भांगरभूंय | प्रतिनिधी
…. जाका लागून खऱ्या जिवितांत समाजीक नुकसान करपी मनशां भोंवतणी नायकपणाचो एक फटकिरो आभास निर्माण जाता.
फाटल्या कांय वर्सां पसून एक चिंताजनक, सामकी हुस्को करपा सारकी समाजीक प्रवृत्ती चड नदरेक येवंक लागल्या. जायते तरणाटे जनसेवे खातीर आपलें जिवीत ओंपपी मानादीक अधिकाऱ्यां परस नांवाडगे गुंड आनी गुन्यांवकारां वटेन चड ओडिल्ले दिसतात. हें फकत एक सादें निरीक्षण न्हय; तर आयच्या काळांतल्या भौशीक माध्यमांचेर नदर मारल्यार हें सामकें स्पश्ट दिसून येता.
सोशल मीडिया माध्यमाच्या सगल्या माचयांचो (फेसबूक, इन्स्टा, ट्विटर बी) ल्हानसो नियाळ केलो जाल्यार ही वस्तुस्थिती स्पश्ट जाता. गुंड, गुन्यांवकारी आनी हिंसक पात्रांचे उदात्तीकरण करपी पोस्ट्स, रील्स आनी व्हिडिओंक चड करून लाखांनी व्ह्यूज, लायक्स आनी शॅरस मेळटात. हाचे उरफाटें, मानादीक पुलीस अधिकारी आनी हेर सरकारी सेवकांच्या जैताची आनी त्यागाची म्हायती दिवपी मजकुरा कडे लोकांचें इतलें लक्ष वचना. लोक कशे तरेन प्रतिसाद दितात, हें पळयल्यार हें अंतर आपोआप समजता.
ह्या प्रकारा फाटलें एक मुखेल कारण म्हणल्यार लोकप्रीय संस्कृतायेंत गुन्यांवगारीचें केल्लें ‘रोमँटिक’ चित्रण. चित्रपट, वेब सिरीज आनी सोशल मीडिया वयलीं वायरल वस्तूंनी चड करून गुंडांक बळीश्ट, निर्भय आनी प्रभावी व्यक्ती म्हणून दाखयतात. तांचे संवाद पेजाद आसतात. तांणी कायद्याचें उल्लंघन करप म्हणल्यार धाडस वा वर्चस्व अशें रंगयतात, जाका लागून खऱ्या जिवितांत समाजीक नुकसान करपी मनशां भोंवतणी नायकपणाचो एक फटकिरो आभास निर्माण जाता.
तशेंच, भुरग्यांचेर जावपी संस्कार, पालकांचें मार्गदर्शन आनी समाजीक वातावरण हांचोय व्हड वांटो आसता. हे परिणाम भुरग्यांची नैतिक दिका आनी जैता कडे पळोवपाची नदर थारायतात. ज्या घरांनी आनी समाजांत शिस्त, प्रामाणिकपण आनी कायद्या विशीं मान शिकयतात, थंयचे तरणाटे विधायक आदर्श वेंचून काडपाक चड कल दाखयतात. हाचे उरफाटें, ज्या वातावरणांत आक्रमकता, जैताचे सोंपे मार्ग वा बेकायदेशीर वागणुकेचें उदात्तीकरण जाता, थंयचे तरणाटे गुन्यांवकारांक सत्ता वा प्रभावाचें प्रतीक मानूंक लागतात.
दुसरे वटेन, सन्मान, आदर मेळिल्ल्या अधिकाऱ्यांचें जिवीत शिस्त, संयम आनी कर्तव्या प्रती समर्पणाचेर आदारिल्लें आसता. तांचें काम चड करून गाजावाजा करपी नासून गुपीत आनी समर्पीत आसता. गुन्यांवकारी जिवितांत जसो नाटकीयपणा आसता, तसो तो ह्या कामांत नासल्या कारणान, आजच्या मनोरंजनाचेर आदारिल्ल्या माध्यमांत तांकां चड म्हत्व मेळना.
बंडाचें मानसशास्त्रीय आकर्शणय ह्या प्रवृत्तीक वाडयता. तरणाटे स्वभावानच धाडसी, बंडखोर आनी वेगळ्या कथां कडेन ओडटात. सोशल मीडियाचे ‘अल्गोरिदम’ जाणीवपूर्वक अशा मजकुराक चड वयर हाडटात जो लोकांच्या भावनांक चेतयता. परिणामी, ‘कुख्यात’ आसप हेंच ‘लोकप्रीय’ आसपाचें लक्षण मानप रुढ जालां.
पूण गुन्यांवगारीचो हो झगमगाट एका काळखाक धांपून दवरता. ह्या झगमगाटा फाटल्यान हिंसाचार, दुख्ख, बंदखण आनी सर्वनाश हेंच खरें सत्य आसता. स्क्रीनीचेर जें दाखयतात, तें प्रत्यक्षांत व्यक्ती, कुटुंब आनी पुराय समाजाचेर जावपी लुकसाणा कडे दुर्लक्ष करता.
समाजा मुखार आशिल्लें हें प्रस्न फकत कायद्याचें नासून तें संस्कृतीक आनी नैतिकाचें आसा. जेन्ना सोशल मीडिया वयले लोकप्रियेतेचे आंकडे हेच आदराचें माप मानतात, तेन्ना समाज ‘सन्माना’ परस ‘कुख्यातपणाक’ वयर लेखपाची भिरांत निर्माण जाता.
एका सुदृढ आनी जबाबदार समाजान, कायद्याचें पालन करपी आनी न्याय सांबाळपी लोकांचो गौरव करून हें संतुलन सादपाक जाय. खरे नायक ते न्हय जे गुन्यांवांतल्यान भंय निर्माण करतात, तर ते जे आपल्या धैर्यान, शिस्तीन आनी प्रामाणिकपणान मान जोडतात. जेन्ना तरणाटे देखाव्या परस सेवेची ओड धरतले, तेन्नाच खऱ्या अर्थान सन्मान जैताक पावतलो.
ॲड. विनायक (मामा) दी. पोरोब (प्रभु पुनाळेकर)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
