भांगरभूंय | प्रतिनिधी
गैरसमज 6 – संमोहीत जाल्ले आसतना आशीकुशीक उजो पेटलो वो कसलोय घात-पात जालो जाल्यार ताची जाणीव त्या व्यक्तीक जायना.
संमोहीत जाल्ली व्यक्तीक ताच्या आशीकुशीक घडपी सगळ्याच गजालीचे भान नासले तरी कसल्याय धोक्याची वो अरिश्टाची जाणीव वो भान आसता. संमोहन चालू आसतना खंयी अचकित उजो बी लागल्यार ती व्यक्ती आपोआपच संमोहनातल्यान भायर येता आनी अपेक्षित तरेन परिस्थिती हाताळटा.
आमी सदच्याच वळखीच्या रस्त्याचेर गाडी चलयतना जायते फावट आमची तंद्री लागता. आमकां रस्त्याचेर चड लक्ष केंद्रीत करपाची गरज पडना. आमचो मेंदू आपोआपच ते हाताळटा. पूण अचकीत जर फुडल्यान कोणेय ब्रेक मारलो वो अपघात जालो जाल्यार आमी पुराय भानार येतात. खरे म्हणल्यार सदचेच काम करतना आमची जायतेफावट तंद्री लागता तें एक तरेचे संमोहनच. ते करपाक आमकां कोणा तज्ञाची गरज भासना, तर ते एक तरेचे आत्म-संमोहन. आशीकुशीक कसलोय धोको दिसलो जाल्यार जशी आमची तंद्री मोडटा तशेच संमोहीत केल्ल्या व्यक्तीबाबतय घडटा.
गैरसमज 7 – व्यक्ती संमोहीत स्थितींत आसतना जर संमोहन तज्ञाक वो चिकित्सकाक कितेंय जालें वा तो थंयच्यान नाच्च जालो जाल्यार ती संमोहीत व्यक्ती त्याच स्थितींत उरता.
हांव ल्हान आसतना दुरदर्शनाचेर एक “झोपी गेलेला जागा झाला” नांवाची एक मराठी हास्यमालिका येताली जातूंत अशोक सराफान काम केल्लें. तातूंत अशेच प्रसंग दाखयल्यात जंय संमोहनतज्ञ ताका संमोहीत करून सोडून दिता आनी त्या स्थितीतुच उरुन हांसत उरता आनी कित्याकितेंय करपाक लागता. पूण हें फकत टिवी सिनेमांतुच घडटा. खरेंपणान तशें काय घडना. संमोहन तज्ञा कडसून सुचनेची वाट पळेवपी व्यक्तीक जर जायते वेळ मेरेन कांय सूचना मेळुना जाल्यार एक तर तो वाजेवन तातूंतल्यान भायर येतलो ना जाल्यार ताका न्हीद लागतली आनी जाग येतकच तो सदचेचवरी न्हिदेंतल्यान उठून कांयच घडूनाशिल्ल्या भशेन वर्तन करतलो. संमोहनतज्ञाचें संमोहीत केल्ल्या व्यक्तीचेर कसलेय तरेचें असामान्य नियंत्रण आसना.
गैरसमज 8 – एकादे संमोहीत जाल्ल्या व्यक्तिक संमोहनतज्ञाच्यो आवाज आयकुंय आयल्यार ताचो अर्थ तो संमोहित जालोना असो जाता.
हेंवूंय कांय खरे न्ही. दरेकल्याचो तो वैयक्तीक अणभव आसता. थोडेजाण संमोहकाचो आवाज आयकतात तर थोडेजाण तो आयकनात. पूण आवाज आयकूंक येता हाचो अर्थ तो संमोहीत जालो ना असो जायना. चड करुन लोक एका तंद्रेन वचपाक सोदता जेणेकरुन तांका सुशेग आनी आनंद मेळटा.
गैरसमज 9 – संमोहनाच्या तंद्रेंत आसतना व्यक्ति कडल्यान ताचे खोल गुपीत लोकां मुखार ताच्या तोंडांतल्यान वदोवन घेवपाक शकता –
एकादे व्यक्तीक ताच्या जिणेबद्दल कितेंच उलोवपाक नाका जाल्यार तें वदोवन घेवप सोंपें नासता. संमोहीत जाल्ली व्यक्ती फट मारपाक शकता आनी ती ते स्थितींत चडच कल्पक आसता. म्हुण संमोहीत स्थितींत दिल्ली गवाय कोर्टांत ग्राह्य धरनात.
गैरसमज 10 – संमोहनतज्ञा कडेन असामान्य शक्त आसता –
जायते शिक्षित लोकांचो लेगीत असो गैरसमज आसता. खरें म्हणल्यार संमोहनतज्ञ हो सगल्या सामान्य मनशांसारको मनीस जो खाता पिता न्हिदता, उठटा, आनंदित जाता, दुखी जाता आनी बाकी सगलें करता. ताचेकडेन कायच जादुई शक्त बी नासता. फकत ताणें संमोहन शास्त्राचो अभ्यास केल्लो आसता आनी प्रशिक्षण घेवन त्या कामांत कुशळटाय मेळयिल्ली आसता. ती कला अवगत करुन जायते वर्सांचो अणभव गाठी मारतकच
तो एक कुशळ संमोहनतज्ञ वो चिकित्सक जावन लोकांक संमोहित करून तांकां मजत आनी मार्गदर्शन करुंक शकता.
माचयेर प्रयोग करपी संमोहनतज्ञ मात आपल्या कडेन असामान्य शक्त आशिल्ल्यावरी चित्र उबे करतात जेवरवी तांचो खेळ गुढ आनी मनोरंजक जाता आनी लोकांची मनरिजवण जाता. पूण ते माचयेर करतात ती चडशी हातचलाखीच आसता जी ताणी खर यत्न करुन आनी अणभवान सादिल्ली आसता.
गैरसमज 11 – कुड शिथील करुन विसवाच्या स्थितीत व्हरून व्यक्तीक संमोहीत करचे पडटा
कुड शिथिल करुन विसव घेवपाक लावन संमोहित करप हो संमोहित करपाची एक पद्दत जरी आसली तरीय संमोहन फकत त्याच पद्दतीन करपाक मेळटा अशे ना. खंयचचोय खर भावनीक अणभव जागो करुन वो मनाक उत्तेजित करुन वो चिंता जागृत करुनय संमोहीत करपाक मेळटा. संमोहनतज्ञ गरजे प्रमाणें जी सगळ्यांत कार्यक्षम पद्दत आसा ती वापरून संमोहीत करता. फकत रिलॅक्स करुनच संमोहित करपाक जाय अशे ना.
गैरसमज 12- संमोहित जावपी व्यक्ती संमोहीत जाल्ल्याचे फकत संवंग घेता.
लोक जायते फावट म्हणटात की एकादे व्यक्तीक माचयेर प्रयोग करप्या जादुगारान माचयेर आपयले आनी ताका संमोहित केले जाल्यार ती व्यक्ती खरेपणान संमोहीत जायना तर त्या जादुगाराक बरे दिसपाक जाय म्हुण फकत नाटक करता. स्टेजीर प्रयोग करतना एकादे कांय फावट खरे आसत पूण उपचार पद्दतींत मात खरेपणान संमोहीत जाता. हजारांनी लोकांचेर संमोहन चिकित्सा करुन हुंगरी लायनासतना शस्त्रक्रिया करप शक्य जालां.
तर अशे हे समज आनी गैरसमज. पाश्चात्या देशांत संमोहनशास्त्राचेर जायते संशोधन जालां आनी मनोचिकित्सक शास्त्रीय पद्दतीन ताचो वापर करतात. भारता सारक्या देशांत मात चडकरून लोक कसल्याय गजालीकडेन अंधश्रद्धाळू नदरेंतल्यान पळयतात. ती नदर आमी आतां बदलपाची गरज आसा. मनोचिकित्सेन मान्यताय मेळयिल्लें संमोहन हें एक शास्त्र जाच्या बद्दलचे नाका जालेले गैरसमज आमी पयस करुन ताचो आमच्या जिणेंत उपचारपद्दती म्हुण लाव आमी घेवपाक शकतात.
मंजुषा सिनाय तळावलीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
