराच्या सगळ्या मांडण्यांचेर जैत व्हरूंक देवान दिल्लें झुजाचें आंगत्राण घालून रावात. कित्याक म्हणल्यार, रग्तामासाच्या दुस्मानां लागीं आमकां झूज ना, पूण परधानां लागीं, अधिकाऱ्यां कडेन, ह्या काळखाच्या संवसाराचो राजकारभार चलयतल्या लागीं, अंत्राळार वस्ती करतल्या खोट्या ऑतम्यां कडेन आमचें झूज.” दुस्मान कोण हाची पयली वळख घेवंची गरज आसा. भायल्यान घुरी घालता तोच दुस्मान न्हय न्हय आमचे भितरूय दुस्मान आसता. समाजांत आमचें खासगी झूज आसता, कुटुंबांत आमचें झूज आसता आनी जे कोण व्हडील आसात तांचे कडेनूय तें चलता. तें कितले मेरेन चलोवंचें हाचो निर्णय कळना जाल्यार आमी दुस्माना कडेन न्हय तर स्वता कडेनूच झुजतात. मागीर भोवमान कोणाचो?
झुजांत तेंको दिवपी
कसलेंय झगडें वा झूज सुरू जालें म्हणटच एक गजाल घडटा, ‘दुस्मानाचो दुस्मान इश्ट’ जातात आनी झगडूंक फुलयतात. राजकारणांत आमी हें अणभवतात. गोंयांत फाटलो राजकी इतिहास चाळ्ळो जाल्यार कोणालो दुस्मान कोण तें सांगप अवघड जातलें. सोपूत घेवन नेगार गेल्ले राजकारणी आमी पळेले. अशेंच खासगी जिवितांत घडटा. कट्टर दुस्मान आशिल्ले मनीस वा राश्ट्रां झुजा वेळार कांय फावटीं गरज नासतना लेगीत झुजांत भितर सरतात आनी आपलें आसणें दाखयतात. सध्याच्या मध्यपूर्व झुजांत कांय राश्ट्रां अमेरिकेक तेंको दितात जाल्यार कांय राश्ट्रां इराणाक. देखून हें म्हाझूज जावंयेता असो पत्रकारांचो अदमास आसा. तेंको दिवपी नाशिल्ले जाल्यार असो अदमास येवंचो नाशिल्लो. हे खातीर झूज जाता तें पालोवंक वावुरल्यार शांती आनी सवस्तकाय निर्माण जाता. तेंको दितल्यांनी उज्यांत पेत्रॉल घालें जाल्यार उजो व्हड जातलोच न्हय? समाजीक जांव राजकी झुजांतूय तेंको दिवप्यांनी अशी सकारात्मक भुमिका घेवंक गरज आसा.
झूज सामान्यांक
जाणट्यांक घरांतल्यान भायर घालप म्हणल्यार एक झुजूच. कितल्यो राटावळी आनी माण्ण्यो काडच्यो पडटात आनी हो निर्णय एका दिसान जायना. कोणाकोणाचो सल्लो घेवंचो पडटा, कोणाकोणाक काळखांत दवरचे पडटात, विस्वासांत घेवंचे पडटात आनी निर्णय चालीक लायतना कांय वेळार मनीसपण पासून होगडावंचें पडटा. पूण तो मनीस मेलो म्हणटच रित- परंपरा करूंक सगळे एकठांय जातात. जिवंत आसतना कुटुंबीक सूख दिनांत आनी मेले उपरांत समाजाक दाखोवंक सगळीं पथ्यां पाळटात. ही मनशाची पाखंडी वागणूक काय? झुजा पासून पयस रावप हीच मनीसणाची वागणूक आनी थंयच मनशाचो खरो भोवमान जाता हें वळखूंक जाय.
सोंपयतना…
झूज कोण जिखतलो ताचेर चड लक्ष व्हरचें न्हय पूण एके शिटकावणेचेर नियाळ करुंया. ज्यो तेलाबोटी स्ट्रेट ऑफ होर्मुझ पार करूंक सोदतात तांचे खातीर इराणान नवो आदेश जारी केला. ताणीं डॉलरांनी न्हय तर चिनाच्या युआन चलनान दुडू फारीक करूंक जाय. कार्डांनी खेळटना जशें ट्रंप कार्ड वापरतात तशी खेळी इराण खेळ्ळा. अशें ट्रंप कार्ड राजकारणांत आनी समाजकारणांत सगळ्यां कडेन आसता हें लक्षांत दवरूंक जाय. अमेरिकेन संवसाराक भेश्टावन दवरिल्ले, तांच्या चलनाचेर जर परिणाम जालो जाल्यार झुजाक निश्चीत वेगळें वळण मेळटलें. मनीसहानी जातली. आमच्या आपसांतल्या झुजांक आमी आळो घालना जाल्यार आमचेरूय असोच परिणाम जावंक शकता. तेन्ना मरतकच फुलां, रितां, बँड, व्हड दबाजो करून कितें फायदो? जिवंत आसतना जिवीत राखून भोवमान करूंक आमचें मन तयार करुंया.
विन्सी क्वाद्रूस
राय, साश्ट (मो : 9822587498)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
