गोंयचो सांबाळ जावंकूच जाय

भांगरभूंय | प्रतिनिधी

आयज गोंयांत कितलेच कडेन जमनीचें रुपांतर जायत आसा, जें गोंयच्या फुडारा खातीर धोक्याचें आसा.

समाजांत जायत्यो घडामोडी घडटात आनी फुडारी पेंचांत येतात. जो फुडारी स्वता खातीर चिंतता, तो एकलोच निर्णय घेता आनी तो निर्णय लोकाचेर थापपाचो विचार करता. पूण, जो फुडारी लोककल्याणा खातीर चिंतता तो सगळ्यां कडेन विचार- विमर्श करून निर्णय घेता आनी आपूण फाटीं रावून बरें तें घडूंक वाट मेकळी करता. अशेंच कितें शिरदोना पळेवंक मेळ्ळें. थंयचो आमदार विरेश बोरकार लोकां खातीर उबो रावलो आनी लोकां खातीर कश्टवता. ताका जाय जाल्यार ताणें टिसीपी मंत्र्याल्या घरा कडेन वचून उलोवणी करून ‘आपूण पळेतां, करुंया, जातलें’ अशें सांगून वेळ काडूं येतालो पूण तो गोंयच्या हिता खातीर सरकाराच्या कांय निर्णयां विरुद्ध उबो रावलो.

टिसीपी कायदो

टिसीपी कायद्याचें कलम 39 (अ) सांगता, “गोंय शार आनी देस नियोजनाच्या नेम 4-च्या उपनेम 3 खाला मान्यताय/ शिफारशी/ निर्णया खातीर प्रादेशीक येवजण/ रुपरेशा  उदरगत येवजणेंत विभाग बदलपा खातीर मंडळाच्या विचारा खातीर टिसीपी कायद्याचें कलम 39 (अ) खाला मेळिल्लो अर्ज.”  हो 2024 वर्सा केल्लो नवो कायदो कोणाकूय जमनीचें रुपांतर करुंक परवानगी दिता. हाचो फायदो काडून जायते कडेन जमनींचें रुपांतर जावंक लागलां. मजा म्हणल्यार गोंय भायले लोक हाचो चड फायदो काडूंक लागल्यात. गोंयचो टिसीपी मंत्री असल्या कामांत सर्रास परवानगी दिता म्हण ताचेर आरोप आसात. जे नेम गोंयच्या हिता खातीर नात, ते एका मंत्र्यान मानून घेवप? हो भौसाचो प्रस्न आसा.  आयज गोंयांत कितलेच कडेन जमनीचें रुपांतर जायत आसा, जें गोंयच्या फुडारा खातीर धोक्याचें आसा.

सांत आंद्रे तें सत्तरी

आयच्या गोंयकारांची विचार श्रेणी बरीच बदल्ल्या. सांत आंद्रेच्या शिरदोना सुरू जाल्लें आंदोलन पणजे पावलें आनी पणजे ताका बरोच रंग आयले उपरांत हें आंदोलन हांगा अर्थाक येवंचें ना म्हूण ताणीं सत्तरी वचपाक निर्णय घेतलो, पूण सत्तरींतलो मंत्री दोनापावला रावता हें कळटकच ताणें आपलो मोर्चा दोनापावला वळयलो. पुलिसांचीं आडमेळीं, बेरिकेडस आसुनूय कांय जण मंत्र्याच्या घरा पावलेच. आपली राखण करुंक आपलेच लोक आसतले, अशें मंत्री म्हणटालो, पूण तशें घडलें ना आनी ताका पुलिसांनीच राखण दिवंची पडली. प्रस्न उपरासता तो असो, अशे मंत्र्याच्या घरा कडेन बोवाळ घाल्यार प्रस्न सुट्टात? हो गोंयच्या हिताचो प्रस्न आनी असले प्रस्न विधानसभेंत सुटावे करचे आसतात.  पूण एक गजाल विपरीत घडल्या, एका आमदाराक बेआब्रू केला, पुलिसांनी ताका वायट रितीन हाताळ्ळा, अशें जावंक नाका आशिल्लें. कायदो आनी सुवेवस्था सारकी आसूंक जाय हें बरोबर, पूण एका आमदाराक उबारून व्हरप हें योग्य न्हय. हेच खातीर लोक आनीक चाळवल्यात, सरकार एका आमदारा कडेन अशें वागतात जाल्यार सामान्य मनशाचें कितें?

सामान्य विचारसरणी

गोंयच्या हिता खातीर आयज सामान्य लोक रस्त्यार देंवूंक लागला. टिसीपीचें कलम 39 (अ) रद्द करचें म्हण लोकांची मागणी वाडत आसा आनी आंदोलन उग्र रूप घेयत आसा.  कांय लोक आपल्या जिविताची पर्वा करिनासतना रस्त्यार देंवूंक तयार आसात. बसपागारी जुईज फेर्दिनो रेबेलो हाणें दिल्ल्या ‘इनाफ ईज इनाफ’ ह्या तत्वाक धरून सामान्य लोक विचार करुंक लागल्यात. सामान्य लोक उलोवंक लागला, म्हाका म्हजे भुंयेचो मोग आसा आनी हें सरकार जाका आमी विंचून काडलां, तें आमचें गोंय काबार करुंक फुडें सरलां.  तेच खातीर चड आनी चड लोक ह्या आंदोलनाक तेंको दिता. फाटलीं बरींच वरसां सत्तरी हो राणे कुटुंबाचो गड आशिल्लो, ताचे फातर आतां हालूंक लागल्यात.  हाच्यो खुणा सरकारांतूय दिसूंक लागल्यात. ते खातीर लोक सरकाराचेरूय थोमणे मारुंक लागला.

एक घडणी

क्रिस्ती पवित्र पुस्तकांत निनेवेह शाराची गजाल मेळटा.  हें शार तिगरित्स न्हंयचेर आतांच्या इराक देसांत आसा. तें इतलें पातकांत बुडिल्लें की देवान आपलो प्रवादी धाडून तांकां फकत चाळीस दीस उरल्यात म्हूण कळयलें.  तेन्ना सगळ्या लोकान उपास सुरू केलो.  ही गजाल राजाक कळ्ळी, तेन्ना राजा शिंवासना वेलो देंवलो आनी ताणें आपलीं आंगवस्त्रां काडून साकाफटीं न्हेसून गोबराचेर वचून बसलो. राजान फरमायलें, “सगळ्यांनी उपास करचो आनी साकाफट्यान आंग पांगुरचें; व्हडल्यान देवाक उलो मारचो; जण एकल्यान आपलें वायट जिवीत सोडून दिवंचें आनी आपलीं नश्टीं कर्तुबां सोडचीं. दर एकल्यान उपास करुंक फर्मायलें आनी आपुणूय लोका बराबर रावलो.” अशे तरेन देव भगशितलो ही भावना राजान आपणायली आनी तांकां तारण मेळ्ळें.

आमचो राजा

आमचो राजा गोंयचो मुख्यमंत्री.  ताणें आंदोलन करप्यांची भेट घेतली.  तांचे कडेन उलोवणीं केलीं आनी हो विशय विधानसभेंत भासाभास करून सोडवंया म्हूण सांगलें. हें आश्वासन कितलें विश्वासनीय आशिल्लें? आंदोलनकारांनी तें मानून घेतलें ना. कित्याक हे आदीं तांणी दिल्लीं आश्वासनां पूर्ण जावंक नात, अशे विरोधक म्हणटात. ह्या आंदोलनांत फकत आमदार विरेश बोरकार एकलोच सामील ना तर विरोधी पंगडांतले सगळेच आमदार आसात. देखून आपणा खाला वावुरतल्या आमदारांक विस्वासांत घेवप हें मुख्यमंत्र्यान वळखलां आसतलें, म्हण ते आजाद मैदानार पावलो. पूण निनेवेहच्या लोका भशेन ताचेर विस्वास ठाम आसा काय? लोक घर सोडून रस्त्यार न्हिदतात ही चिंत्ता करपाची गजाल. शेळमेळावलेचें प्रकरण आमी पळेलें, एकतामॉलाचें प्रकरण पळेलें, गोवा मेडिकल कॉलेजीचें प्रकरण पळेलें.  देखून मुख्यमंत्र्यान लोका बराबर रावूंक विचार केल्यार गोंयच्या हिताची गजाल घडुंयेता.

सोंपयतना…

साश्टींतलो एक तरणाटो आपले उदगार काडटा, आमी विकासाच्या आड नात पूण ती विकास प्रक्रिया पारदर्शक आनी लोक हिताची आसची. जर सरकाराक दिसता टिसीपीचें कलम 39 (अ) लोकाक फायद्याचें दिसता, जाल्यार तें बरे भशेन उगतेपणान लोकाक कित्याक समजावन सांगनात? अशी भावना आसा जाल्यार सरकाराची जबाबदारी थारता लोकाक आयकून घेवंक आनी लोका बराबर रावूंक.  जो कोण चूक करता ताका सांबाळप म्हणल्यार ते चुकींत सहभागी जावप. पूण एक गजाल खरी, हें लोकराज्य, लोकांक जाय तशें जावंक जाय. ना जाल्यार आंदोलनां जायत रावतलीं आनी खरो विकास थंयच उरतलो. आमकां गोंय सांबाळूंक जाय, तें आंदोलना करून जाल्यार आंदोलनां करून, गोंयचो सांबाळ जावंकूच जाय.

—- 

– विन्सी क्वाद्रूस, राय, साश्ट

मो. – 9822587498