भांगरभूंय | प्रतिनिधी
गोंय एक ल्हानशें सोबीत सैमान नटिल्लें राज्य. सैम हें गोंयची गिरेस्तकाय आनी गांवगिरे वांठार गोंयची ताकद. पूण गांव हे ल्हवू ल्हवू नश्ट जायत चल्ल्यात. गांवाचे काँक्रीटकिरण जायत आसा. गांवांतल्या सैमाची कत्तल करून थंय व्हडल्यो व्हडल्यो इमारती आनी निवासी प्रकल्प उबे रावंक लागल्यात. पूण कांय गांवचे लोक सुस्त न्हिदल्यात. तांकां कांयच पडून वचूंक ना. ते खातीर राजकारण्यांचें आनी बिल्डरांचें फावलां.
पणजे लागसार आशिल्या गांवांचेर एक नदर मारल्यार गांवांची खरी परिस्थिती किदें ती कळटली. मांडवी न्हंयेच्या देगेर आशिल्या रेईश मागुश गांवाच्या दोंगरार आयज निवासी प्रकल्प उबे राविल्ले दिश्टी पडटात. दोंगर कापताना कांय समाजसेवकांनी बोवाळ केलो, पूण कांयच फायदो जालो ना. पंचायतीचो ह्या निवासी प्रकल्पांक पुराय तेंको आशिल्लो. देखून दोंगर बोडको जालो. पिळर्ण पठाराचेर पंचायतीच्या सहकार्यान कितलेशेच निवासी प्रकल्प स्विमींग पुलां सयत निर्माण जाल्ले आसात. तीच परिस्थिती निर्ला गांवची जाल्या. थंय ल्हान- ल्हान बंगले उबे रावल्यात. ह्या बंगल्यांनी स्विमिंग पुलांची वेवस्था आसा. गांवच्या लोकांक पियेवपाचें उदक धड मेळना, पूण गिरेस्त लोकांक स्विमिंग पूल बांदपाक पंचायत परवानगी दितात. ही सगली पयशांची करामत न्हय?
अशीच भिरांकुळ स्थिती गोयांतल्या कांय हेर गांवांची जाल्ली आसा. भायल्यान गांव बरे दिसतात, पूण भितर वचून पळयतकीच तुमच्या दोळ्यांचेर तुमचो विस्वास बसचो ना. झाडां आनी दोंगर कापून व्हडले- व्हडले निवासी प्रकल्प अस्तित्वांत आयल्यात. पंचायतीच्या आनी शार आनी नगर नियोजन खात्याच्या आशिर्वादान हें सगळे चल्लां. कांय पंचायतीचे पंच वांगडी गब्बर जाल्ले आसात. ते आयज आलिशान गाडयांनी भोंवंक लागल्यात. कांय गावांतल्या दोंगराचेंर झाडां कापून घरां बांदिल्लीं आसात. हरशीं सामान्य मनशान विजेची जोडणेची मागणी केल्यार वीज खातें आपल्या कडेन खांबे ना म्हणून सांगता, पूण या दोंगराचेर हे खांबे कशे पावले आनी वीज पुरवण कोणाच्या सांगण्या वेल्यान लोकांक दिली?.
दर्यादेग वांठारांत नदर मारल्यार सीआर झेड कायद्याचें सर्रास उल्लंघन जाल्लें दिश्टी पडटा. मीठागराचेर नायट क्लब आनी रेस्टाॅरंन्टा उबारिल्लीं आसात. नायट क्लब तर भरपूर आसात. पूण अजापाची गजाल म्हणल्यार ह्या वांठारांचो आमदार म्हणटा, आपल्याक कांयच खबर ना, हें कशें शक्य आसा. आमदाराच्याच आशिर्वादान हीं बेकायदशीर बांदकामां जाल्लीं नात? अशा प्रकरणात फक्त सरपंच आनी पंचायत सचिवाआड कारवाय केली म्हण प्रस्न सुटावे जावंचे नात. आमदारा आड कायदेशीर कारवाय जावपाची गरज आसा.
गोंय म्हळ्यार सोबीत सैम आनी विस्तीर्ण दर्यादेगो लाबिलें हें एक पर्यटन स्थळ आसा. पणजे सावन सुमार था बारा किलोमिटर अंतराचेर कांदोळी, कळंगुट, बागा, हरमल मोरजी ह्यो दर्यादेगो आसात. ह्या दयादेगांची किर्त संवसारभर पातळिल्ली आसा. फाटल्या वीस वर्सांत या दर्यादेगेवेल्या वाठारांचो कायापालट जाल्लो आसा. हो वाठार आतां गांवगिरो वाठार उरूंक ना. तांचे पूराय शारीकरण जालां.
दर वर्सा गोंयांत लाखांनी देशी आनी विदेशी पर्यटक येतात. पर्यटक येतात ते गोंयच्या सैमाचो आस्वाद घेवपाक, दर्यादेगेर आशिल्ल्या भांगराळ्या रेंवेंत नाचपाक उडयो मारीत येवपी उंच ल्हारांक आंगार घेवपाक पर्यटन खातें हींटरलँड पर्यटनाक चालना दिवपाक येवजणो चालीक लावपाचो प्रयत्न करतात. पूण गांवूच अस्तित्वांत उरलेनात तर हिंटरलँड पर्यटन कशें करतलें. देखून गांव उरप अत्यंत गरजेचें आसा. गोंयची अस्मिताय ही गांवांनी आसा.
गोंय सरकारान 2000 वर्सा पर्यटनाक उद्योगाचो दर्जो दिल्लो आसा. पर्यटन हो उद्देग गोंयचे अर्थीक वेवस्थेचो कणो आसा. तो घटमुट जातलो जाल्यार गोंयच्या सैमाची अर्थात गांवांतल्या सैमाची जतनाय घेवप गरजेचें आसा. सैम खंयच्याच परिस्थितींत इबाडूंक दिवंक जायना ही फकत सरकाराचीच न्हंय तर दर एकल्याची जापसालदारकी आसा. दोंगर बोडके जाले, न्हंयो दुशित जाल्यो आनी झाडां पेडां राना नश्ट जालीं जाल्यार गोंयची अस्मिताय संपुश्टांत येतली. गोंयचें खाशेलेंपण उरचें ना.
उदरगत म्हणल्यार फकत व्हडल्यो व्डडल्यो इमारती, पूल आनी फ्लाय ओवर बांदप न्हय. तर सैमाची राखण करप, लोकांच्यो गरजो पुराय करप हैं सरकाराचे काम आसा. ह्या व्हडल्या इमारतींनी रावतात कोण हाचो सरकारान विचार केला काय?. सरकारान सर्वेक्षण करून पळयल्यार सरकाराच्या लक्षांत येतलें ह्या इमारतींनी गोंयकार चड रावनात. ह्या इमारतीतलें फ्लॅट गोंयकारांक परवडनात. ते गोंया भायल्या लोकांनी विकत घेतल्यात. देखून आयज गोंयच्या रस्त्यांचेर हरयाणा, दिल्ली, महाराश्ट्र, कर्नाटक, राजस्थान, आंध्रप्रदेश,
तेलंगणा, उत्तर प्रदेश हांगां नोंदणी जाल्ल्यो गाड्यो दिश्टी पडटात. हें अशेंच चलत रावलें जाल्यार कांय वर्सांनी गोंयांत गोंयकार सोदचो पडटलो. समाजसेवकांनी ही परिस्थिती गोंयकाराचेर येवची न्हय जाल्यार नीज गोंयकारांनी जागृत जावंक जाय. रानां कापपाक मनाय करूंक जाय. व्हडले निवासी प्रकल्पांक विरोध करूंक जाय आनी गोंयच्या सैमाची राखण करून गोंयची अस्मिताय
तिगोवन दवरपाक वावरूंक जाय. गोंयकारांनी गोंयकारपण जपपा खातीर पावलां उखलूंक जाय. ही काळाची गरज.
अनिल कामत शंखवाळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
