भांगरभूंय | प्रतिनिधी
लग्न जाल्ल्या जोडप्यां मदलो दुबाव आतां घरच्या चार वण्टीं पुरतो मर्यादीत उरूंक ना. एक्स्ट्रा मॅरिटल अफेअरचे शक्यतायेक लागून जोडपीं आतां खाजगी गुप्तहेर संस्थां मेरेनूय पावतात. संस्थांच्या मतान, तांचे कडेन येवपी वट्ट प्रकरणां मदलीं सुमार ४० टक्के प्रकरणां एक्स्ट्रा मॅरिटल अफेअरा कडेन संबंदीत आसतात. संस्थांचो दावो आसा, ९० टक्के प्रकरणांतलो दुबाव खरो थारता. जाल्यार कांय प्रकरणां मदीं दुबाव निराधारय सिद्ध जाता. म्हळ्यार धा मदले णव दुबाव खरे थारतात. मात, गुप्तहेर संस्थां मेरेन पावप हो रोखडोच घेतिल्लो निर्णय नासता.
चडशीं जोडपीं पयलीं स्वता फोन, सोशल मीडिया, वागणूक आनी सदचे जिणेंच जाल्ल्या बदलांक समजून घेवपाचो यत्न करतात. जेन्ना दुबाव वाडटा आनी नात्यां मदीं संघर्श वाडपाक लागता तेन्ना पुरावे एकठांय करपाक एजन्सीची नेमणूक करतात. हे प्रक्रियेंत वेळूय लागता आनी खर्चूय व्हड आसता.
एका दिसाच्या फिजिकल सर्व्हिलन्सचो खर्च ६ ते ७ हजार रुपयां मेरेन आसता. जाल्यार एका सप्तकाचे चवकशेचो खर्च ४० ते ५० हजार रुपयां मेरेन पावता. डिटेक्टिव्ह एजन्सींच्या मतान, एनआरआय चवकशी वेगान वाडटा. ह्याच कारणाक लागून दिल्ली आनी हेर व्हड शारांतल्यो एजन्सीय पंजाबांत सक्रीय जाता. पुराय पंजाबांत एका म्हयन्यांत सुमार ३०० मेरेन एक्स्ट्रा मॅरिटल अफेअरचीं प्रकरणां एजन्सींकडेन सोडोवपा खातीर येतात.
चार केस स्टडीजांतल्यान मुखार आयिल्लें सत: दुबावान दिका बदल्ली, पुराव्यान परिणाम निश्चीत केले
केस -१: चवकशे उपरांतूय चित्र पुरायेन स्पश्ट जावंक़ ना
युकेंतल्यान नोंद केल्लें हें प्रकरण. बायल परदेशांत रावता आनी ती भारतांत १५ दिसां खातीर आयिल्ली. सेगीत फोन व्यस्त आसप, संवादांत अंतर आनी बदलिल्ली वागणूक हें घोवाच्या दुबावाचें कारण आशिल्लें. एजन्सीन हालचाली आनी संपर्काचो फाटलाव केो, मात कसलोच पुरावो मुखार आयलो ना. हें प्रकरण ह्या गजालींचें उदाहरण जालां, दरेक दुबाव सत जायना आनी जायते फावट चवकशी नातीं तुटपा पासून वाटयता.
केस -२: आर्मी ऑफिसर हाजीर नाशिल्लयान तुटलें नातें
हें प्रकरण एका आर्मी ऑफिसरा कडेन संबंदीत आसा. ताची पोस्टिंग परदेशांत जाल्ली. ताची बायल जालंधर रावताली. बायलेचें एक्स्ट्रा मॅरिटल अफेअर संबंद आशिल्ले. हे मजगतीं ती बायल आपल्या भुरग्यांक बापाय आड भडकोवपाक लागली. भुरग्यां मुखार बापायक वायट थारावपाक लागली. हाका लागून भुरग्यांनी बापाय कडेन उलोवपूय बंद केलें. घोवान डिटेक्टिव्ह नेमलो. एजन्सीन प्रत्यक्ष पाळत दवरपाक सुरवात केली आनी हालचालीं सयत मेळपाचेर लक्ष दवरलें, तेन्ना हें प्रकरण उक्तडार आयलें.
केस -३: ऑफिसांत अफेअराचो दुबाव
मोहालींत रिअल इस्टेटी कडेन संबंदीत एका मनशाचेर ताचे बायलेक दुबाव आशिल्लो. ताचें ऑफिसांत कोणा वांगडा अफेअर आसा. ऑफिसा भायर आनी रस्त्यार भेटीगाठींचे पुरावे मेळ्ळे. जेन्ना बायलेक घडणुके सुवातेर आपयली तेन्ना उलोवप वादांतल्यान सुरू जावन मारामारी मेरेन पावलें. भौशीक सुवातेवेलो हो संघर्श हे गजालीचो संकेत आसलो, जेन्ना दुबाव आनी सत एकामेका सामकार येता तेन्ना नात्यांतली कोडसाण उक्ती जाता. .
केस -४: परदेशांतल्यान आयिल्ले बायलेचेर घोवाचो दुबाव, पुरावे मेळ्ळे
खरडचें प्रकरण एका नोकरदार बायले कडेन संबंदीत आशिल्लेे, जी परदेशांतल्यान भारतांत आयिल्ली. घोवाक दुबाव आशिल्लो तिचे नोकरे मजगतीं जाल्ले संबंद प्रेमसंबंधांत बदल्ल्यांत. डिटेक्टिव्ह एजन्सीने ऑफिसांतल्यो हालचाली, कॉल पॅटर्न आनी भेटीगाठींचेर लक्ष दवरले, जातूंत एकाच मनशा कडेन संपर्क आनी थारिल्ल्यो भेटी मुखार आयल्यो. एजन्सीन फोटो आनी खुबश्या पुराव्यां सयत अहवाल सादर केलो, उपरांत हें प्रकरण कुटुंब आनी वकिलां मेरेन पावलें.
तज्ञः वाडपी अंतर आनी उणे संवाद नात्यांक दुबळीं करतात
मुखेल तपास अधिकारी विकास सोनकर हांच्या म्हणण्या प्रमाण, जे लोक गुप्तहेर संस्थे मेरेन पावतात, ते बारीक सारीक दुबावावेल्यान येनात. ही एक लांब मानसीक प्रक्रिया आसता. खुबशीं घरां पयलींच भितरल्यान तुटिल्लीं आसतात. तपासाचो हेतू फकत धरप ना, जाल्यार पुराव्यां सयत सत मुखार हाडप आसता. जरी दरेक दुबाव खरो नासता, तरी चडश्या प्रकरणांनी अफेअरची पुश्टी जाता. वाडपी अंतर, उणो संवाद, लांबची पोस्टिंग, एनआरआय जीवनशैली आनी सोशल मीडियाच्या सहज उपलब्धतेन नात्यां मदीं आनीक दुबाळेंपण आयलां. हाका लागूनच आजकाल नातेसंबंध न्यायालय आनी गुप्तहेर संस्थांच्या चपक्यांत सांपडटात. सत जाणून घेवप म्हत्वाचें आसा, मात ताचे परस म्हत्वाचें आसा, नात्यां मदले दुबाव वेळार संवादान सोडोवचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
